NO IORG
نووترين نووچه
هه‌لبژارتى2

سالار محەمەد دۆسكی:

بۆ هەلبژارتنێن بهێت ل پەرلەمانێ كوردستانێ ئێزدی داخوازا كۆتایا ئاینێ دكەن و دبێژن مە پێ باشە ئێزدیان فراكسیۆنا خوە هەبیت ل پەرلەمانێ كوردستانێ .
شێخ زێدۆ باعەدری، شێوەرمەندێ ئێزدی ل پەرلەمانێ كوردرستانێ بۆ ڕۆژنامەیا (ئەڤرۆ) گوت» ژ سەرجەمێ 111 كورسیێن پەرلەمانێ كوردستانێ 11 كورسیێن كۆتا هەنە شەش بۆ برایێن مەسیحی و پێنچ ژی بۆ برایێن توركمان، د مادەیا پێنجێ ژ پەیرەوێ ناڤخوەیێ پەرلەمانێ كوردستانێ دا هاتیە كو كورسیێن كۆتا بۆ پێكهاتەیێن نەتەوەیی و ئاینی یە، وەكو كوردێن ئێزدی داخواز دكەین كۆتا ئاینی بدەنە مە، چونكو وەكو كوردێن ئێزدی ل (دهۆك، شاریا و خانكێ) تێرا كورسیەكێ ناكەن».
ناڤبری گوت ژی» داخوازا سێ كورسیێن كۆتا ئاینی بۆ ئێزدیان دكەین هەتا دەڤەرێن (باشیك و بەحزان و شنگال ) ڤەگەرنە سەر هەرێما كوردستانێ وی دەمی مە منەت ب كۆتا نینە و ڕێژەیا ئێزدیان ل كوردستانێ دێ بیتە 10 هەتا 12%».
دیاركر» پێشتر ل خولێن بۆری چەند ئەندامێن پەرلەمانێ كوردستانێ یێن ئێزدی هەبووینە ژ پارتی دیموكراتی كوردستان و ئێكەتیا نشتیمانی یا كوردستانێ وەك (خەیری بەگ، عیدو بابەشێخ، پیرخدر سلێمان،عزدین باقەسری، مریم بابەشێخ، میرحازم تەحسین بەگ، شێخ شامۆ) د ڤێ خۆلا پەرلەمانی دا خانم (هەدیا موراد ) ل سەر فراكسیۆنا پارتی دیموكراتی كوردستان وەكو ئێزدی پشكدارە و ئەم هەر بەرێزەكێ ئێزدی ب نوونەرێ خوە دبینین لێ تایبەتمەندیا ئاینی مە هەیە و داخواز دكەین مە فراكسیۆنا ئێزدی هەبیت و میر و بابە شێخ و جڤاتا ڕوحانی و ڕەوشەنبیر و كەسایەتیێن ئێزدیان ژی ڤێ چەندێ داخواز دكەن».
شێوەرمەندێ ئێزدی ل پەرلەمانێ كوردستانێ ئەوژی نە ڤەشارت و گوت»ئێزدیان هەمان كێشە ل جڤاتا پارێزگەها دهۆكێ ژی هەیە و ل ڤێ خۆلێ خانم بێریڤان وەكو نوونەرا ئێزدیان ل جڤاتێ یە و نوكە جێگرا سەرۆكێ جڤاتا پارێزگەها دهۆكێ یە لێ ئەو ئێك بتنێ یە لەوما داخوازا كۆتا ئاینی بۆ جڤاتا پارێزگەها دهۆكێ ژی دكەین و هەتا ل جڤاتا نوونەرێن ئیراقێ ژی ئێزدی دبێ بەهرن و بەربژارا ئێزدی ڕۆناكێ نێزیكی 15 هزار دەنگ ئینان و دەرنەچوو، هەروەسا (فەرەج میرزا) سەرۆكێ لیستێ بوو و دەرنەچوو».
زێدەتر گوت» هەتا نوكە نەهاتیە دیاركرن كورسیێن كۆتا ل پەرلەمانی دێ چەند بن و ئەڤ هەژمارە دێ ل گەنگەشا پەرلەمانی ل سەر ڕاستڤەكرنا برگەیا قانوونێ هێتە ئاشكراكرن، سەرۆكاتیا هەرێما كوردستانێ گەلەك دووپاتیێ ل سەر دادپەروەریێ دكەت و نەخاسمە بۆ پێكهات و ئاینێن د ناڤا هەرێما كوردستانێ دا دژین».
خویاكر ژی» ل سەر هەمان بابەت نوونەرێ یونامی ل گەل (توركمان، كلدان و ئاشوری)یان كۆمبوون ئەنجام دانە و هەتا نوكە ئێزدی نەهاتینە ئاگەهداركرن كا دێ ل گەل كۆم بیت یان نە، بەلێ چەند بزاڤ هاتینەكرن بۆ ڤێ چەندێ ژئالیێ نوونەرا ئێزدیان ل پەرلەمانێ كوردستانێ و دیسا مە بخوە ژی بزاڤ خورتكرینە بۆ ئەنجامدانا ڤی كاری».
ل دووماهیێ گوت» ب ڕێكا ڕۆژنامەیا هەوە داخوازێ ژ هەموو فراكسیۆنێن پەرلەمانی دكەین هاریكار و پشتەڤان بن ،چونكە ئەم داخوازا كۆتا ئاینی دكەین نەیا نەتەوەیی چونكە وەكو نەتەوە ئەم كوردین و شانازیێ ب كوردبوونا خوە دبەین لێ قەدەرێ وەل مەكریە كو 60% ئێزدی سەر ب پارێزگەها نەینەوا ڤە بن».

ئەڤرۆ

سەرۆكێ حوكمەتا هەرێما كوردستانێ، مەسرور بارزانی پێشوازی ل شاندەكێ جڤاتا پیرێن ئەمریكی كر و تێدا سەرۆكێ حوكمەتێ دووپاتكر هیچ بەهانەیەك نینە بۆ پاشئێخستنا هەلبژارتنێن پەرلەمانێ كوردستانێ.
د كۆمبوونێ دا، پێشڤەبرنا پەیوەندیێن هەرێما كوردستانێ ل گەل ئەمریكا و گرنگیا چارەسەركرنا كێشەیێن هەرێما كوردستانێ و حوكمەتا فیدرال ل سەر بنەمایێ دەستووری هاتە باسكرن.
تەوەرەكێ سەرەكی یێ كۆمبوونێ، تایبەت بوو ب چاكسازیێن كابینەیا نەهێ یا حوكمەتا هەرێمێ، ب تایبەتی چاكسازیێن وەزارەتا پێشمەرگەی و هەمەجۆركرنا ژێدەرێن داهاتی و ب دیجیتالكرنا خزمەتگوزاریێن گشتی و پێشڤەبرنا كەرتێ چاندنێ و هنارتنا بەرهەمێ ناڤخوەیی بۆ بازارێن ژ دەرڤە.
د پشكەكا دی یا كۆمبوونێ دا، دانوستاندن ل دۆر گرنگیا ئەنجامدانا هەلبژارتنێن پەرلەمانێ كوردستانێ هاتە كرن. سەرۆكێ حوكمەتا هەرێما كوردستانێ دووپاتكر، كو هیچ بەهانەیەك نینە بۆ پاشئێخستنا پرۆسەیا هەلبژارتنان و پێدڤیە دئەڤ سالەدا بهێنە كرن، حوكمەتا هەرێما كوردستانێ ژی، هەموو ئاسانكاری و بەرهەڤیەكێ بۆ ئەنجامدانا هەلبژارتنان دكەت.

ئەڤرۆ

سەرۆكێ هەرێما كوردستانێ ل ڕۆژا جیهانی یا زمانێ دایك دووپاتیێ ل پاراستن و پێشڤەبرنا زمانێ كوردی دكەت و دبێژیت: سلاڤ ل قەلەمێن خزمەتا زمانێ كوردی دكەن.
ڕۆژا سێشەمبی 21/2/2023 كو هەڤدەمە ل گەل ڕۆژا جیهانی یا زمانێ دایك، نێچیرڤان بارزانی، سەرۆكێ هەرێما كوردستانێ ل پێگەهێ خوە یێ تایبەت ل سەر تۆرا جڤاكی یا تویتەری نڤیسی» ل ڕۆژا جیهانی یا زمانێ دایك، دووپاتیێ ل پاراستن و پێشڤەبرنا زمانێ شیرین یێ كوردی و هەموو زمان و زاراڤێن كوردستانێ دكەین».
سەرۆكێ هەرێما كوردستانێ د پشكەكا دی یا نڤیسینا خوە دا دا دبێژیت» سلاڤ ل وان قەلەمێن خزمەتا زمانێ دایك و ل ئەوێن فرەزمانی و فرەكەلتووریا كوردستانێ دپارێزن و كاری بۆ پێكڤەژیانێ دكەن».
ڕۆژا 21/ 2 ل هەموو سالان ڕۆژا جیهانی یا زمانێ دایكە و هەموو گەلێن جیهانێ ب چالاكیێن جۆرا و جۆر وێ ڕۆژێ بلند ڕادگرنز ل جیهانێ شەش هزار زمان یێن هەین، بەلێ پتریا وان مەترسیا ژناڤچوونێ ل سەرە و پتریا جیهانێ ب 100 زمانان د ئاخڤن، زمانێ كوردی ژی ل پلەیا 59 یا زمانێن جیهانی دایە.

ئەڤرۆ

پسپۆرەكێ پەیوەندیێن نێڤدەولەتی ڕاگەهاند، پێشوازیا سەركردە و سەرۆكێن وەلاتان ل كونفرانسێن نێڤدەولەتی وەكو كۆربەندێ داڤۆس و كونفرانسێ ئاسایشێ ل میونشن و كونفرانسێ جیهانی یێ حوكمەتان ل دوبەی و ل گەلەك جهێن دی ژی، ئەو پێشوازیێ ل سەركردەیێن هەرێما كوردستانێ وەكو هەرێمەكا قانوونی و ئەكتەرەكێ نێڤدەولەتی یێ نەدەولەت مامەلێ ل گەل نوونەرایەتیا هەرێما كوردستانێ ل وان كۆنفرانسان دكەن.
د. هەوار نێروەیی، پسپۆرێ پەیوەندیێن نێڤدەولەتی گوت» دیارە ئەم نەشێین بێژین وەكو نوونەرێن دەولەتا سەربخوە مامەلە دگەلدا دهێتە كرن ژ ئالیێ سەرۆكێن وەلاتان ڤە، بەلێ وان پێشوازیان شێوەیەكێ دەستووری یێ نێڤدەولەتی هەیە كو ل مادێ 117 د دەستوورێ ئیراقێ دا ڕەنگڤەدایە و ل سەر بنەمایێ ڤێ مادەیا دەستوورێ ئیراقێ سەركردەیێن وەلاتان مامەلا ڕاستەوخوە ل گەل سەركردەیێن هەرێما كوردستانێ هەیە كو ل سەر بنەمایێ سەروەری و سیادەیا ناڤخوەیە ب گۆرەی دەستووری و ل سەر ئاستێ نێڤدەولەتی ژی كیانێ هەرێما كوردستانێ كیانەكێ فەرمیە، ئانكو مە بڤێت یان نەڤێت قەوارەیێ سیاسی یێ هەرێما كوردستانێ دێ یێ پاراستی بیت و بەردەوام ژی دێ هێتە پاراستن ژ ڕوویێ نێڤدەولەتی ڤە و مە ب دەهان ڕێككەفتنێن نێڤدەولەتی یێن هەین، وەكو هەرێما كوردستانێ ب گۆرەی دەستووری ل گەل توركیا و وەلاتێن دی، ژ بەر ڤێ چەندێ ئەڤ قەوارەیە یێ دانپێدانكریە ژ ڕوویێ نێڤدەولەتی ڤە و ژ ئالیێ UN ڤە ل دووڤ بڕیارا 688 حەسانە یا هەی، ئانكو نە ب ئاخڤتنایە هەر كەسێ حەزبكەت ل سەر باخڤیت».
د. هەوار دبێژیت» ژ ڕوویێ پێگەهی ژی ڤە هەرێما كوردستانێ پێگەهەكێ ب هێز هەیە ل سەر ئاستێ نێڤدەولەتی و سەركردایەتیا هەرێما كوردستانێ هەموو دەمان بزاڤكریە ژ بلی پاراستنا ڤێ هەرێمێ، پێگەهێ وێ ژی پێشڤە ببەت».
زێدەتر گوت» دیارە د سیاسەتێ دا بەرژەوەندی یا گرنگە، ئانكو مە چەند شیایە بەرژەوەندیێن نێڤدەولەتی د ناڤ هەرێما كوردستانێ دا بپارێزین؟ دیارە مە ئەو چەندە یا ئەنجامدای، هەر ژ بابەتێ پاراستنا مافێن مرۆڤی تاكو پرسا پەنابەر و ئاوارەیان، پێكڤەژیانا ئایینی و مەزهەبی ل كوردستانێ، ئەو هەموو ئامرازێن سیاسی نە كو حوكمەتا هەرێما كوردستانێ گرنگی پێ داین و جڤاكێ نێڤدەولەتی ژی ئەڤ پرسە ب گرنگە وەرگرتینە و پشتەڤانی كریە كو هەرێما كوردستانێ ل سەر ڤی ڕێكێ بچیت، لەوما هەرێما كوردستانێ بۆ پاراستنا دیموكراسیێ و بهایێن دیموكراسی بزاڤێن مەزن كرینە، ب تایبەتی د پرسا مافێن مرۆڤی دا، ڕاستە ڕەخنە هەیە و بۆچوونێن جودا یێن هەین، بەلێ ل گەل ڤێ چەندێ ژی هەرێما كوردستانێ گەشەیا باش ب خوەڤە دیتیە ژ ڕوویێ سیاسی و مرۆڤایەتی و بوارێن دی و دشیاندایە زێدەتر گەشە پێ بهێتە دان».

ئەڤرۆ

سەرۆكێ حوكمەتا هەرێما كوردستانێ و سەرۆكێ فرەنسا ل كۆچكا ئێلیزێ ل پاریس كۆمبوون و سەرەرای دووپاتكرنێ ل زێدەتر پێشڤەبرنا پەیوەندیان د ناڤبەرا پاریس و هەولێرێ دا، چاكسازیێن كابینەیا نەهێ یا حوكمەتا هەرێمێ تەوەرەكێ دی یێ كۆمبوونێ بوو، ب تایبەتی هنارتنا بەرهەمێ ناڤخوەیی یێ بۆ بازارێن ئۆرۆپا.
د كۆمبوونێ دا پێشڤەبرنا پەیوەندیێن دیرۆكی و دۆستانە د ناڤبەرا فرەنسا و هەرێما كوردستانێ و دووماهی گوهۆڕین و پێشهاتێن ڕەوشا گشتی یا ئیراقێ و دەڤەرێ هاتنە باسكرن.
تەوەرەكێ سەرەكی یێ كۆمبوونێ، تایبەت بوو ب چاكسازیێن كابینەیا نەهێ یا حوكمەتا هەرێما كوردستانێب تایبەتی د بوارێ هەمەجۆركرنا ئابووری، ژێدەرەێن داهاتی و گرنگیدان ب كەرتێ چاندنێ و هنارتنا بەرهەمێ ناڤخوەیی بۆ بازارێن دەرڤە ب تایبەت ئۆرۆپا.
سەرۆكێ حوكمەتا هەرێمێ سوپاسیا حوكمەت و گەلێ فرەنسا كر بۆ بەردەوامیا پشتەڤانیا وان ل هەرێما كوردستانێ، ب تایبەتی د ڕۆژێن دژوار دا فرەنسا بەردەوام پشتەڤانی ل گەلێ كوردستانێ كریە.
ژ ئالیێ خوەڤە، ماكرۆنی سلاڤ و ڕێزێن تایبەت بۆ سەرۆك مەسعود بارزانی هەبوون، بەرهەڤیا وەلاتێ خوە ژی بۆ بەردەوامبوونێ ل سەر پشتەڤانیا هەرێما كوردستانێ د هەموو بواراندا دەربری.
گرنگیا چارەسەركرنا كێشەیێن د ناڤبەرا هەرێما كوردستانێ و حوكمەتا فیدرالی ب شێوەیەكێ بنەرەتی ل سەر بنەمایێ دەستووری، پاراستنا ئاسایش و سەقامگیریا دەڤەرێ، تەوەرەكێ دی یێ دانوستاندنان بوو.
سەرۆكێ حوكمەتا هەرێما كوردستانێ پشتی كۆمبوونێ ل گەل سەرۆكێ فرەنسا ڕاگەهاند، ل گەل فرەنسا دێ زێدەتر پەیوەندیان بەر ب پێشڤە بەین ب تیابەتی د بوارێ بازرگانی و وەبەرئێنانێ دا.
مەسرور بارزانی، د پێگەهێ خوە یێ تایبەت دا ل سەر تۆرا جڤاكی یا تویتەری بەلاڤكر» خوەشحالبووم ل كۆچكا ئێلیزێ، ل گەل ئیمانوێل ماكرۆن كۆمبوویم».
د تویتا سەرۆكێ حوكمەتا هەرێما كوردستانێ دا هاتیە» ئەم پێكڤە هاریكار بووین د پاراستنا جیهانێ ژ تیرۆرستێن داعشێ، نوكە ژی دێ زێدەتر پەیوەندیێن خوە پێشڤەبەین ب تایبەتی دبوارێ بازرگانی و وەبەرئێنانێ دا».
مەسرور بارزانی د سەرەدانا خوە دا بۆ فرەنسا ل كەل ژیرار لارشێ سەرۆكێ جڤاتا پێرێن فرەنسا (سێنات)كۆمبوو. هەروەسا سەرەدانا سەرۆكایەتیا باژێرڤانیا پاریس كر و ژ ئالیێ ئان ئیدالگۆ سەرۆكا باژێرڤانیا پاریس پێشوازی لێ هاتە كرن.

دهۆك ، زنار تۆڤی:

 

بسپۆره‌كێ زانستێن سیاسی دبێژیت، گه‌له‌ك یا ب زه‌حمه‌ته‌ ل ژێر ده‌ستهه‌لاتا گرۆپێن میلیشیێن شیعی و هه‌بوونا ده‌وله‌ته‌كا پڕی ئالۆزی ل ئیراقێ، چ ئاریشه‌ ل گه‌ل به‌غدا بهێنه‌ چاره‌سه‌ركرن، هه‌روه‌سا هه‌كه‌ سه‌رۆك وه‌زیرێن ئیراقێ كه‌سه‌كێ میانڕه‌و ژی بیت، یان ژی نییه‌تا چاره‌سه‌ركرنا ئاریشه‌یان هه‌بیت، وه‌كو دیار پتریا هێزێن دناڤا چارچۆڤه‌یێ هه‌ماهه‌نگیێ دا سه‌ر ب ئیرانێ ڤه‌نه‌ و سیاسه‌تا ئیرانێ بجهـ دئینن، وان نه‌ڤێت ئه‌و ئاریشه‌یێن دناڤبه‌را به‌غدا و هه‌ولێرێ دا هه‌ین چاره‌سه‌ر بكه‌ن، دیسان ئه‌و  ڕێككه‌فتنا بۆ پێكئینانا حوكمه‌تا ئیراقێ ژی هاتیه‌ كرن پتر یا ته‌كتیكی بوویه‌، هه‌روه‌سا بۆ كورد و سووننه‌یان باشتر بوو ڕێككه‌فتنێ ل گه‌ل گرۆپێن چارچۆڤه‌یێ هه‌ماهه‌نگیێ نه‌كه‌ن، به‌لێ مخابن ئه‌و ڕێككه‌فتنه‌ هاته‌ كرن و نوكه‌ دادگه‌ها فیدرالی ل به‌رده‌ستێ وان دایه‌ و وه‌كو ئامرازه‌كێ كاریگه‌ر ل دژی كورد و سوننه‌یان ب كاردئینن و وه‌كو به‌هانه‌یه‌كێ ژی بكار دئینن بۆ خوه‌ ڤه‌دزینێ ژ پراكتیزه‌كرنا وان ڕێككه‌فتنێن به‌ری نوكه‌ هاتینه‌ كرن”.

د. نه‌وزاد هێتوتی، پسپۆرێ زانستێن سیاسی پتر گوت”پشتی هه‌لبژارتنێن 2021 ێ یێن ئیراقێ، چارچۆڤه‌یێ هه‌ماهه‌نگیێ دادگه‌ها فیدرالی ل دژی پرۆسه‌یا سیاسی، كورد و سه‌دریان بكارئینا و پرۆسه‌یا هه‌لبژاتنان ئیفلیج كر و وان ڕێ بۆ خوه‌ خوه‌شكر بۆ هندێ كو ئه‌و حوكمه‌تا نوو یا ئیراقێ پێكبینن، هه‌ر چه‌نده‌ كورد و سووننی دشیان حوكمه‌ت نه‌هێته‌ پێكئینان، به‌لێ كه‌فتنه‌ ژێر كاریگه‌ریا سۆزێن وان یێن بێ ناڤه‌رۆك، وه‌كو دیار هه‌تا نوكه‌ ژی ئێك خال ژ داخوازیێن كورد و سووننه‌یان نه‌هاتینه‌ بجهئینان، دڤێت چاڤه‌رێی هندێ بكه‌ین كو چاره‌نڤیسێ قانوونا په‌ترۆل و غازێ ژی كو بریار بوو دشه‌ش مه‌هان دا پشتی ده‌ست بكاربوونا حوكمه‌تا نوو ژ جڤاتا نوونه‌رێن ئیراقێ بهێته‌ ده‌ربازكرن، كو ب ده‌ردێ شایستێن دارایی یێن هه‌رێمێ كوردستانێ بچیت، چونكی وان بڕیارا دادگه‌هێ هه‌یه‌ و ب وێ به‌هانه‌یێ ئه‌و خوه‌ ژ ده‌ركرنا هه‌ر جۆره‌ قانوونه‌كێ ڤه‌دزن كو ل دژی بڕیارا دادگه‌ها ده‌ستووری بیت”.

دیاركر” نوكه‌ فشارێن مه‌زن ل سه‌ر سه‌رۆك وه‌زێرین ئیراقێ هه‌نه‌ ژ ئه‌گه‌رێ بلندبوونا بهایێ دۆلاری و دبیت ئه‌ڤه‌ ژی یاریه‌كا ئیرانێ و هێزێن شیعی بیت بۆ تێكهه‌لكرنا كارتان و ژناڤبرنا سه‌رنجان ل سه‌ر قه‌یرانێن داكه‌فتنا بهایێ دراڤێ ئیراقی، هه‌روه‌سا ئه‌مریكا دڤێت ئیراق خوه‌ ژ ئیرانێ دوور بكه‌ت و نه‌بیته‌ پشكه‌ك ژ سیاسه‌ت و ئه‌جندایێن ئیرانێ، دیسان د نوكه‌ دا ئه‌مریكا فشارێن خوه‌ ل سه‌ر حوكمه‌تا ئیراقێ پتر لێ كرینه‌، ژ پێخه‌مه‌ت نه‌هێلێت دۆلار ژ ئیراقێ بچیته‌ ئیرانێ، ئالیێن چارچۆڤه‌یێ هه‌ماهه‌نگیێ ژی ب تایبه‌ت یێن  توندره‌و ل گه‌ل هندێ نینن كو ئاریشه‌یان ل گه‌ل هه‌رێما كوردستانێ چاره‌سه‌ر بكه‌ن”.

ئه‌ڤرۆ:

د په‌یوه‌ندیه‌كا ته‌له‌فۆنی دا د ناڤبه‌را مه‌سرور بارزانی، سه‌رۆكێ حوكمه‌تا هه‌رێما كوردستانێ و برێت مه‌كگۆرك، هه‌ماهه‌نگكارێ كۆچكا سپی بۆ كاروبارێن ڕۆژهه‌لاتا ناڤین و باكوورێ ئه‌فریقیا، سه‌رۆكێ حوكمه‌تا هه‌رێمێ نیگه‌رانیا خوه‌ ژ بڕیارا دادگه‌ها فیدرالی یا ئیراقی یا تایبه‌ت ل ڕێگریكرنێ ل هنارتنا پاره‌ی بۆ هه‌رێما كوردستانێ ده‌ربری و دیاركر كو ئارمانج ژێ تێكدانا سه‌قایێ ئه‌رێنی و باشتركرنا په‌یوه‌ندیێن د ناڤبه‌را به‌غدا و هه‌ولێرێ یه‌ و مه‌به‌سته‌كا سیاسی یا ل پشت.

د وێ په‌یوه‌ندیا ته‌له‌فۆنی دا، برێت مه‌كگۆرك، باسێ سه‌ره‌دانا ڤێ دووماهیێ بۆ به‌غدا و هه‌ولێرێ و دانوستاندنێن سه‌باره‌ت گاڤێن داهاتی بۆ چاره‌سه‌ركرنا كێشه‌یێن د ناڤبه‌را هه‌رێما كوردستانێ و حوكمه‌تا فیدرال دا ل سه‌ر بودجه‌ی و پرسێن دی, هه‌روه‌سا دووپاتی ل گرنگیا ئێكڕێزیا ئالیێن كوردستانی و باشتركرنا په‌یوه‌ندیێن دناڤبه‌را پارتی دیموكراتی كوردستان و ئێكه‌تی نیشتمانی كوردستان كر.

هه‌ماهه‌نگكارێ كۆچكا سپی بۆ كاروبارێن ڕۆژهه‌لاتا ناڤین و باكوورێ ئه‌فریقیا، پشته‌ڤانیا وه‌لاتێ خوه‌ بۆ چاكسازیێن كابینه‌یا نه‌هێ ب تایبه‌تی چاكسازیێن وه‌زاره‌تا پێشمه‌رگه‌، هه‌روه‌سا پێشكه‌فتنێن كه‌رتێ وزێ و باشتركرنا ژێرخانه‌یا ئابووری و بزاڤێن به‌رهنگاربوونا گوهۆڕینا سه‌قی دووپاتكر.

هه‌ردو ئالی د هه‌ڤڕا بوون ل سه‌ر گرنگیا نه‌هێلانا هه‌موو ئاسته‌نگێن ل به‌رده‌م گه‌شه‌پێدانا كه‌رتێ وزێ و وه‌به‌رئێنانا زێده‌تر یا كۆمپانیێن ئه‌مریكی ل هه‌رێما كوردستانێ، هه‌روه‌سا د هه‌ڤڕا بوون ل سه‌ر وێ چه‌ندێ كو د په‌یوه‌ندیا به‌رده‌وام دا بن.

ئه‌ڤرۆ:

دوهی ئێكشه‌مبی 22 كانوونا دویێ 2023 ل سه‌لاحه‌دین سه‌رۆك مه‌سعود بارزانی پێشوازی ل (ئیریك شۆڤالیێ) بالیۆزێ فره‌نسا ل ئیراقێ و (مارتن بێگه‌ر) بالیوزێ ئه‌لمانیا ل ئیراقێ كر.

ل ده‌ستپێكا كۆمبوونێ بالیۆزێن هه‌ردو وه‌لاتان ئه‌و چه‌نده‌ به‌رچاڤكر كو فره‌نسا و ئه‌لمانیا ب هه‌ڤپشكی ل گه‌ل هه‌ڤدو گرنگیێ ب بابه‌تێن نێڤده‌وله‌تی یێن گرنگ دده‌ن ب تایبه‌ت ڕه‌وشا ئیراقێ و هه‌رێما كوردستانێ و ل ده‌ف هه‌ردو وه‌لاتان سه‌قامگیری و ڤه‌ژاندنا هه‌رێما كوردستانێ گرنگیه‌كا تایبه‌ت هه‌یه‌، هه‌روه‌سا ئه‌وژی ب سه‌رۆك بارزانی گه‌هاند كو فره‌نسا و ئه‌لمانیا ل به‌ره‌ سه‌نته‌ره‌كێ هه‌ڤپشك یێ كه‌لتووری ل كه‌لا هه‌ولێرێ دابمه‌زرینن، ئه‌وژی ب مه‌به‌ستا پێشئێخستنا په‌یوه‌ندیێن كه‌لتووری و زانستی و مللی دناڤبه‌را هه‌رێما كوردستانێ و هه‌ردو وه‌لاتێن ئه‌لمانیا و فره‌نسا دا.

هه‌ر د وێ كۆمبوونێ دا سه‌رۆك بارزانی خوه‌شحالیا خوه‌ ڕاگه‌هاند ب هه‌ماهه‌نگی و هه‌ڤپشكیێ دناڤبه‌را ئه‌لمانیا و فره‌نسا ل دۆر بابه‌تێن نێڤده‌وله‌تی و ب بابه‌ته‌كێ گرنگ و كاریگه‌ر هه‌ژمارت، سه‌رۆك بارزانی پێزانین بۆ بڕیارا ئه‌لمانیا هه‌بوو د جینۆساید نیاسینا كۆمكوژیا شنگالێ و ب گاڤه‌كا گرنگ و دیرۆكی زانی و داخوازكر ژ پێخه‌مه‌ت داده‌په‌روه‌ریێ و سڤككرنا برینێن خوشك و برایێن ئێزدی وه‌لاتێن دی یێن ئێكه‌تیا ئه‌وروپا ژی بڕیاره‌كا هه‌ڤشێوه‌یێ وێ بده‌ن.

هه‌ر د وێ دیدارێ دا ڕه‌وشا سیاسی یا ده‌ڤه‌رێ و دووماهی پێشهاتێن ناڤ پرۆسه‌یا سیاسی یا ئیراقێ هاتنه‌ باسكرن و گرێدای په‌یوه‌ندیێن د ناڤبه‌را هه‌رێما كوردستانێ و حوكمه‌تا فیدرالی یا ئیراقێ دا شاندێ مێهڤان خوه‌شحالیا خوه‌ نیشاندا ب وی سه‌قایێ ئه‌رێنی د په‌یوه‌ندیێن دناڤبه‌را هه‌رێمێ و حوكمه‌تا فیدرال دا و ب ده‌لیڤه‌یه‌ك زانی بۆ چاره‌سه‌ركرنا گرفتێن دناڤبه‌را به‌غدا و هه‌ولێرێ دا.

ڕه‌وشا سیاسی یا هه‌رێما كوردستانێ ته‌وه‌ره‌كێ دی یێ وێ دیدارێ بوو و شاندێ مێهڤان دووپاتكر كو فره‌نسا و ئه‌لمانیا دێ به‌رده‌وام بن ل سه‌ر پشته‌ڤانیێ و هه‌ڤپشكیێ و هه‌ماهه‌نگیێ ل گه‌ل هه‌رێما كوردستانێ.

ئه‌ڤرۆ:

د چارچۆڤه‌یێ پشكداریێ د كۆڕبه‌ندێ جیهانی یێ ئابوروی ل داڤۆس ل سویسرا، مه‌سرور بارزانی سه‌رۆكێ حوكمه‌تا هه‌رێما كوردستانێ كوردستانێ چه‌ندین كۆمبوون ل گه‌ل سه‌ركرده‌ و به‌رپرسێن بلند یێن وه‌لاتان گرێدان. د كۆمبوونا ل گه‌ل ئه‌لیكسه‌نده‌ر دیكروو، سه‌رۆك وه‌زیرێن به‌لجیكا، هاریكاری و هه‌ماهه‌نگی ب تایبه‌تی د بوارێ ئالۆگۆریا بازرگانی و هنارتنا به‌رهه‌مێن چاندنێ یێن كوردستانێ بۆ بازارێن به‌لجیكا و ئه‌وروبا ب گشتی هاته‌ باسكرن.

سه‌رۆكێ حوكمه‌تا هه‌رێما كوردستانێ ل داڤۆس ل گه‌ل مارك ڕووته‌ سه‌رۆك وه‌زیرێن هوله‌ندا ژی كۆمبوو و سوپاسیا هوله‌ندا كر بۆ هه‌ماهه‌نگیا به‌رده‌وام ل گه‌ل هه‌رێمێ كو ئێك ژ وان وه‌لاتانه‌ یێن پشته‌ڤانیا حوكمه‌تا هه‌رێمێ دكه‌ن، ب تایبه‌تی دبوارێ هه‌مه‌جۆركرنا ئابووری و پێشڤه‌برنا كه‌رتێ چاندنێ.

مه‌سرور بارزانی ل گه‌ل تونی بلێر سه‌رۆك وه‌زیرێن بریتانی یێ پێشتر كۆمبوو و تێدا دانوستاندن ل دۆر چاكسازیێن كابینه‌یا نه‌هێ یا حوكمه‌تا هه‌رێمێ و هنارتنا به‌رهه‌مێن چاندنێ یێن كوردستانێ بۆ بازارێن ئه‌ورۆپا هاته‌ كرن.

هه‌ر د چارچۆڤه‌یێ كۆڕبه‌ندێ ئابووری یێ جیهانی ل داڤۆس سه‌رۆكێ حوكمه‌تا هه‌رێما كوردستانێ ل گه‌ل شاه فیلیب شاهێ به‌لجیكا كۆمبوو و باس ل گوهۆڕین و پێشهاتێن ئیراقێ و هه‌رێمێ و چاكسازیێ كابینه‌یا نه‌هێ هاته‌ كرن ب تایبه‌تی د بوارێ پێشڤه‌برنا وه‌به‌رئێنانێ و گرنگیدان ب كه‌رتێ چاندنێ و هنارتنا به‌رهه‌مێن چاندنێ یێن كوردستانێ بۆ بازارێن ئه‌وروپا. هه‌ر د چارچۆڤه‌یێ دیدارێن خوه‌ دا سه‌رۆكێ حوكمه‌تا هه‌رێمێ ل گه‌ل به‌شر ئه‌لخه‌ساونه‌ سه‌رۆك وه‌زیرێن ئوردن كۆمبوو و تێدا باس ل زێده‌تر پێشڤه‌برنا په‌یوه‌ندیێن دیرۆكی د ناڤبه‌را ئوردن و هه‌رێما كوردستانێ هاته‌ كرن و مه‌سرور بارزانی ڕێز و پێزانین هه‌بوون بۆ بزاڤ و كاركرنا شاه عه‌بدوللایێ دویێ شاهێ ئوردن ژ پێخه‌مه‌ت سه‌قامگیریا ئیراقێ و هه‌رێما كوردستانێ.

هه‌روه‌سا مه‌سرور بارزانی ل گه‌ل دارێل عیسا ئه‌ندامێ كۆنگرێسێ ئه‌مریكی و ئیگلیس له‌ڤیتس، سه‌رۆكێ لاتڤیا، كریاكۆس میتسۆتاكیس سه‌رۆك وه‌زیرێن یونان،كلاوس شواب سه‌رۆكێ كۆربه‌ندێ ئابووری یێ جیهانی ل داڤۆس، بیلاوال بۆتۆ وه‌زیرێ ده‌رڤه‌یێ پاكستان و چه‌ندین وه‌زیرێن ئه‌ورۆپی و سیناتۆرێن ئه‌مریكی و سه‌رۆكێن كۆمپانیێن جیهانی ژی كۆمبوو.

سه‌رۆكێ حوكمه‌تا هه‌رێما كوردستانێ ل گه‌ل هه‌ر ئێك ژ خالد ئه‌لفالح وه‌زیرێ وه‌به‌رئێنانێ یێ سعودی و سه‌عید بن محه‌مه‌د ئه‌لسه‌قری وه‌زیرێ ئابوروی یێ عومان و عادل فخرۆ وه‌زیرێ پیشه‌سازی و بازرگانی یێ به‌حرێن كۆمبوو و سه‌رۆكێ حوكمه‌تا هه‌رێمێ ل گه‌ل تویته‌كی دا كورته‌ ڤیدیۆیه‌ك ژ وان دیداران به‌لاڤكر و تێدا ئاماژه‌ ب وێ چه‌ندێ دا” مه‌ په‌یوه‌ندیه‌كا ب هێز ل گه‌ل وه‌لاتێن كه‌نداڤی هه‌یه‌ و مه‌ هه‌ماهه‌نگی بۆ دابینكرنا پێدڤیێن ئاسایشا خۆراكی یا هه‌ی و ل كه‌رتێ بانكی و ته‌كنه‌لۆژیا ئابووری، مه‌ هاریكاری ده‌ستپێكریه‌”.

ئه‌ڤرۆ:

دوهی ئێكشه‌مبی 15 كانوونا دویێ 2023، مه‌سرور بارزانی سه‌رۆكێ حوكمه‌تا هه‌رێما كوردستانێ، پێشوازی ل جه‌نه‌رال ماتیۆ ماكفه‌رلین، فه‌رمانده‌یێ گشتیێ هێزێن هه‌ڤپه‌یمان ل ئیراقێ و سووریێ كر.

د كۆمبوونه‌كێ دا، دووماهی پێشهات و گۆرانكاریێن ئیراقێ و ده‌ڤه‌رێ و به‌رده‌وامبوونا پشته‌ڤانیكرنا هێزا پێشمه‌رگه‌ی ل به‌رهنگاربوونا تیرۆرێ و گه‌فێن تیرۆرستێن داعشێ و گرنگیا پاراستنا ئاسایشا سنووران هاته‌ باسكرن.

فه‌رمانده‌یێ گشتیێ هێزێن هه‌ڤپه‌یمان ل ئیراقێ و سووریێ، ئاماژه‌ ب پێشڤه‌چوونا هاریكاری و هه‌ماهه‌نگیا ئه‌منی د ناڤبه‌را پێشمه‌رگه‌ی و له‌شكرێ ئیراقێ كر دڕوو ب ڕووبوونا تیرۆرێ بتایبه‌تی ل سالا بۆری و دووپاتی ل گرنگیا پێشڤه‌برنێ ب وێ هه‌ماهه‌نگیێ كر ب ئاراسته‌یا پڕكرنا ڤالاهیا ئه‌منی ل ده‌ڤه‌رێن ماده‌یێ 140 یێ دستووری.

سه‌رۆكێ حوكمه‌تا هه‌رێما كوردستانێ سوپاسیا هاریكاری و پشته‌ڤانیا به‌رده‌وام یا ئه‌مریكا و هێزێن هه‌ڤپه‌یمان ل پێشمه‌رگه‌ی كر د شه‌ڕێ دژی تیرۆرێ و چاكسازیێن وه‌زاره‌تا پێشمه‌رگه‌ی، هه‌روه‌سا كورتیه‌ك ده‌رباه‌ری ئه‌نجامێن سه‌ره‌دانا شاندێ بلند یێ حوكمه‌تا هه‌رێما كوردستانێ بۆ به‌غدا و كۆمبوون ل گه‌ل سه‌رۆك وه‌زیرێن ئیراقێ، ب تایبه‌تی پێشڤه‌برنا هاریكاری و هه‌ماهه‌نگیا ئه‌منی د ناڤبه‌را پێشمه‌رگه‌ی و له‌شكرێ ئیراقێ دا به‌رچاڤكر.

website security
WP Facebook Auto Publish Powered By : XYZScripts.com