مزگینیەکا خۆش بۆ خانەنشینێن پێشمەرگەی
ئەڤرۆ نیوز:
بەرپرسێ دەزگەھێ بلندێ ئیلۆنێ ئاشکرا کر، لیستا خانەنشینێن پێشمەرگەی دێ چیتە سەر ب میلاکێ وەزارەتا پێشمەرگەی ڤە و ھەموو ھەیڤان ل گەل وەزارەتا پێشمەرگەی دێ مووچێ خوە وەرگرن، دیارکر ژی، نوکە لیژنەکا بلند یا کار ل سەر پاقژکرنا لیستا خانەنشینێن پێشمەرگێن بەرێ دکەت.
قادر قادر، بەرپرسێ دەزگەھێ بلندێ ئیلۆنێ بۆ رۆژناما ئەڤرۆ گۆت: “د کۆمبوونا نوونەرێن پێشمەرگێن بەرێ ل گەل سەرۆکێ ھەرێما کوردستانێ ب ھووری مە بەحسێ باشترکرنا مووچێ پێشمەرگێن بەرێ کریە و سەرۆک بارزانی داخوازکر، لایەنێن پەیوەندیدار کار بۆ ڤێ چەندێ بکەن لیستێن پێشمەرگێن بەرێ بھێنە پاقژکرن و کەسێن ب دروستی پێشمەرگایەتی کربیت و ھاتبنە خانەنشینکرن ژ وان کەسێن بێی کو پێشمەرگە بن و ھاتبنە خانەنشینکرن بھێنە جوداکرن، لەوڕا پشتی کۆمبوونا ل گەل سەرۆک بارزانی نوکە مە لیژنەیا بلند ل گەل برادەرێن ئێکەتیێ و حزبا شوعیا کوردستانێ پێکئینایە و مژۆلی پاقژکرنا لیستا مووچێ پێشمەرگێن خانەنشینین”.
قادری خویا ژی کر، پشتی لیژنە کارێ خوە ب دووماھی دئینیت، دێ لیستەکا ئێکگرتی و دروست بۆ سەرۆکێ ھەرێما کوردستانێ ھێتە بلندکرن و پێشمەرگێن خانەنشین کو ئەڤە شەش ھەیڤە مووچە وەرنەگرتی دێ چنە سەر ب میلاکێ وەزارەتا پێشمەرگەی ڤە و ھەموو ھەیڤان ل گەل وەزارەتا پێشمەرگەی دێ مووچێ خوە وەرگرن و گۆت: “ئەو کەسێن پێشمەرگە ژی نەبن و ھاتبنە خانەنشینکرن دێ وەکی خوە مینن و مووچێ وان ناھێتە بڕین، بەلێ ناچیتە سەر ب وەزارەتا پێشمەرگەی ژی ڤە”.