نوشدارەك:پەنجەشێرا مەمکى دهێتە زەلامان ژى
ئه‌ڤرۆنيوز:
نوشداره‌كا تايبه‌تمه‌ند ب نەخوه‌شيێن مەمکى ڤه دیارکر، ل پشکا شیرەتکاریا نەخوه‌شیێن مەمکى ل نەخوه‌شحانا ئازادى، ئەم ب پێشوازيا هەموو نەخوه‌شیان دکەین و نەخوشێن سەرەدانا مە دکەن پتر ژ (٨٠%) ژوان نەخوه‌شيێن وان ب تنێ هندەک جۆرێن نەخوه‌شیێن سڤك ژ سینگى نە و نێزیکى (١٥%) نەخوه‌شیێن دی نەخوه‌شێن (پەنجەشێرا مەمکى) نە.
سه‌نا ره‌شيد تاها، نوشدارا نەخوه‌شيێن مەمکى بۆ نوش نيوز گۆت” گەلەك جۆرێن (گرێکا) د سینگێ ژنێ دا دروست دبن، به‌لێ هەموو ئەو گرێکانه نەخوه‌شیا پەنجەشێرێ نینە، لەورا پێدڤى ناکەت هەردەمێ گرێکەك د سینگێ ژنه‌كێ دا درۆست بيت، خوه ب ترسینیت و هزر بکەت نەخوه‌شیا پەنجەشێرێ گەهشتە وێ، بەلکو دڤێت سەرەدانا مە بکەت دا کو ئەم چارەسەریا وێ بکەین و ئەو نەخوه‌شێن پەنجەشێرا مەمکى هەين، ئەم ب رێيا نەشتەگەریێن پێشکەفتى و چارەسەرێن باش چارەسەریێ بۆ دکەین”.
سه‌نايێ گوت ژى” دەمێ گرێکەك د سینگێ ژنێ دا دروست دبیت، هندى زووتر سەرەدانا مە بکەت، دێ زووتر نەخوه‌شیا وێ چارەسەر بیت، چونکى نەخوه‌شیا پەنجەشێرا مەمکى د چار قۆناغان دا دبۆریت و هەردو قوناغێن دەستپێکێ گرێك ژ سێ ملم مەزنتر نینە، لەورا ئەم دشێين نەخوه‌شیێ کونترۆل بکەین، لێ دەما ژن زوو قەستا نەخوه‌شخانێ نەکەت، گرێکا د سینگێ وێ دا مەزنتر دبیت ژ سێ سم و ئەو قۆناغە یا مەترسیدارە ل سەر مان و نەمانا ژنێ لەورا فەرە زوو قەستا نوشدارێ تایبەتمەند بکەت ل دەمێ هەبوونا هەر گرێکەکێ د سینگێ وێ دا”.
دياركر” رۆژانە نێزیکى (٥٠) ئافرەتێن پارێزگەها دهۆکێ سەرەدانا مە دکەن کو نەخوه‌شى د سینگێ وان دا هەیە و ئەم چارەسەریێ بۆ دکەین “.
ئاشكراكر ژى” نەخوه‌شیا پەنجەشێرا مەمکى ژبلى ژنان، دهێتە زەلامان ژى، لێ ب رێژەیەکا گەلەك کێم چونکى هەر ژ هزار زەلامان، ئەو نەخوه‌شى دهێتە زه‌لامه‌كى ب تنێ چونکى نەخوه‌شیا پەنجەشێرا مەمکى گەلەك گرنگیێ ل سەر هەردو هورموناتێن (ئسترۆجین و پرۆسترون ) دکەت و هەردو هورمونات پتر ل جه‌م ژنێ هەنە، له‌وما ئەو نەخوه‌شیە بتر دهیتە ژنێ و هیڤیە هەر ژنەکا چ جۆرە گرێکەك د سینگێ خوه دا دیت ب لەز قەستا شیرەتکاریا مە بکەت تا کو ئەم ب هەموو شیانێن خوه ڤە چارەسەریێ بۆ بکەین و ئەو گرێکە مەزن نەبیت و نەگەهیتە لەشێ وێ مینا دل و مێلاکا رەش و نەخوه‌شیا گران ب سەر دا نەهێت و ژیانا وێ بهێتە پاراستن”.
