ناڤ نڤێسین بۆ ڤەگەڕیانا خێزانێن ئاوارەیێن شنگالێ دەستپێكر
دلۆڤان ئاكرەیی:
رێڤەبەرێ كۆچ و كۆچبەران و بەرسڤدانا قەیرانان ل دهۆكێ دەربارەی پڕۆسەیا ڤەگەڕیانا ئاواران بۆ دەڤەرا شنگالێ دیار كر، ب هەماهەنگی دگەل ڕێكخراوا نێودەوڵەتی یا كۆچبەران (un)، ناڤنڤیسینا ئاواران بۆ ڤەگەڕیانێ دەستپێكریە و د ڤێ گەرێ دا دێ ناڤێ 410 خێزانان هێتە تۆماركرن كو ب ئارەزوومەندانە دێ ڤەگەڕنە شنگالێ و دەوروبەران.
پیردەیان جەعفەر، رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ بۆ رۆژنامەیا (ئەڤرۆ) گۆت: پرۆسەیا ناڤ نڤیسین بۆ ڤەگەڕیانێ بۆ شنگال و دەوروبەرێن وێ د ڕۆژێن دەربازبووی دا ل كەمپا شاریێ دەستپێكریە و رۆژانە زێدەتر ل ٣٠ سەرۆك خێزان ناڤێن خۆ تۆمار دكەن و پشتی كەمپا شاریا پاشان ل كەمپا بێرسڤێ و كەمپێن دی ژی دێ ئەڤ پرۆسە بەردەوام بیت و ئەڤ ڤەگەڕیانە ب تەمامی ب ویست و ئارەزوویا خێزانانە و چ زۆری ل كەسێ ناهێتە كرن و خێزان بۆ دەڤەرێن خۆ یێن بەرێ ڤەدگەڕن وەكی تەل عەزێر، سیبا شێخ خدر، گوندێ وەردیە، ناڤەندا شنگالێ، و دهۆلا.
پیردەیان زێدەتر گۆت: هاریكاریێن ماددی و لۆجستی ژلایێ ڕێكخراوا un ڤە بۆ هەر سەرۆك خێزانەكێ كو كوژمێ ملیۆنەك و نیڤ (1,500,000) دیناران دهێتە كرن، زێدەباری كرێیا ڤەگۆهاستن و ترۆمبێلان بۆ باركرنا كەلوپەلێن وان، هەرچەندە ئەڤ كوژمەیە گەلەك كێمە و پشكا نۆژەنكرنا خانیێن وان ناكەت كو ١٢ سالە وێران بووینە و پێدڤیە حوكمەتا ئیراقێ كێمتر ژ ١٥ ملیۆن دیناران بۆ هەر خێزانەكێ تەرخان نەكەت.
پیردەیان جەعفەر دیاركر، هەتا نوكە نێزیكی ٢٧٠ هزار ئاوارە ل سنوورێ پارێزگەها دهۆكێ د ناڤ كەمپان و دەرڤەی كەمپان دا ماینە و نەڤەگەڕیاینە سەر جهـ و وارێن خۆ.
