ل زاخۆ تافیلکرن و بەرهەڤی بۆ هەر رەوشەکا نەچاڤەرێکری دهێتە کرن
ئەڤرۆ نیوز،عەلی حاجی :
ل باژێرێ زاخۆ دوبارە دەست ب تافیلکرنا جاددەیێن دناڤ باژێری هاتنە کرن و بەرهەڤی بۆ هەر رەوشەکا نەچاڤەرێکری دهێتە کرن. ئەندازیار ئەدهار زاخۆیی گۆت : قوناغێن تافیلکرنا جاددەیێن زاخۆ بەردەوامە ژلایێ تیمێن باژێرڤانیا زاخۆ ڤە،ئەڤرۆ ل رۆژا چار شەمبێ رێکەڤتی ٨/٤/٢٠٢٠ جادەیێن سەرەکیێن دناڤ بازارێ زاخۆ دهێنە تافیلکرن و ئەڤە بۆ جارا سیێ بازارێ زاخۆ دهێتە تافیلکرن و ئەڤە هەوێن تافیلکرنێ هەر ژ دەست پێکا هەیڤا سێ هەتا نوکە بەردەوامن و دێ بەردەوام ژی جاددەیان تافیل کەین هەتا کو رەوشا نوکە یا ڤایروسێ کورونایێ دهێتە کونترول کرن.
ل دور خوە بەرهەڤکرن بۆ هەر رەوشەکا نەچاڤەرێکری دکتور هەیهات خێرەللا گۆت : ماوەیێ چار رۆژایە خولەکا تایبەت ل دور چاوانیا خوە پاراستنێ ژ ڤایروسێ کورونایێ ل دور ستاندەردێن جیهانی ژلایێ رێڤەبەریا گشتی یا ساخلەمیا پارێزگەها دهۆکێ ب هەڤکاری دگەل ساخلەمیا زاخۆ بۆ نوشدار و کارمەندێن ساخلەمیێ و پەرستاران هاتیە ڤەکرن، كۆ ژلایێ رێکخراوا ئایسو یا ئیتالی ڤە ئەو خولە دهێتە ب رێڤەبرن،ئەڤ خولە وەک خوە بەرهەڤکرنە بۆ هەر رەوشەکا بهێت یا نەچاڤەرێکری ل پارێزگەها دهوکێ ل دور زێدەبونا حالەتێن ڤایروسێ کورونایێ یە ، پلانا ئێکێ نەخوشخانەیا سوتنێ ل دهۆکێ هات بوو بەرهەڤکرن و هەکە حالەت ل پارێزگەها دهۆکێ بەرەڤ زێدەبونێ ڤە چوون،دێ د پلانا دووێ دا نەخوشخانا زاخۆ یا گشتی و نەخوشخانا گولان ل ئاکرێ هێنە دەست نیشان کرن و تایبەت کرن ب هەلگرێن ڤایروسێ کورونایێ.
ناڤهاتی ئەو چەندە ژی گوت : هەتا نوکە رەوشا پارێزگەها دهۆکێ گەلەک یا باشە بەلێ وەکو تیمێن ساخلەمیێ دڤێت بۆ هەر پێشهاتەکا نەچاڤەرێکری ئەم بەرهەڤ بین و بەرهەڤیێن پێش وەخت ئەنجام بدەین.