ل سەر پێلێن بێ ئۆمێدیێ
هاشم مزیری
د ڤێ مەیدانێ دا،
کو سیبەرێن بێ داد د بن پێیان دا دچن،
ئەسمانێ هیڤیان یێ دابەستی یە ب ئەورێن ڕەش.
ل وێرێ،
دادپەروەری وەک کانییەکا وشک بووی
ل سەر دەستێن مێژوویەکا تژی ژکول
دمریت.
ئەز و پەیڤێن من یێن شەکەت،
د ناڤ زیندانێن بێ باوەریێ دا
ل دووڤ رێیەکا نەدیار دگەڕین.
ژیان ل بەر دەرگەهێن داخستی یێن قەدەرێ
بوویە غەریبەکێ دەرپەڕاندی،
کو هەر چ پەیڤەک دبنە تۆز
و دکەڤنە د گۆڕێن بێ دەنگیێ دا.
چەند دژوارە؛
مرۆڤ پێنگاڤێن خۆ ل سەر ئەردەکێ
پڕی ئێش دابنیت،
دەمێ یاسا دبنە تەم،
و باوەری د باژێرێ بێ داد دا
هەردەم دبنە قوربانیێن
دەستێن پڕی خوین یێن نەخۆشیێن جڤاکی.
د ڤێ ژینگەها بێ ڕۆناهی دا،
مرۆڤی بتنێ دیتن،
هەمی رێک ب ئاگرێ غەدرێ هاتینە سۆتن،
و کێلێن گۆڕێن ئۆمێدێ،
ل سەر رێکا هەر کاروانەکێ
دڤێت بگەهیتە ئارمانجێ
هاتینە چاندن.
ئەم د ڤێ ساریا مەزن دا دمینین،
دگەل شەڤەکا هێشتا بدووماهی نەهاتی،
و گۆتارێن مە ژی،
بوونە ئەفسانەکا د ناڤ دەستێن بێ باوەریێ دا
هاتیە ژێبرن..
هێدی هێدی،
دبیتە پەیڤەکا بێ ناڤ و نیشان،
د دلێ ڤی باژێرێ بێ داد دا،
دبنە تۆز،
دبنە نەهاتن.
