ل کانی سپیێ مەزنترین دەڤەرا پیشەسازیا کەرەستێن خوارنێ دێ ھێتە دانان
ئەڤرۆ نیوز، ئەمیر ئەترووشی:
سەرۆکێ ژوورا بازرگانی و پیشەسازیا دھۆکێ راگەھاند، ل دەستپێکا سالا بھێت یا 2019، دێ دەست ب چێکرنا مەزنترین دەڤەرا پیشەسازیا کەرەستێن خوارنێ ل کانی سپیێ ل گۆندێ دلبێ یێ سەر ب قەزا سێمێلێ ڤە ھێتە کرن.
ئەیاد حەسەن، سەرۆکێ ژوورا بازرگانی و پیشەسازیا دھۆکێ بۆ ئەڤرۆ نیوز دیار کر کو ئەڤ دەڤەرا پیشەسازی دێ ژ ئالیێ کۆمپانیەکا خۆمالی ڤە ل سەر رووبەرێ ٤٥٠ دونەمێن ئەردی ھێتە چێکرن و ئەڤ پرۆژە چەندین بنگەھێن خزمەتگۆزاری بخوەڤەدگریت و پشتی ب دووماھی دھێت، دێ حوکمەتا ھەرێما کوردستانێ ڤی پرۆژەی ب رێڤە بەت و گۆت: “ئەڤ پرۆژە دکەڤیتە کانی سپیێ ل سەر رێیا سەرەکی یا دھۆک بۆ زاخۆ”.
ناڤھاتی ئاماژە دا وێ چەندێ کو ئەڤ پرۆژە دێ خزمەتەکا مەزن بۆ جۆتیارێن دەڤەرێ کەت و جۆتیار دێ شێن ھەموو دەرامەتێن خۆراکی ل کۆگەھێن ڤێ دەڤەرێ پارێزن و عمبارکەن و دێ ب رێیەکا سەردەمیانە خزمەتا ھەموو بازرگان و جۆتیارێن دەڤەرێ کەت.
