ناڤه‌رۆكا به‌یانناما پارتى ب هه‌لكه‌فتا سالڤه‌گه‌را دامەزراندنا وێ
ئەڤرۆ نیوز،زنار تۆڤی:
رۆلێن نەتەوا کورد و وەلاتیێن عەزیزێن کوردستانێ و ئەندام و لایەنگر و جەماورێ تێکۆسەرێ پارتی
شێست و نەه سالان بەری نوکە،کو نەتەوا کورد چارەمین نەتەوەیا مەزنا دەڤەرێ یە،کو ژ مافێ دیاریکرنا چارەنڤیسێ خوە بێبەش بوویە،ژ ئەگەرێ ب زۆری سەپاندنا سنۆرێ دەستکردێن سایکس بیکۆدا،کوردستان هاتە دابەشکرن و هەولدا ب ئاگر و ئاسنی مرۆڤێ کورد تەسلیمی بقەدەر و چارەنڤیسێ شوم تاری ببیت،دناڤا وێ بێ هیڤیێ دا،پارتی دیمۆکراتی کوردستان وەک هیڤیەکێ هاتە دەمەزراندن و هاتە مەیدانێ،داکو بێژیتە هەمی دۆنیایێ گەلێ کوردستانێ ناچیتە بن بارێ وێ غەدرا مێژوویی و ب دابەشکرنا ئاخا وێ و لکاندنا وێ ب دەولەتێن دەستکرد و بێبەشکرنێ ژ مافێن نەتەوەیی و مرۆڤی قائیل نابیت.
پارتی درۆستبوو تا هیڤیەکا دی د دلێ خەلکێ کوردستانێ دا دوبارە بجینیت و پێشرەویا خەباتا مللەتێ مە بکەت و تا بدەستڤە ئینانا تێکرایا مافێ مللەتێ کورد و گەهشتن ب مافێ چارەنڤیسێ سەربەخۆیی.
پارتی لسەر رێبازا مستەفا بارزانی دامەزرێنەر و سەرکردێ دووربین و شۆرەشگێرێ کورد،هەر ژ دەستپێکێ بنەمایێن کوردایەتیێ و بزاڤا رزگاریخوازا کوردستانێ ب رەنگەکێ دارشت کو دگەل هەمی بۆها و پرنسیپێن دیمۆکراتیێ و ئێکسانیێ دناڤبەرا گەلان و باوەری ب بۆهایێ مرۆڤان پشتی جەنگێ جیهانی بگۆنجیت.
پارتی ب درێژاهیا کاروانێ خەباتێ و سەربارێ و ئەفرازی و نشیڤیا نەهێلا کوردایەتی ژ مانامرۆڤایەتیێ بهێتە لادان، تیرۆر و تۆندرەوی حەرامکر سەرەرای درندایەتیا دۆژمنان،خەباتەکا پاقژ و بێگەرد مەشاند،رێک ب دەمارگیریا نەتەوەیی نەدا،کوردستان بۆ مەیدانا پێکڤە ژیانێ ب کورد و تورکمان و کلدان و سریان و ئاشوریان و هەمی پێکهاتان،رێ لبەر ئایین و ئایینزانیێ نەهاتە گرتن،پارتی ئەو باوەری لدەف گەلێ کورد چەسپاند کو خوە ژ گەلێن دیتر کێمتر نەبینن ب مافێ کێمتر قائیل نەبن.
ئەڤرۆ سالیادا دامەزراندنا پارتی دکەین و گەلێ مە ژ ڤۆناغا چنینا بەرێ ب ئێکجاری یێ خەباتا سەدسالی نزیک دبیت و سایکس بیکۆ وەک میکانزمەکا فاشل ژبلی مەینەتێ و نەئارامیێ چ بدەستڤە نە ئینا.
وەلاتیێن عەزیزێن کوردستانێ..
هەڤال و جەماوەرێ پارتی..
پارتی وەک حزبەکا ب ئەزمۆن و ئاییندە بەری پێشهاتان دزانی د ئێک دەمدا دەرفەته‌كا مەزن و هێرش و مەترسیێن مەزن ب رێڤەنە،لەورا ل سەروبەندا پێکئینانا کابینەیا نوکە یا حوکمەتێ،پارتی پێداگیری و نەرمی و ئارامگیری بەرپاکر،زەمینەیا حوکمەتا بنکە فراوان رەخساند و لسەر سازان و پێکهاتنێ.
لێ جهێ داخێیە سازان بتنێ لسەر ئاستێ وەرگرتنا پلە و پۆستان هاتە کرن،ل 23 خزیرانا بۆری بنەمایێ سازانێ کو ئەم هەمی لسەر رێکەفتبووین،دڤیابا هەمی یاسا و بریار و رەهەندێن نیشتیمانی ب کۆدەنگی هاتبانەکرن،لێ وان ئێخستنە بەر هێرش و کۆدەتایێ،ئەم وەک پارتی سەرەرای ڤان هەمی قەیران و مەینەتان و سەرباری ناکۆکی و ململانا ناڤخۆیی کو کوردستان پێ سەرقالبوویە،وە دلنیا دکەین کو گەلێ مە دێ ژڤان تەنگژ و گرفتان قورتالبیت،ڕەنج و بەرخودانا ڤی گەلی چ جاران ب هەروە ناچیت.
سلاڤێن گەرم و سۆپاس و پێزانین بۆ تێکرایا هەڤال و کادڕ و لایەنگر و جەماوەرێ پارتی،سلاڤ ل گیانێ سەرجەم شەهیدێن کورد و کوردستانێ نەمری بۆ گیانێ پاکێ بارزانیێ نەمر و کاک ئدریسێ هەمیشە زیندوو.
سلاڤ ل گیانێ پاکێ شەهیدێن پاراستنا کوردستانێ ل شەرێ چارەنڤیسازێ دژی تیرۆرستێن داعش،سلاڤ ل خۆراگری و کۆلنەدانا خۆشک و برایێن ئێزدی،کو سالەک سەر ب کارەساتا شنگالێ دەربازبوو و ئازارێن وان ژبیر ناکەین،سلاڤ ل پێشمەرگێ دلێر و ئازا و قارەمانێ کوردستانێ،سلاڤ ل جەماوەرێ خۆراگر و پشتەڤانێ پێشمەرگێ کوردستانێ.
هەر بلندبیت ئالایێ پیرۆزێ کوردستانێ.
مەکتەبا سیاسیا پارتی دیمۆکراتی کوردستان
16 تەباخا 2015