مه‌لا به‌ختيار: هه‌موو ئه‌ندامێن سه‌ركردايه‌تيا ئێكه‌تيێ ب ئيمزاڤه ل گه‌ل ريفراندۆمێ بوون
ئه‌ڤرۆنيۆز:
به‌رپرسێ ده‌سته‌يا مه‌كته‌با سياسى يا ئێكه‌تى نيشتمانى كوردستان راگه‌هاند، پشتى كارڤه‌دانا ده‌وله‌تێن جيهانێويێن هه‌رێمى وكاره‌ساتا كه‌ركووكێ، رۆخاندنه‌كا ده‌روونى يا چاڤه‌رێنه‌كرى په‌يدابوو، دبن وان كاريگه‌ريانڤه، هژماره‌كا سه‌ركردێن ئێكه‌تيێ ولايه‌نان خوه وه‌سا دياردكه‌ن كو هه‌ر ل ده‌ستپێكێ وهه‌تا دووماهيێ ل گه‌ل ريفراندۆمێ نه‌بوون.
مه‌لا به‌ختيار دگۆتاره‌كێ دا ل رۆژناما چاڤدێر يا هژمارا ئه‌ڤرۆ 27/11/2017 دبێژيت، دو هه‌يڤ ب سه‌ر ريفراندۆمێ ڤه بۆرين، هێشتا دۆكێلا پيلانگيريا ره‌ش ئاسووريێ راستيان دناڤ حوكمه‌تێ وئێكه‌تيێ دا يا داپۆشى، هه‌موو ئه‌وێن دبێژن حوكمه‌تا مه وئه‌زموونا مه ل عيراقێ وباشوورێ كوردستانێ ته‌نها ريفراندۆمێ گه‌هانديه ڤێ ره‌وشا ناله‌بارا نوكه، دراست نينن ل گه‌ل ويژدانا خوه ورايا گشتى و ئيمزايێن هه‌موو ئه‌ندامێن سه‌ركردايه‌تيا ئێكه‌تيێ يێن ل ده‌ف من كو ل گه‌ل ريفراندۆمێ بوون.
گۆت ژى، ئه‌وێن دبێژن ره‌وشا ئێكه‌تيێ پشتى ريفراندۆمێ گه‌هشتيه پيلانا شه‌مبيێ 4/11/2017 ئه‌وژى دخوازن مه‌ره‌مێن جۆراوجۆرێن جه‌مسه‌رێن دناڤا ئێكه‌تيێ دا داپۆشن.
دياركر، هه‌كه باوه‌رى ب وێ چه‌ندێ نه‌هێته كرن كو هه‌موو سه‌ركردێن ئێكه‌تيێ ل گه‌ه‌ل ريفراندۆمێ بوون، رێككه‌فتنا ئێكه‌تيێ وگۆران بخوينن، ب راشكاوانه به‌حسێ ريفراندۆمێ وسه‌ربخوه‌يا كوردستانێ تێدا هاتيه كرن، ئه‌وێ گومان ژى هه‌بيت، بلا نه‌خشه رێيا ئێكه‌تيێ بۆ پارتى بخوينن وبزانن چاوان به‌حسێ ريفراندۆمێ وسه‌ربخوه‌يا وبه‌حسێ ئه‌نجامدانا ريفراندۆمێ ل كه‌ركووكێ وده‌ڤه‌رێن كێشه ل سه‌ر هاتيه كرن.
