میرێ ئێزدییان داخوازێ ژ سوودانی دكەت رێككەفتنا شنگالێ بجهبینیت
میر حازم تەحسین بەگ، میرێ ئێزدییان و سەرۆكێ جڤاتا رۆحانی یا ئێزدی ب هەڤالینییا د. خەلەف شنگالی، شیرەتكارێ سەرۆك وەزیرێن ئیراقێ بۆ كاروبارێن ئێزدییان، ژ ئالیێ محەمەد شیاع سوودانی، سەرۆك وەزیرێن ئیراقێ پێشوازی لێ هاتە كرن.
ل دۆر وێ دیدارێ، نڤیسینگەها راگەهاندنا جڤاتا رۆحانی یا ئێزدی بەیاننامەیەك بەلاڤكر و ئاماژە ب وێ چەندێ كر، هەردو ئالی هەڤڕابوون ل سەر وێ چەندێ هێزا ئیراقێ ژ هەمەجۆرییا نەتەوەیی و ئایینیدایە كو ل سەر بنەمایێ ئێكڕێزییا نیشتمانی و پێشڤەبرنێ ب پێكڤەژیانا ئاشتییانە، دهێت.
محەمەد شیاع سوودانی، سەرۆك وەزیرێن ئیراقێ د وێ دیدارێدا راگەهاند، حوكمەتا ئیراقا فیدرال كاری بۆ رێزگرتنێ ل مافێن هەموو پێكهاتەیێن ئیراقێ دكەت د چارچۆڤەیێ دەستووری و قانوونێن بەركار، ژ پێخەمەت گەرەنتییا وەكهەڤیێ و پاراستنا ناسنامەیا كەلتووری و ئایینی و بنبڕكرنا جوداهییان.
ژ ئالیێ خوەڤە میر حازم تەحسین بەگ، میرێ ئێزدییان داخواز ژ سوودانی كر گرنگیێ ب نووژەنكرنا دەڤەرا شنگالێ بدەت ب رێكا بجهئینانا پڕۆژەیێن خزمەتگوزاری و گەرەنتیكرنا زڤرینا ئاوارەیان بۆ جهێن خوە ب گۆڕەی رێككەفتنا ئیمزاكری بۆ ئاساییكرنا رەوشا شنگالێ، ب تایبەت پشتی بڕیارا جڤاتا وەزیرێن ئیراقێ ب پێدانا خاوەندارییا مۆلك و ئەردێ ئاكنجیبوونێ ب وەلاتیێن ئێزدی كو رژێما بەعس ب مەرەمێن سیاسی، مافێ خاوەندارییا ئەرد و مۆلكێن وان ژێ ستاندبوو.
