نوژداره‌كی روناهی زڤرانده چاڤێن 100 هزار كوره‌یان
ئه‌ڤرۆنیۆز، ئه‌یاد به‌رواری
ل ده‌ڤه‌ره‌كا چیایی ل پایته‌ختێ نیپالێ نوژداره‌كێ نیپالی یێ تایبه‌تمه‌ند ب نه‌خوه‌شیێن چاڤان ڤه یێ شیای رۆناهیێ بۆ چاڤێن ده‌هان هزار كه‌سێن چاڤێن وان ب ئێكجاری تاری بووین بزڤرینیت.
رۆژناما (نیویۆرك تایمز) یا ئه‌مریكی د راپۆرته‌كێ دا به‌لاڤكریه ” كلینیكا نوژدار ساندۆك رۆت یێ 61 سالی دكه‌ڤیته ده‌ڤه‌را چیایی (هیتودا) ل تیگالانگا ل پایته‌ختێ نیپالێ (كاتماندۆ) یێ شیای رۆناهیێ بزڤرینیته چاڤێن 100 هزار كه‌سان و چو نوژداران د دیرۆكێ دا ئه‌ڤ چه‌نده نه‌كریه و بهایێ نشته‌رگه‌ریێ ژی تنێ (25) دۆلارن”.
نیكولاس كریستۆف په‌یامنێرێ (نیویۆرك تایمز) د راپۆرتا خوه دا ل رۆژناما ناڤبری دبێژیت” ئافره‌ته‌كا نابینا كو ب هه‌ردو چاڤێن خوه نابینیت هاته د كلینیكێ ڤه و نۆژدار ساندۆكی به‌نجه‌ك كره د چاڤێن وێ دا و ب ڕێیا دووربینه‌كا ئاسایی ئاڤا سپی ژ چاڤێن وێ ئیناده‌ر و عه‌ده‌سێن ده‌ستكرد ل شوینا ئه‌وێن ژناڤچووین دانانا جهێن وان و نشته‌رگه‌ری تنێ پێنج خۆله‌كان ڤه‌كێشا”.
رۆژناما ئه‌مریكی دبێژیت” بۆ ئه‌نجامدانا نشته‌رگه‌ریه‌كا ب ڤی شێوه‌ی ل ئه‌مریكا، پێدڤی ب كه‌لوپه‌لێن نوژداری یێن پێشكه‌فتی یه و ده‌مه‌كێ درێژتر ژی یه، زێده‌باری كۆژمه‌كێ مه‌زن یێ پاره‌ی، به‌لێ ئه‌ڤ نوژدارێ نیپالی ب كه‌لوپه‌لێن ئاسایی وان نشته‌رگه‌ریان دكه‌ت و ئه‌ڤ چه‌نده ژ نۆژدارێن هندی وه‌رگرتیه و پتر پێشخستن كریه د كارێ خوه‌دا”.
خویاژی دكه‌ت” ڤی نۆژدارێ نیپالی كۆمه‌لگه‌هه‌كا تایبه‌تمه‌ند ب چاره‌سه‌ریا نه‌خوه‌شیێن چاڤان ڤه‌كریه كو په‌یمانگه‌هه‌كا تایبه‌ت ب مه‌شقكرنا نوژداران ڤه ژی ب خوه‌ڤه دگریت، زێده‌باری كارگه‌هه‌كا دروستكرنا عه‌ده‌سێن ده‌ستكرد و ئه‌و نۆژدار نیڤه‌كا نشته‌رگه‌ریێن خوه ب هه‌روه و بێ پاره ئه‌نجام دده‌ت و بزاڤێ دكه‌ت ئه‌زموونا خوه ڤه‌گوهێزیته هنده‌ك وه‌لاتێن هه‌ژار وه‌كو (غانا و ئه‌سیوبیا).
ل دووڤ رێكخراوا ساخله‌میا جیهانی 39 ملیۆن كه‌س ل جیهانێ د نابینانه و ژ رۆناهیێ د بێ به‌هرن كو نیڤا وان ژ ئه‌گه‌رێ هه‌بوونا ئاڤا سپی د چاڤێن واندا كوره بووینه.