مۆندیال دێ ب تامەكا كوردی دەستپێكەت
ئیحسان حەسەن
رەنگە پرسیارا ژ هەموو گرنكتر د ناڤا حەژێكەر و پشتەڤانێن فوتبۆلا جیهانێ ئەو بیت، ئەرێ ئەمریكا ب هەڤپشكی دگەل هەر ئێك ژ كەندا و مەكسیك دێ شێت سۆزا خوە بجهـ ئینیت و ئێك ژ رێكخستیترین مۆندیال د دیرۆكێ دا پێشكێش كەت؟ ژبەر كو ئەڤرۆ و دگەل دەستپێكرنا هەڤركیێن مۆندیالێ دا، ئەوا دێ بۆ جارا ئێكێ ددیرۆكا خوە دا ب پشكدارییا 48 وەلاتان هێتەكرن، دێ كەڤیتە دبەرهنگاریەكا مەزن دا ژبۆ پێشكێشكرنا كۆپییەكا جودا و سرنجراكێش، ڤێ قارەمانییێ بكەتە روودانەك كو چ جاران نەهێتە ژبیركرن، ژبەر كو بەرهنگاریا راستەقینە ئەڤرۆ نە تنێ دشیانان دایە، بەلكو د شیانێن پێشكێشكرنا ئەزموونەكا تمام دایە كو ژ هەژی ڤی كەرنەڤالێ جیهانی بیت، یێ كو ب ملیاران كەس ل سەرانسەری جیهانێ چاڤەرێ دكەن، ژبەركو 48 تیم دێ گەرموگوریەكا مەزنتر دەنە قارەمانییێ، بەلێ دهەمان دەم دا دێ تووشی بەرهنگاریێن لوجستی بن، دبیاڤێ هاتن و چوونێ، دیسان خشتێ یاریان، یان ژی جێگیركرنا پشتەڤانان یێن كو ژ هەموو وەلاتێن جیهانێ هاتین، ئەگەر ئەم بزانین كو ئەو خودانێن ژێرخانەیەكا مەزنن ژ یاریگەهان و شارەزاهییەكا بەرفرەه د رێكخستنا روودانێن وەرزشی یێن مەزن دا هەیە، لەوما لڤێرە دێ تاقیكرنا راستەقینە لسەر رێكخەران دیاربیت، كا دێ چەوا شێن سەرەدەریێ دگەل ڤێ هژمارا بێ وێنە یا هەلبژارتی و یاریان و جەماوەری كەن، یا دیتر ئەڤ مۆندیالە دێ شێوازێ كۆپا جیهانێ بۆ چار سالێن دی دیاركەت، ب مەرجەكی ئەگەر سەركەڤتن ئینا، هەر چەندە گەلەك ژ چاڤدێر و رەخنەگران لسەرانسەری جیهانێ دگەل بیرۆكا زێدەركرنا هژمارا تیمێن پشكدارنەبوون، ئەژی ئێك ژوانم، چونكو جیوازیەكا تمام دناڤبەرا تیمێن دەربازبوودا هەیە،هەموو دئاستەكێ نایاب دا نینن، هندەك تیم یێن هەین ئەگەررێژا دەربازبوونێ نەهاتبا زێدەكرن، چ جاران نەدگەهشتنە مۆندیالێ، بەلێ وەكو یا دیار و هەموو دزانن كو كێشەیا فیفایێ ئەوە پتر ب چاڤێ بازرگانی و قازانجێ بەرێ خوە ددەتە ڤێ روودانێ لسەر حسێبا بهایێ بهێزترین قارەمانییا جیهانێ، ڤێجائەڤ قازانجە چ ژ پارێ ڤەگوهاستنا یاریان بیت، یان ژی سپونسەر و رێكلام و فروتنا پلێتان بن، ئانكوئەگەرئاستێ تەكنیكی دهندەك یاریان دا ژی یێ كێم بیت، بۆزێدەكرنا حسابا وان یا بانكی یە، بەلێ یا گرنك بۆ مە وەكو كورد و یا ب تامتر دڤێ روودانا مەزن دا، رێژەیا یاریزانێن كوردە یێن كو دگەل دگەل هەلبژارتیێن جودا وەكو ئیراق ، توركیا ، ئەلمانیا و ئیرانێ دێ پشكداریێ دڤێ خرڤەبوونا جیهانی دا كەن، كو بڤێ پشكداریێ چەندین رەهەند و گرنگیێن جیواز بخوەڤە دكرن، چ لسەر ئاستێ وەرزشی، یان ژی نەتەوەیی بن، ژبەر كو هەبوونا وان تنێ بۆ پێشكێشكرنا نۆت خولەكێن یاریێ نینە، بەلكو نویكرنا باوەریێ یە ب شیانێن مرۆڤێ كورد كو دشێت دهەر بوارەكی دا بگەهیتە ئاستێ هەرە بەرزێ جیهانێ، ئەگەر دەرفەت و ژینگەهەكا گونجای بۆ بهێتە رەخساندن، دیسان نامەیەكا روونە كو كورد ب هێز و ئیرادەیا خوە دشێن ئالایێ سەركەڤتنێ دبلندترین گوپیتكێن جیهانی دا ب هەلگرن.
