ل حەسەکێ شەرە و ل قامشلۆ بێدەنگی یە
ئەڤرۆ:
بەری سێ رۆژان شەر و پێکدادانان د ناڤبەرا لەشکرێ بەشار ئەسەد و میلیشیاتێ، گرێدای وان بەرامبەر چەکدارێن YPG دەستپێکر. ل دووڤ نوچەیێن گرێدای PYD و چەند ئاژانسەکێن دی یێن سووریێ پشتی دەستپێکرنا وی شەری، لەشکرێ سووریێ رابووریە ب بومبەبارانکرنا تاخێن کوردی یێن وی باژێری و ئەڤە بوویە ئەگەر کو چەندین وەلاتێن مەدەنیێن کورد شەھید و بریندار ب بن.
ل دووڤ راپۆرتەکا مالپەرێ وەلاتی نێت، د چارچوڤێ شەری َد ناڤبەرا ھێزێن ئەسەد و YPG ھێزێن کوردی یێن شیاین کونترولێ ل سەر مەخفەرا باکور و چەند جھێ دی بکەن و ھەروەسا ھێزێن رژێما ئەسەد ژی کونترول یا ل سەر گەراجێ تل حەجر و دەوروبەرێن کەنیسا ئاشووری بکەن.
ل دووڤ گۆتنێن وی مالپەری ھەر دو ئالیان ب دەھان کوشتی و بریندار ھەنە و ھەروەسا ھەر دو ئالیان دەستەسەر کری ژی ھەنە و ھێزێن رژێمێ ھاتن و چوون ل گەرەکێن باکورێ باژێری قەدەغە کر و دەبابێن خوە ل چەند جادە و دەڤەرەکێن باژێری بەلاڤکرن و ھەروەسا ھەر دو ئالیان قەناسێن خوە ل چەند دەڤەرەکێن باژێری بەلاڤکرینە.
ژ ئەنجامێ شەرێ ل حەسەکێ چێبووی و بومبەبارانکرنا ھێزێن رژێمێ بۆ چەند تاخەکێن کوردی بۆ ئەگەر کو ژمارەکا مەزن یا خێزانێن کوردێن وی باژێری ئاوارە ب بن و مال و حالێ خوە بجە بھێلن و بەر ب عاموودێ و دەڤەرێن دی بچن.
ل دۆر ڤی شەری کاوە عەزیزی ئەندامێ ئەنجوومەنێ نیشتیمانیێ کوردی ل سووریێ بۆ مالپەرێ KDP.INFO دیار کر کو سیناریویەکا مەترسیدار یا ھەی ژ بۆ کو کوردێ، حەسەکێ ل وی باژێری بھێنە دەرێخستن، ھەتا نوکە نزیکی ١٠٠٠ کەسان ئەو باژێر یێ بجە ھێلای و شەر ژی یێ بەردەوامە و گۆت: ( یا سەیر ئەوە پەیەدە و رژێم ل حەسەکێ شەری دکەن و ل قامشلو پێکڤە کار دکەن).
ل دووڤ گۆتنێ، کاوا عەزیزی، پەیەدێ و رژێمێ چ ل گرێ سپی و گرێ حاسل و کوبانێ کر، یێ وە ل حەسەکێ ژی بکەن و نەیا دوورە سوباھی ببیتە دورا قامشلو و عاموودێ ژی و پاشی دوزا کوردی ل سووریێ و رۆژئاڤایێ کوردستانێ ب دووماھی بینن.
کاوا عەزیزی ئەو یەک ژی دیار کر کو ئەڤە ئەجندایەکا دەرەکی یە و پێدڤیە ھێزێن ھەڤپەیمانان ھەرێما کوردستانێ بۆچوونا خوە ل دور رۆژئاڤایێ کوردستانێ بگوھۆرن، ژ بەر کو ھەکە بۆچوونا خوە نەگوھۆرن رۆژئاڤایێ کوردستانێ نامینیت.
ل دووڤ ھندەک ژێدەران ھەتا نوکە نێزیکی ١٠٠٠ مالباتێن کوردی ل حەسەکێ ئاوارەی قامشلو و عاموودێ و تربە سپیێ بووینە، ژ بەر کو د ئەنجامێ بومبەبارانا رژێمێ دا ٨ وەلاتیێن سڤیلێن کورد ھەتا نوکە شەھید بووینە.
ل تورێ کومەلایەتی ژی گەلەک وەلاتیێن رۆژئاڤا بەحسێ شەرێ حەسەکێ دکر و ل دووڤ گۆتنێن ھندەک ژ وان ھەتا پەیکەرێ حافز ئەسەد ل قامشلو نەھێتە ژناڤبرن، ئەو باوەر ناکەن کو شەرێ دروست د ناڤبەرا پەیەدێ و رژێمێ دا دروست ب بیت.
