مه‌حموود سه‌نگاوی خۆزگه قاسم سوله‌یمانی فه‌رمانده‌ی ئێمه ده‌بو
ئه‌ڤرۆ نیۆز، عه‌زیز هه‌ورامی
مه‌حموود سه‌نگاوی ئه‌ندامی ئه‌نجوومه‌نی گشتی سه‌ركردایه‌تی یه‌كێتی له چاوپێكه‌وتنێكیدا له‌گه‌ڵ ماڵپه‌ڕی ته‌سنیم سه‌ر به ئیتلاعاتی ئێران، باس له هاوڕێییه‌تی و نزیكی له‌گه‌ڵ قاسم سوله‌یمانی فه‌رمانده‌ی كوژراوی سوپای قودسی ئێران ده‌كات و خۆزگه ده‌خوازێت فه‌رمانده‌ی هێزی پێشمه‌رگه بواییه.
له درێژه‌ی چاوپێكه‌وتنه‌كه‌ی مه‌حموود سه‌نگاوی ده‌ڵێ، هاوڕێیه‌تیم له‌گه‌ڵ ئێرانییه‌كان هه‌یه و زیاتر گرنگی به پته‌وكردنی پێوه‌ندی و هاوڕییه‌تیم له‌گه‌ڵ ئێرانییه‌كان ده‌ده‌م، ئێرانییه‌كان هاوكارییه‌كی ته‌واویانكردووین، هه‌رهێزێك بێته‌ناوچه‌كه ده‌كشێته‌وه به‌ڵام ئێمه و ئێرانییه‌كان به‌یه‌كه‌وه ده‌مێنینه‌وه.
له‌باره‌ی ڕوانینی بۆ قاسم سوله‌یمانی مه‌حمود سه‌نگاوی ده‌ڵێ، له دیمانه‌یه‌كی تریشدا وتومه خۆزگە قاسم سولەیمانی فەرماندە و پێشمەرگەی ئێمە کوردەکان ده‌بوو.
ناوبراو زیاتر وتویه‌تی، كوژرانی قاسم سوله‌یمانی و هاوڕێكانی له لایه‌ن ئه‌مریكییه‌كانه‌وه دڵگرانی كردم زۆرم پێ ناخۆشبوو، كوژرانی بۆمن دڵته‌زێن بوو ، هه‌میشه له دانیشتن و گفتوگۆكانم له‌گه‌ڵ سوله‌یمانی به‌ڕێزه‌وه گوێم له قسه‌كانی ده‌گرت.
مه‌حموود سه‌نگاوی ئه‌و سه‌ركرده سه‌ربازی و سیاسییه‌ی یه‌كێتییه هه‌میشه به یه‌كێ له نزیكانی ئێرانییه‌كان داده‌ندرێت و هه‌ماهه‌نگی له‌گه‌ڵ به‌رپرسانی سه‌ربازی ئه‌و ده‌وڵه‌ته هه‌یه.
