نشتەرگەری ل دو نەخوەشخانـەیان ل زاخۆ هاتنە قەدەغەكرن
زاخۆ، دلۆڤان هالۆ:
ل ئیدارەیا سەربخوە یا زاخۆ نشتەرگەری ل دو نەخوەشخانەیێن نەحكومی هاتنە قەدەغەكرن، چونكی نە ل دووڤ ڕێنومایێن وەزارەتا ساخلەمیێ بوون، نۆشدارێن تایبەت ژی وەكو پێدڤی ل هەردو نەخوەشخانەیان نەبوون.
پشتی هندەك وەلاتیان گازندەیێن خوە دەربارەی ژوورێن نشتەرگەریان گەهاندینە ڕێڤەبەریا گشتی یا ساخلەمیا زاخۆ، بڕیار هاتەدان، كو نشتەرگەری ل دو نەخوەشخانەیێن نەحكومی بهێنە قەدەغەكرن.
ئەڤ بڕیارە ژی پشتی ئەنجامێن ڕاپۆرتا لیژنەكا تایبەت یا وەزارەتا ساخلەمیا حكومەتا هەرێما كوردستانێ هاتەدان، كو ڤێ لیژنێ ب مەرەما دووڤچوونێ سەرەدانا نەخوەشخانەیێن نەحكومی یێن ئیدارەیا سەربخوە یا زاخۆ كربوو.
