ل ڤى گوندى ره‌زه‌كێ زه‌یتوونان يێ هه‌ى و خودانێ راسته‌قينه يێ ديار نينه
ئه‌ڤرۆ نیوز، نه‌وزاد هلۆرى:
ره‌زه‌كێ زه‌یتوون كو نێزیكێ 500 بنه‌دارێن زه‌یتوونان تێدا يێن هه‌ين و دكه‌ڤیته گوندێ میرداڤیا ل ناحیا دینارته، ژبه‌ركو ئه‌و ره‌ز یێ كه‌ڤنه، خودانێ راسته‌قینه‌یێ وى يێ دیار نینه و نوكه چار بنه‌مالێن گوندى پێكڤه سالانه وان زه‌یتوونان دچنن و تنێ وان مافێ چنینا وان زه‌یتوونان يێ هه‌ى.
عه‌كان عه‌بدولسه‌لام، وه‌لاتيه‌كێ گوندێ ناڤبرى یه بۆ ئه‌ڤرۆ نیوز گۆت: (ل گوندێ مه ره‌زه‌كێ زه‌یتوونان یێ كه‌ڤنار هه‌یه و نێزیكێ 500 بنه‌دارێن زه‌یتوونان تێدانه، به‌لێ ژبه‌ركو كه‌س نزانیت خودانێ وان یێ راسته‌قینه كى یه؟ نوكه چار بنه‌مال سالانه پێكڤه دچن بو چنینا زه‌یتوونێن وى ره‌زى).
زێده‌تر گۆت: (پشكه‌ك ژ وه‌لاتیان زه‌یتوونان بۆ خوه دچنن، دكه‌ن ترشى، ب ساده‌یى دخون، پشكه‌ك ژى دكه‌ن زه‌یت، زه‌یتا وان ئێكه ژ خوشترین زه‌یتان و تام و خوه‌شيه‌كا تایبه‌ت يا هه‌ى ب تایبه‌تى زه‌یتوونێن ره‌ش).
ل دۆر چا‌وانیا دروستكرنا زه‌یتا زه‌یتونان ل وى گوندى، ناڤبرى گۆت: (هه‌ر چه‌نده چێكرنا زه‌یتوونان كاره‌كێ ب زه‌حمه‌ت و ماندووبوونه، به‌لێ وه‌كو نه‌ریته‌كێ سالانه، خه‌لكێ گوندى زه‌یتونێن خوه دكه‌ن زه‌یت، ده‌ستپێكێ دێ زه‌یتوونان ئینین و ب چه‌قوكێ كه‌ر كه‌ین و پاشى كه‌ینه دناڤ ئاڤا خوێ دا، بۆ ده‌مێ هه‌یڤه‌كێ هێلينه د ئاڤێ دا، داكو ئه‌و خوێ بچيته دناڤ زه‌یتونێ دا، هه‌موو هه‌فتیان جاره‌كێ ئاڤا وێ دێ هێته گوهۆرین، پاشى دێ زه‌یتونێن ره‌ش ل گه‌ل یێن زه‌ر هێنه ژێكگرتن ژبه‌ركو زه‌یتووتا ره‌ش زوو ئاڤا خوێ ڤه‌دخوت، به‌لێ یا زه‌ر پێدڤیه ده‌مه‌كێ زێده‌تر د ناڤ دا بمینیت، پاشى ب رێیا ئامیره‌كێ تایبه‌ت زه‌یتوون دێ هێنه هووركرن ودێ بیته زه‌یت و زه‌یت ژ زه‌یتوونان دێ هێته جوداكرن و كه‌نه د ئامانه‌كێ تایبه‌ت دا).
دیاركر ژى كو دارێن زه‌یتوونێن گوندێ میرداڤیا هند دمه‌زنن كێم كه‌س دشێن وان زه‌یتوونان ژێڤه بكه‌ن، ژبه‌رڤێ پشكه‌ك ژ خه‌لكى دچنه سه‌ر دارێن زه‌یتوونان و پشكه‌ك ژى ل خوارێ زه‌یتوونان كوم دكه‌ن و زێده‌تر گۆت: (ژ ئه‌گه‌را نه‌بوونا پشته‌ڤانیێ بۆ جوتیاران، هه‌تا نوكه ئه‌و ره‌ز وه‌كو خوه مایه و نه‌هاتیه زێده‌كرن، هه‌كه لایه‌نێن شوله‌ژێ هه‌ڤكاریا جوتیار و خه‌لكێ گوندى بكه‌ن، دێ زێده‌تر زه‌یتوون هێنه چاندن، ژبه‌ركو گوندێ مه ئاخه‌كا باش بۆ چاندنا زه‌یتوونان يا هه‌ى).
