ل زانكۆیا دهۆك پتر ژ 700 كورسیێن خواندنا بلند هاتنه راگه‌هاندن
ئه‌ڤرۆ، نيوز:
پروسێسا پێشكێشكرنا خواندنا بلند ماسته‌ر و دكتۆرا و دبلۆما ئه‌كادیمی ل كۆلیژێن زانكۆیا دهۆك ده‌ست پێ كر ب شێوێ ئونلاین ل سه‌ر وێب سایتێ زانكۆیێ www.uod.ac هه‌ر كه‌سه‌كێ حه‌زا خواندنا بلند هه‌بیت ل دووڤ مه‌رجێن وه‌زاره‌تا خواندنا بلند و ڤه‌كۆلینێن زانستی دی شێت پێشكێش كه‌ت.
دكتۆر لقمان هادی، هاریكارێ سه‌روكێ زانكۆیا دهۆك بۆ كاروبارێن زانستی و خواندنا بلند گوت: “هه‌ر ژ رۆژا ئێك شه‌مبی رێكه‌فتی 5/1/2020 ده‌رگه‌هێ پێشكێشكرنێ بۆ خاندنا بلند ل زانكۆیا دهۆك هاته ڤه‌كرن و هه‌تا 19/1/2020 دێ به‌رده‌وام بیت و هه‌ر كه‌سێ مه‌رجێ خواندنێ ئه‌وێن ژ لایێ وه‌زاره‌تا خواندنا بلند ڤه هاتینه دانان ل ده‌ف هه‌بن دێ ب رێكا ئونلاین ل سه‌ر وێب سایتێ زانكۆیا دهۆك داخوازیا خوه پێشكێش كه‌ت”.
هاریكارێ سه‌رۆكێ زانكۆیا دهۆك ئه‌وژی گوت: “ل دووڤ پێدڤیێن زانكۆیا دهۆك و دام و ده‌زگه‌هێن میری كورسی بۆ خواندنا بلند هاتینه ئاماده‌كرن ل سه‌رجه‌مێ 17 كۆلیژێن زانكۆیا دهۆك دكتۆرا و ماسته‌ر و دبلوما دو سالی ب سێ جۆرا ئه‌و ژی بۆ زانكۆیا دهۆك و زانكۆیێن دی و بۆ دام و ده‌زگه‌هێن میری و دیسا ب شێوێ پارالێل هاتینه ڤه‌كرن، بۆ زانین دبلۆما دو سالی یا تایبه‌ته ب كۆلیژا نۆشداری ڤه”.
دكتور لقمان هادی سه‌باره‌ت ئه‌زموونا زانستی گوت: “پێشكێشكار دێ ل رۆژا 26/1/2020 ئه‌زموونێ ئه‌نجام ده‌ت و مه‌رجه ل ڤێ ئه‌زموونێ ده‌ربچیت دا كورسیا خواندنا بلند مسوگه‌ر بكه‌ت، و هژمارا كورسیێن هاتینه راگه‌هاندن بۆ دكتۆرایێ 277 كورسی و ماسته‌ر 400 كورسی و دبلۆما دو سالی یا كۆلیژا نۆشداری ژی 28 كورسی نه و سه‌رجه‌مێ وان دبیته 705 كورسێن خواندنا بلند”.
