میرحازم بەگ: داخوازێ ژ بەغدایێ دكەین سندۆقا ئاڤاكرنا شنگالێ كارا بكەت و یاسایا رزگاربوویان بجهـ بینیت
ل سلالڤەگەڕا 12 یا جینۆسایدا ئێزدییان دا، میر حازم تەحسین بەگ، میرێ ئێزدییان راگەهاند كو پشتی 12 سالان هێشتا برینێن وان ساخ نەبووینە و داخواز ژ حوكمەتا ئیراقێ كر یاسایا رزگاربوویان بجه بینیت و سندووقا ئاڤاكرنا شنگالێ كارا بكەت دا كو ئاوارە ب سەربلندی ڤە ڤەگەڕنە ڤە.
د رێورەسمێن سالڤەگەرا 12 یا جینۆسایدا ئێزدییان دا، میر حازم بەگ، میرێ ئێزدییان پەیڤەك پێشكێش كر و راگەهاند: «ئەڤرۆ 12 سال ل سەر قڕكرنا مللەتێ ئێزدی دەرباز دبن، 12 سالێن تژی نەخۆشی، خەم و بێئومێدی». ئاماژە ب وێ یەكێ ژی كر كو زیندیكرنا ڤێ هەلكەفتێ ژ ئالیێ حوكمەتا هەرێما كوردستانێ ڤە جهێ شانازیێ یە و وەفادارییەكا مەزنە بۆ شەهیدێن ئێزدی و هەمووكوردستانێ.
میرێ ئێزدییان رۆناهی ئێخستە سەر بەردەوامییا كۆمكوژیێ و گۆت»هەتا نوكە 270 هزار ئێزدی ئاوارەنە و دوو هزار و 500 ژنێن ئێزدی د دەستێ داعشێ دا ماینە، زێدەباری وێ چەندێ كو گەلەك ژ گۆرێن ب كۆم هێشتا نەهاتینە ڤەكرن». راگەهاند ژی كو رێكخراوا تیرۆرستییا داعشێ ل چەرخێ 21 دخواست دیرۆكا چار هزار سالی یا مللەتێ ئێزدی ب شەڤ و رۆژەكێ ژ ناڤ ببەت، بەلێ ب خواستا خودێ و خۆڕاگربوونا گەلێ مە ئەو پلان سەرنەكەفتن.
د پشكەكا دی یا پەیڤا خۆ دا، میر حازم بەگ داخواز ژ سەرۆكێ حوكمەتا هەرێما كوردستانێ و سەرۆكێ هەرێما كوردستانێ كر كو ل گەل حوكمەتا ئیراقێ بگەهنە تێكگەهشتنەكێ بۆ چارەسەركرنا دۆسییا شنگالێ، چونكی ئارامییا شنگالێ بۆ ئێزدییان و هەموو ئیراقێ و هەرێما كوردستانێ گرنگییەكا ستراتیژی هەیە.
دەربارەی ناساندنا نێڤدەولەتی، ئاماژە ب وێ چەندێ كر كو هەتا نوكە 13 وەلاتان دانپێدان ب جینۆسایدا ئێزدییان كریە، بەلێ هەتا نوكە ئیراقێ دانپێدان پێ نەكریە. داخوازیێن میرێ ئێزدییان بۆ بەغدایێ ئەڤە بوون: «چارەسەركرنا دۆسییا پەنابەران، بەردەوامییا بزاڤان بۆ رزگاركرنا رەڤاندییان، بجهئینانا یاسایا رزگاربوویێن ئێزدی، دانانا ئیدارەیەكا شەرعی ل شنگالێ و كاراكرنا سندیوقا ئاڤەدانكرنا شنگالێ كو دوو سالە یاسایا وێ دەركەفتییە و كار پێ نەكریە».
ل دوماهییا گۆتارا خۆ ، میر حازم بەگ سوپاسییا خەلكێ كوردستانێ كر بۆ حەواندنا ئاوارەیان، ب تایبەتی خەلكێ دهۆكێ و زاخۆ. هەروەسا سوپاسییا تایبەت ئاراستەی سەرۆك مەسعود بارزانی كر وەك مەرجەعێ كوردستانێ بۆ پشتەڤانیێن وی یێن بەردەوام و رۆلێ وی د رزگاركرنا شنگالێ دا. هەمان دەم سوپاسییا سەرۆكێ هەرێمێ نێچیرڤان بارزانی كر بۆ بزاڤێن وی ل رزگاركرنا رەڤاندییان، و دەستخۆشی ل مەسرور بارزانی، سەرۆكێ حوكمەتا هەرێما كوردستانێ كر بۆ هاریكاریێن وی یێن بەردەوام بۆ ژنێن رزگاربووی و پشتەڤانیكرنا بنگەهێ لالش یێ رەوشەنبیری و جڤاكی.
