مێزا بەتال
هێلین سالم
ل دەمژمێر پێنجی ئیڤاری، وەک هەرجار دەنگێ فیتکا قۆریێ چایێ بێدەنگا ژۆرا مەزن شکاند، خاتینا خەدیجا ب پینگاڤێن گران و بلەز بەرەف لێنانگەهێ ڤە چوو، چا د ناڤ قۆری دا باش کەلی بو و بێهنا وێ د ناڤ مال دا بەلاڤ ببوو، وێ ب دەستێن خۆ یێن لەرزۆک سێنیا داری ئینا دەر.
ل سەر سێنیێ دیمەنەکێ ڕۆژانە ڕوودا کو هەر کەسەکێ ببینیت دێ دلێ وی ئێشیت، وێ پێنچ پەرداخێن شووشەی یێن بچویک کرنە د سێنیێ دا، هێدیکا چا بۆ هەمیا تێکر و شەکر كرێ و ب کەفچکەکێ بچووک تیکڤەدا هەتا دەنگێ لێدانا کەفچکی ب رویێن پەرداخێ چایێ ڤە ل دیوارێن مال ڤەدای، پاشی سێنییا خۆ برە ژۆرا مەزن و دانا سەر مێزا داری یا ل نیڤا وێ ژۆرێ.
مێزە گەلەک یا بێدەنگ بوو، ل دەوروبەرێن وێ پێنچ کورسی یێن داری هەبوون، خاتین خەدیجا ل سەر کورسیا خۆ ڕوینشت بوو و ل لایێ دی کاک ئەحمەد کو هەڤژینێ وێ ناڤسال چوی بوو و ڕەهێن وی سپی ببوون، تەماشەی ڕوژنامەیا خۆ یا ڕۆژانە دکر بێی کو چ لاپەرەکی ڤە بکەت، چاڤێن وی لسەر سەردێرەکێ راوستیا بوون بەلێ مێشکێ وی سەد قویناغا یێ دویر بۆ ژوان پەیڤان.
ب دەنگەکێ نزم و تژی حەسرەت ڤە خەدیجایێ گوت «چایا بەرهەڤە». ئەحمەدی هێدی هێدی ڕۆژنامە دانا سەر مێزێ و تەماشەی سەر مێزێ کر کو پێنچ پەرداخێن چایێ بوون و هەلما وا بسەر کەت بوو بەلێ بتنێ دو مرۆڤ د وێ مالا مەزن دا بوون و سێ کورسیێن دێ ب تەمامی د بەتال بوون.
کورسییا لایێ ڕاستێ یا ڕێبازی بوو، کوڕێ وان یێ مەزن کو بەری سێ سالان بڕیارا کۆچکرنێ دا و نوکە د وەلاتەکێ سار یێ ئەوروپا دا دژیت. ئاخفتنێن وی نوکە تنێ ب ڕێیا نامەیێن دەنگی یێن کورت دگەهنە وان. کورسییا نیڤێ یا سۆزانێ بوو، کچا وان یا پڕ ب کەنی و بزاڤ کو ل سالا بۆری شوی کربوو و چوو بوو باژێرەکێ دی ژیانا خۆ ئاڤاکر بوو. کورسییا سێیێ ژی یا دیاری بوو، کوڕێ وان یێ بچووک کو ل زانکۆیێ دخوینیت و هەمی دەمێ وی د ناڤ جیهانا ئینتەرنێتێ و هەڤالێن وی دا دەرباز دبوو.
خاتین خەدیجە ب بێدەنگی پەرداخەک هلگرت و دانا بەرامبەر کورسییا بەتال یا ڕێبازی. پاشی پەرداخەکێ دی دانا بەرامبەر کورسییا سۆزانێ. ئەو نە یا بێ ئاگەهـ بوو، بەلکو ڤێ ڕەفتارێ تنێ هێز ددا دلێ وێ دا کو باوەر بکەت مالا وێ هێشتایا ئاڤایە و خەونا بەرێ نەمرییە.
کاک ئەحمەدی ب نەرمی دەستێ خۆ درێژ کر و دەستێ هەڤژینا خۆ گڕت. هەردوکان ب بێدەنگی تەماشەی چاڤێن ئیکودو کر، د وێ سەحکڕنا کویر دا، ب سەدان ئاخفتن، گەنگەشە، و بیرهاتن دهاتنە بیرا وان. بیرهاتنێن وان دەمان؛ دەمێ ئەڤ ژۆرە ژ دەنگێ کەنی، شەڕێن بچووک یێن زارۆکان، و قەرەبالغیا ئێڤارییان دهەژیا. وی دەمی بۆ وان مێز گەلەک یا بچووک بوو… بۆ وان هەمیان و دەنگێ زارۆکان کێم نە دبوو، نوکە مال گەلەک یا مەزن بووی، بەلێ گەلەک یا چۆل و سار بوو.
«ئەو د باشن…» کاک ئەحمەدی ب دەنگەکێ نزم کو هێزا خۆ ژ کویراتییا دلێ وی وەردگرت گۆت. «مە ئەرکێ خۆ ب دوماهی ئینا خەدیجا.. وان پاشەرۆژ و ڕێکا خۆ یا ڤەدیتی.»
دلۆپەکا ڕۆندکێ ژ چاڤێ خاتین خەدیجایێ کەتە سەر دێمێ وێ یێ قورمچی و وێ سەرێ خۆ ب ڕەزامەندی لڤاند. وێ دزانی کو ئەحمەد ڕاست دبێژیت. زارۆکێن وان مەزن ببوون و بەرەف جیهانا خۆ فڕی بوون، وەکو بەلەکێن کو هەوا وان دبەت، بەلێ د ناخێ هەر دایک و بابەکی دا، وەک بیرهاتنەکا بێدەنگ، ئەو دەمە بەرەف پاش دزڤڕیت؛ دەمێ مال پڕ ژ ژیانێ.
هەردوکان ب بێدەنگی دەست ب ڤەخوارنا چایا خۆ کر. هەلما چایێ بەرەف سەری دچوو و د ناڤ بێدەنگییا ژۆرێ دا بەرزە ببوو. مێز بەتال بوو ژ مرۆڤان، بەلێ د ناخێ وان دا مالا پڕ بوو ژ بیرهاتنێن زارۆکێن وان یێن هەردەم ساخ و چ جارا نەمرن.