ل دهۆكێ په‌رتۆكخانه‌ك دناڤ سه‌رتراشخانه‌كێ دا دهێته دانان
ئه‌ڤرۆنيوز:
سه‌رتراشه‌كى ل باژێرێ دهۆكێ په‌رتۆكخانه‌ك دناڤ جهێ خوه يێ سه‌رتراشيێ دانايه ودبێژيت من ل به‌ره په‌رتۆكخانێ مه‌زنتر لێ بكه‌م ومه‌ره‌ما من ئه‌وه گه‌نجان بۆ خاندنا په‌رتۆكان پالده‌م.
كارزان محمه‌د، سه‌رتراشه ل باژێرێ دهۆكێ وقوتابيێ 12 ئاماده‌يێ يه بۆ ئه‌ڤرۆنيوز دبێژيت” ل گه‌له‌ك سه‌تراشخانان ئه‌م دبينن تنێ هنده‌ك گۆڤارێن كه‌ڤن يێن تێدا هاتينه دانان كو پتريا وان ژى گرێداى مۆدێلين پرچى نه، من هزر كر تشته‌كێ جودا دناڤ سه‌رتراشخانا خوه دا بدانم ئه‌وژى په‌رتۆكن وب هاريكاريا چه‌ند هه‌ڤالان من په‌رتۆكه‌ك دناڤ سه‌رتراشخانێ دا چێكر، هه‌ر چه‌ندى يا بچووكه ژى”.
كارزانى زێده‌تر گۆت” نێزيكى 350 په‌رتۆك يێن دپه‌رتۆكخانێ دا هه‌ين و ژ هه‌موو جۆرانه وب هه‌ردو زمانێن كوردى وعه‌ره‌بى نه وهه‌ر كه‌سه‌كێ بهێته دجهێ مه‌ڤه وپه‌رتۆكخانێ دبينيت، ده‌ستخوه‌شيێ ل مه دكه‌ت وهه‌تا هنده‌ك ده‌مێ دهێن سه‌رێن خوه چێ دكه‌ن، وێنان بۆ په‌رتۆكه‌كێ گرن وبێژن ئه‌ڤ په‌رتۆكه من ل ڤێرێ ديت ودێ چم ل بازارى ل په‌رتۆكخانه‌كێ بۆ خوه كرم”.
گۆت ژى” من حه‌زا خواندنا په‌رتوكا يا هه‌ى وب تايبه‌تى يا رۆمانان، من ل به‌ره جهێ په‌رتۆكخانێ به‌رفره‌هتر بكه‌م ومێزان ژى بدانين دا ببيته جهه‌كێ تايبه‌ت بۆ خاندنێ”.
ل دۆر وێ چه‌ندێ كا ئه‌و گه‌نج وكه‌سێن دهێنه سه‌رتراشخانا وى وپه‌رتۆكخانا وى دبينن، وان حه‌ز ل چ جۆره په‌رتۆكێ يه بخوينن، كارزان دبێژيت” پتريا ئه‌وێن دهێنه سه‌رتراشخانا مه گه‌نجن وپتريا وان حه‌زا خواندنا رۆمانان يا هه‌ى ب تايبه‌تى ئه‌وێن هاتينه وه‌رگێران بۆ زمانێ كوردى”.
