ل دێره‌لۆكێ كه‌سه‌ك هوله‌كا به‌هیان بۆ ژنان دروست دكه‌ت
ئه‌ڤرۆ نیوز ، مه‌حمود نهێلى
كه‌سه‌ك رابوویه ب ئاڤاكرنا هوله‌كا به‌هیا تایبه‌ت بۆ ژنان ل سه‌نته‌رێ ناحیا دێره‌لۆك و ژلایێ باژێرڤانیێ ڤه ئه‌ردێ پێدڤى بۆ هاتیه دابینكرن.
سامى ئوشانه، رێڤه‌به‌رێ ناحیا دێره‌لۆك بۆ ئه‌ڤرۆ نیوز دیاركر، چێكرنا هوله‌كا به‌هیا ل دێره‌لۆك هه‌یاما چه‌ندین سالایه ئێك بوویه ژ داخوازیێن وه‌لاتیان ب تایبه‌تى ژى هوله‌كا تایبه‌ت بۆ ژنان ، ژبه‌ر كو ل دێره‌لۆكێ هه‌موویێ بتنێ ئێك هولا به‌هیان یا هه‌ى.
دیاركر ژى كو نوكه خێرخوازه‌ك رابوویه ب دروستكرنا هوله‌كا به‌هیان تایبه‌ت بۆ ژنان ل سه‌نته‌رێ ناحیا دێره‌لۆك و گۆت: ( ئه‌ڤ هوله دێ ل سه‌ر رووبه‌رێ 300 میتران هێته دروستكرن و ئه‌ردێ وێ ژلایێ باژێرڤانیا دێره‌لۆك ڤه هاتیه ته‌رخانكرن و ده‌ست نیشانكرن كو دكه‌ڤیته تاخێ شه‌هیدان نێزیكێ مزگه‌فتا نێروه‌ورێكان).
گۆت ژى” هه‌موو پێدڤیێن ڤێ هولێ دێ ژلایێ خێرخوازان ڤه هێنه دابیكرن، ژبه‌ر كو چو هولێن به‌هیان ل وێ ده‌ڤه‌رێ نینن، دبیت ل ده‌سپێكێ بۆ زه‌لامان بهێته بكارئینان تاكو هوله‌كا دى یا مه‌زنتر دهێته چێكرن و چێكرنا هولێن به‌هیان ل سه‌ر داخوازیا خه‌لكێ ده‌ڤه‌رێ ئێك بوویه ژ پرۆژه‌یێن مه و ڤه‌دیتن بۆ هاتینه كرن و بلندكرن و رازیبوون ژى ل سه‌ر ئێكێ هاتیه كرن و بتنێ چاڤه‌رێ پارێ گه‌شه‌پێدانا هه‌رێمان دهێته كرن بۆ ده‌سپێكرنا كارى).