مەرەم ژ فێستیڤالان نیشادانا بەرهەمێن خوەمالی و پشتەڤانیا جۆتیارانە
ئامێدیێ، مەحمود نهێلی:
ب چاڤدێری و بەرهەڤبوونا د. عەلی تەتەر، پارێزگارێ دهۆكێ و وارشین سەلمان، دەڤەردارێ ئامێدیێ و تاها بەرواری، بەرپرسێ نڤیسینگەها نێچیرڤان بارزانی، جێگرێ سەرۆكێ پارتی دیموكراتی كوردستان و بەهرام عەریف یاسین، نوونەرێ مەكتەبا ڕێكخستنا پارتی دیموكراتی كوردستان و بەرپرسێ لقێ 18 یێ پارتی ل ئامێدیێ و ماجد سەید سالح، جێگرێ پارێزگارێ دهۆكێ و هژمارەكا كەسایەتی و پەڕلەمانتار و نوونەر و ڕێڤەبەرێن دام و دەزگەهێن جودا، فێستیڤالا چارێ یا بەرهەمێن خۆمالی ل دەڤەرا بەرواریان ل سنۆرێ ناوچەدارییا كانی ماسێ ل دەشتا گوندێ دێرێ هاتە ڤەكرن و بۆ دەمێ سێ رۆژان یا بەردوام بوو.
د فێستیڤالێ دا دۆرێن 250 جهێن فرۆتنا بەرهەمێن خۆمالی بخۆڤە دگرت، دكتۆر عەلی تەتەر، پارێزگارێ دهۆكێ د پەیڤەكێ دا دەستخوەشی ل ڕێكخەرێن فێستیڤالێ كر، هەروەسا پشتەڤانییا حوكمەتا هەرێما كوردستانێ ژبۆ بەرچاڤكرنا هەموو جۆرێن بەرهەمێن خوەمالی و گەشەپێدانا بەردەوام یا كەرتێ چاندنێ و كەرتێ گەشتیاری دوپاتكر و دیاركر، د سالێن بۆری دا ب ڕێكا فێستیڤالێن جودا بەرهەمەكێ زۆر هاتیە بەرچاڤكرن و فرۆتن، سەدان جۆتیارێن دەڤەرێ ژێ مفادار بووینە.
ژلایێ خوەڤە وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، مەرەم ژ ڤان رەنگە فێستیڤالان نیشادان و فرۆتنا زێدەتر یا بەرهەمێن خوەمالی و پشتەڤانیكرنا جۆتیارێن دەڤەرێ و پێشئێخستنا ئاستێ كلتووری و هونەری یێ دەڤەرێ یە، هیڤیدارین ئەڤ رەنگە فێستیڤالە ل سەرانسەری دەڤەرێ دبەردەوام بن.
هەروەسا ژبلی نیشادانا بەرهەمێن خوەمالی د ڤێ فێستیڤالێ دا چەندین برگەیێن هونەری و كەلەپووڕی یێن جودا هاتنە نمایشكرن و چەندین هونەرمەندان پشكداری تێدا كر، كو ببوو جهێ راكێشانا سەرنجا پشكدار بوویان.
