مۆلەت ب سێ پڕۆژەیێن نوو یێن پیشەسازی هاتە دان
دهۆك، لەزگین جۆقی:
رێڤەبەری گشتی یا وەبەرهێنانێ ل پارێزگەها دهۆكێ دیاركر كو د چارچۆڤەیێ گەشەپێدانا كەرتێ پیشەسازی و بازرگانی و دابینكرنا ژێرخانەیەكا بهێز ل پارێزگەها دهۆكێ و بەرفرەهكرنا پڕۆژەیێ ستراتیجی یێ «دەڤەرا پیشەسازی یا خوارنێ ل كانی سپییێ» ل دەڤەرداریا سێمێلێ، ب ڕێكا دانا مۆلەتێن نوو بۆ چەندین پڕۆژەیێن بازرگانی و عمباران بەردەوامە، رێڤەبەریا گشتی یا وەبەرهێنانێ ل پارێزگەها دهۆكێ مۆلەتا فەرمی ب سێ پڕۆژەیێن نوو یێن عمباران ل كەرتێ 11 یێ وێ دەڤەرا پیشەسازیا خوارنی دایە.
هەڤال سەدیق، رێڤەبەرێ گشتی یێ وەبەرهێنانێ ل پارێزگەها دهۆكێ بۆ ئەڤرۆ گۆت: «275 كارگەهـ و 229 عمبار ل دەڤەرا كانی سپییێ دێ هێنە چێكرن، دیسا چەندین ئاڤاهی و خزمەتگوزاریێن جودا د ناڤ پڕۆژەی دا هەنە، ئەڤ جۆرە پڕۆژەیە دێ بنە ئەگەرێ دروستكرنا گەلەك دەلیڤەیێن كاری بۆ خەلكێ پارێزگەها دهۆكێ ب گشتی و دەڤەرداریا سێمێلێ ب تایبەتی، هەروەسا ئابوورێ هەرێما كوردستانێ ب شێوەیەكێ بەرچاڤ دێ گەشەیێ كەت».
