ماموستا سوبه چاڤه‌رێ بن، نێچيرڤان بارزانى دێ ل گه‌ل كۆم بيت
ئه‌ڤرۆ نيوز، ره‌وان نهێلى:
ب مه‌ره‌ما ئه‌نجامدانا دانوستاندنان ل دۆر وان بريارێن كو لقێن ئێكه‌تيا ماموستايان ل چه‌ند ده‌ڤه‌رێن سلێمانيێ داين سه‌باره‌ت داخستنا ده‌رگه‌هێن قوتابخانان ، برياره سوبه نێچيرڤان بارزانى سه‌رۆكێ حكومه‌تا هه‌رێما كوردستانێ و جێگرى وى ل گه‌ل به‌رپرسێن 12 لقێن ئێكه‌تيا ماموستايانكوم ببيت.
وه‌هبى يونس سه‌رۆكێ لقێ دهۆك يێ ئێكه‌تيا ماموستايێن كوردستانێ بۆ ئه‌ڤرۆ دياركر ئه‌و بۆ كومبوونا سوبه يا ل گه‌ل نێچيرڤان بارزانى هاتينه داخوازكرن كو برياره ل ده‌مژمێر 10 سپێدێ بهێته ئه‌نجامدان.
برياره پرسا دانا نيڤ موچێ ماموستايان و خرابيا ژيانا ماموستايان ل گه‌ل سه‌رۆكێ حكومه‌تێ بهێته به‌حسكرن و ل دووڤ گوتنا وه‌هبى يونس برياره به‌رى ل گه‌ل سه‌رۆكێ حكومه‌تێ كۆم ببن، ل سكرتاريه‌تا ماموستايان ل هه‌ولێرێ داخوازيێن خوه بكه‌نه ئێك.
ل پرانيا ده‌ڤه‌رێن سلێمانيێ ، لقێن ئێكه‌تيا ماموستايان بريار داينه هه‌تا موچێ وان بدروستى نه‌هێته دان، ئه‌و ده‌رگه‌هێن قوتابخانان ڤه‌كه‌ن و وه‌هبى يونس ره‌ت كر كو ئه‌و چ برياران بده‌ن ل دۆر گرتنا ده‌رگه‌هێن قوتابخانان ل سنورێ پارێزگه‌ها دهۆك.
