نووترین وه‌لات هاته راگه‌هاندن
ئه‌ڤرۆ نیوز: ڤه‌ده‌ر ره‌شاڤایی:
وه‌لاته‌كێ نوو ل ده‌ڤه‌ره‌كێ لسه‌ر رووبه‌ره‌كێ بچیك دناڤبه‌را كرواتیا و سلۆڤینیا دا هاته راگه‌هاندن و ب شاهنشینا ئێنكلاڤا هاته ب ناڤكرن و بوو بچیكترین وه‌لات ل ئه‌ورۆپا .
چه‌ند كیلومه‌تران دووری زاگرێب پایته‌ختا كرواتیا و چه‌ند كیلومه‌تران دووری باژێرێ مێتلیكا یێ سلۆڤینی ژ ئالیێ چه‌ند كه‌سه‌كان ڤه ئه‌ڤ وه‌لاته هاتیه دامه‌زراندن درۆشمێ وان (وه‌لاتیێن هه‌می جیهانێ) یه.
كه‌سێن ئه‌ڤ یه‌كه راگه‌هاندی دبێژن وان هه‌می مافێ هه‌ی ب وه‌لاته‌كێ سه‌ربخو بهێنه ناساندن ژبه‌ركو ئه‌و پارچا ئه‌ردی نه ژ ئالیێ سلوڤینیا ڤه و نه ژی كرواتیا ڤه داخازی لسه‌ر نه‌هاتیه كرن، سه‌رب ب هه‌ردو وه‌لاتان ڤه نینه، هه‌رچه‌نده پێشبینی ناهێته كرن ژ ئالیێ نێڤده‌وله‌تی ڤه دده‌مه‌كێ نێزیك دا دانپێدان پێ بهێته كرن.
هه‌یا نها 5 هزار كه‌سان داخاز كریه ببنه وه‌لاتیێن ڤی وه‌لاتی كو هێشتا بفه‌رمی كه‌س تێدا ناژیت، دامه‌زرێنه‌رێن وێ دبێژن وان دڤێت وه‌لاتێ وان بۆ هه‌می كه‌سان بیت كو هزر ل ره‌گه‌زی و ئایینی نه‌هێته كرن، ب ئازادی و ئاشتی و تێگه‌هشتن و بێ باج خه‌لك بژیت.
زمانێن فه‌رمی ژی ل ئێنكلاڤا ئینگلیزی، كرواتی، سلوڤینی، پۆله‌ندی و چینی یه.
هێشتا حكومه‌تا كرواتیا و سلوڤینیا چ داخۆیانی لسه‌ر ڤی وه‌لاتێ نوو نه‌داینه.
