مارەکرنا ژن برایێ چەندا دروستە د جڤاکێ مە دا؟
ئەڤرۆ نیوز:
ژن برا ئێک ژ کەسانێن نێزیکە ژ بۆ مرۆڤی د خێزانێ دا ل رێزا خووشکێ دھێت ھندی برا یێ ساخ، لێ دەما نەمینت بۆ مرۆڤێ موسلمان حەلالە و دروستە مارە بکەت چۆنکو ئایینێ ئیسلامێ ئەڤ جەندە حەلال کریە، ئایا ئەڤ دیاردە د ئاینێن دی ژی دا وەکو ئیسلامێ حلال کریە یان جوداھیەک ھەیە؟
رۆژنامەڤان و مامۆستا نەھلە موبارەک بۆ ئەڤرۆ دیارکر کو ھەر جڤاکەک خودان کلتورێ خوەیە و گۆت: جڤاکێ مەژی گەلەک گرنگیێ ب داب و نەریت و عەشیرەتگەریێ ددەت ئەڤجا بو ھەر کێشەکا جڤاکی کچ و ژن دبنە قوربان، گۆتژی مارەکرنا ژن برایێ دیاردەکا نە جوانە چۆنکو ئەگەر ل دیروکێ بنێرین دێ بینین گەلەک مال تووشی ئاریشا بووینە ژ ئەگەرێ ڤێ دیاردێ ئەڤجا گەلەکا گرنگە بریار دڤی حالەتێ دا بۆ ژنێ بمینیت،بەلێ دەمێ ژنێ زارۆ ھەبن دبیت کەس بۆ خوە نەبەت یان ھەکە ئێک ببەت ژی دبیت قایل نەبیت زارۆیێن وێ ب خودان بکەت ژبەر ڤێ جەمێ یا باش ئەوە تیێ وێ مارە بکەت ژبەر خودانکرنا زارۆیان، لێ ئەڤە ژی ب رازەمەندیا ژنکێ بت نە ب زۆری.
حکمەت یونان جەجو مەسیحیەکە دبێژیت: د ئایینێ مەدا ئەڤ چەندە ب گونەە دھێتە زانین، کەنیسێ یاسایێن خوە ھەنە و ل دووڤ ڤان یاسایان مرۆڤ ھاتینە دابەشکرن ل دووڤ پلەیان، پلە ئێک دایک و باب، پلە دوو خووشک و برا، خالەت و مەت و ژن برا و ژن خال و ژن مام.
زێدەتر گۆت: ئەڤ ھەر سێ پلە ھاتینە قەدەغەکرن کو ھەڤژینی یێ ل گەل وان پێک بینین،ل دوووڤ پێزانینێن من پەرتووکا موقەدەس د دوو قوناغان دا تێپەریە، قوناغا کەڤن چ تشت قەدەغە نەبوو زەلام د شیا ھەڤژینیێ ل گەل ھەر کەسەکێ ڤیابا پێک بینت خوە کچا وی ژی با، قوناغا نوو و پشتی ھاتنا موسا پێغەمبەر ئەڤا ھەنێ قەدەغە بوو و ھەتا نوکە.
ھەکار بھاری ژ شاریا ئاشکرا دکەت کو د ئایینێ ئێزدیاتیێ دا ڤێ چەندێ حەرام دکەن ھەڤژینی ل گەل (ژن برا) یێ قەدەغە و حەرامە، حەلال بوونا ڤێ چەندێ دێ بتە ئەگەرێ پەیدابوونا ئاریشێن کومەلایەتی، تێکەل بوونا خوینا ژن برای ل گەل برای بوویە ئەگەر کو ئەڤ چەندە لنک مە حەرام و نەیا دروست بت، گۆتژی دەمێ برا دمرت ژن برا ئازادە بمینت سەر زارۆیێن خوە یان نەروینت، ھەکە نە رونشت دڤێت زارۆیێن خوە بھێلت و شوو ب کەسەکێ دوور ژ ئوڵێ زەلامێ خوە بکەت ژبەر شەرما جڤاکێ خێزانا زەلامێ وێ و ھەکە رونشت وەک ئەندامەکا خێزانێ سەرەدەری ل گەل دھێتەکرن و تی یێت وێ ھاریکاریا وێ دکەن بۆ ژیارا وان یا رۆژانە و خودانکرنا زاروکێن وێ.
