ماكگورك گه‌هشته عيراقێ
ئه‌ڤرۆنيۆز:
هنارتيێ تايبه‌ت يێ سه‌رۆكێ ئه‌مريكى ل هه‌ڤپه‌يمانيا نێڤده‌وله‌تيا دژى داعشێ گه‌هشته عيراقێ.
ماكگوركى ل به‌رپه‌رێ خوه ل سه‌ر تويته‌رى به‌لاڤكر، سه‌ره‌دانا من عيراقێ ب مه‌ره‌ما ئاگه‌هداربوونێ يه ل سه‌ر دووماهى قۆناغێن ئۆپه‌راسيۆنا شكاندنا داعشێ وب هێزكرنا پرۆسا سه‌قامگێريێ ل عيراقێ.
ناڤبرى ئاماژه دا كو دێ وان پرسان ل گه‌ل حه‌يده‌ر عه‌بادى سه‌رۆك وه‌زيرێن عيراقێ وسه‌ركردێن دى يێن وى وه‌لاتى ژى به‌حس كه‌ت.
ماكگورك به‌رى بهێته عيراقێ، ل گه‌ل نوونه‌رێن وه‌لاتێن ئه‌ندام دهه‌ڤپه‌يمانيا نێڤدوله‌تى دژى داعشێ ل ئوردن كۆمبوويه.
ل دووڤ به‌ياننامه‌كا وه‌زاره‌تا ده‌رڤه‌يا ئه‌مريكا، ماكگوركى دوێ كۆمبوونێ دا دياركريه كو زێده‌تر ژ 7 مليون و 500 هزار كه‌س ل سه‌ر وێ ئاخا به‌رى نوكه دده‌ستێ داعشێ دا يێن هاتينه ئازادكرن و دومليۆن و 600 هزار وه‌لاتيێن عيراقى يێن هاتينه مال و جهێن خوه يێن ره‌سه‌ن وداعش نه‌شيايه ئێك مترا چارگۆشه ژ وێ ئاخێ كونترۆل بكه‌ت كو پێشتر ده‌ست ب سه‌ردا گرتبوو.
خوياكر ژى، چوونا چه‌كدارێن بيانى بۆ سووريێ يا ب دووماهى هاتى وداعش 95% ژ ئاخا كونترۆلكرى ل عيراقێ وسووريێ يا ژده‌ستداى.
