نه‌ته‌وه‌یێن ئێكگرتى: دخوازین خێزانێن عیراقى بهێنه رێكخستن
ئەڤرۆ نیوز:
وەزارەتا ساخلەمییا عیراقێ ب هەماهەنگی ل گەل سندۆقا ئاكنجیبوونێ یا سەر ب نەتەوه‌یێن ئێكگرتی ڤه، پلانه‌ك بۆ رێكخستنا خێزانێدەستپێكریە و بریارە ئەو پلان ژ سالا 2021 هەتا 2025 ڤەكێشیت.
ریتا كۆلۆمبیا، نوونەرا سندۆقا ئاكنجیبوونێ یا نەتەوه‌یێن ئێكگرتی ل عیراقێ دیار كر، ب تنێ 36% ژ ژنێن ئیراقی حەبێن دژی دوگیانیێ ب كاردئینن، رامانا ڤێ ژی ئەوە گەلەك خێزان و كەسان ئەڤ خزمەتە ناگەهیتێ و ئەڤە ژی ئەگەرەكە بۆ زێدەبوونا بێسنۆر یا رێژا ژ دایكبوونا زارۆیان ل عیراقێ.
لدووڤ پێشبینیێن وەزارەتا پلاندانانا ئیراقێ، د ده‌مێ 10 سالێن بهێت دا هژمارا خەلكێ عیراقێ بگەهیتە 50 ملیۆن كەسان، رێكخراوەكا سەر ب نەتەوه‌یێن ئێكگرتی ژی ڤێ چەندێ ب ترس دزانیت و داخواز كریه هژمارا ژ دایكبوونێ بهێتە كێمكرن و خێزانا عیراقی بهێتە رێكخستن.