میراتگرێن فەرمانبەران ب 20 ملیۆن دیناران دێ ھێنە قەرەبووکرن
ئەڤرۆ:
ل دووڤ پرۆژە قانوونەکێ، سندۆقا مووچە و خانەنشینیا ھەرێما کوردستانێ دێ ھێتە دامەزراندن و میراتگرێن فەرمانبەران ب 20 ملیۆن دیناران دێ ھێنە قەرەبووکرن.
فراکسیۆنا پارتی ل پەرلەمانێ کوردستانێ، پرۆژە قانوونا سندۆقا مووچە و خانەنشینیا حوکمی ئامادەکریە و بڕیارە د دەمێ ھەیڤەکێ دا بھێتە دەرخستن و پەسەندکرن، پرۆژە قانوون ژ 24 ماددان پێک دھێت و سندۆق دێ دەزگەھەکێ گشتیێ سەربخۆ بیت و ل سەر ھژمارا مەزاختیێن حوکمەتێ دێ ھێتە دامەزراندن و بودجەکا تایبەت ب خوەڤە ھەبیت.
سندۆق دێ ل بن چاڤدێریا پەرلەمانی بیت و دەستەیا وێ ژی سەرۆکێ سندۆقێ دێ پلا وەزیر بیت و نوونەرێن وەزارەتێن دارایی و پلاندانانێ تێدا ئەندام بن.
د ماددێ پێنجێ یێ پرۆژەی ئاماژە ب داھاتێ سندۆقێ ھاتیە کرن کو دێ ژێدەرێ داھاتێ وێ ژ شەش جھان ھێت، ئابۆنێن ھەیڤانە یێن فەرمانبەران ب رێژا 3% یا سەرجەمێ گشتیێ مووچێ فەرمانبەری، رێژا 5% داھاتێ گشتیێ ناڤخۆ یێ ھەرێما کوردستانێ، رێژا تەرخانکری ژ مەزاختیێن تەشغیلیا مووچان د بودجا گشتی دا، دیارکرنا 30% وەکو داھاتێ سندۆقێ، تەبەروعات و زەکات و ھاریکاریێن جودا یێن رێکخراوێن ناڤخۆ و نێڤدەولەتی و رێژا 2% یا داھاتێ سالانە یێ سندۆقا داھاتێن نەفت و غازا ھەرێمێ.
ئەو فەرمانبەر و کەسێن ژ سندۆقێ مفادار دبن، دڤێت خودان رەگەزناما عیراقی و ناسناما بارێ شارستانی و نفوسا عیراقی بن، د چارچۆڤێ سنۆرێ ئیداریێ ھەرێما کوردستانێ یان سەر ب ئێک ژ حوکمرانیێن ھەرێمێ بن ئەوێن دکەڤنە دەرڤەی ئێدارا سنۆرێ ھەرێمێ و دیارکریە کو فەرمانبەرێن ھەڤپشکێن سندۆقێ د دەمێ تمامبوونا خزمەتا وی ب ئەگەرێ گیان ژ دەستدانێ یان ژ کارکەفتنا تمام (حجز) یان خرابیا بارێ ساخلەمیێ یان گەھشتن ب ژییێ خانەنشینیێ، لێ ب مەرجەکی دەمێ ئابۆنێن د سندۆقێ دا ژ 15 سالان کێمتر نەبیت دێ ژ سندۆقێ مفادار بن.
ل دووڤ پرۆژە قانوونێ ئەڤان کەسان مافێ وەرگرتنا مووچێ خانەنشنیا فەرمانبەری وەکو میراتگر ھەیە: کوڕ وەکو میراتگر د شێت ژێ مفادار بیت، لێ ب مەرجەکی ژییێ وی ژ 20 سالان کێمتر بیت یان شیانێن کارکرنێ نەبن، کچ وەکو میراتگر ژێ مفادار دبیت، ب مەرجەکی ئەگەر شوو نەکربیت یان شیانێن کارکرنێ نەبن، باب دبیتە میراتگر، ب مەرجەکی بۆ ب رێڤەبرنا ژیانا خوە پشت بەستنێ ل سەر وی مووچەی بکەت و چ ژێدەرێن دی یێن دارایی نەبن، دیسا دەیک ژی وەکو میراتگر دشێت ژێ مفادار بیت ب مەرجەکی بیژن بیت یان یا بەردای.
د ماددێ 15 یێ پرۆژە قانوونێ دا ھاتیە د دەمێ گیان ژ دەست دانا فەرمانبەری دا میراتگر ب 20 ملیۆن دیناران دێ ھێتە قەرەبووکرن.
