نھێنیێن ھەڤژینیا سەرکەفتی بزانن
ھەکە تە ڤیا ھەڤپشکیا ھەڤژینیێ یا بھێز و دوور ژ قەرقەشێ و کەتنێ و شەر و ب ھەڤچوونا بەردەوام بپارێزی، پێدڤیە تو نھێنیێن ھەڤژینێن دلخۆش د ھەڤبەندیا ھەڤژینیێ دا بزانی.
د وی دەمی دا کو چو ھەڤژینی ژ ئاریشان د ڤالا نینن، بەلێ براستی ژی ھەڤژینیا دلخۆش ھەیە کو ھەردو لایەن دشێن خێزانەکا بھێز و کەیفخۆش ئاڤا بکەن کو بشێن ل پاشەرۆژێ بەرسینگێ ئاستەنگێن ژیانێ بگرن.
نھێنیا ئێکێ، داکوکی ل سەر ھەڤگەھشتنا ئەرێنی: ھەڤژینێن سەرکەفتی پەنایێ دبەنە ھەڤگەھشتنا ئەرێنی بۆ سەرکەفتنا ھەڤژینیێ، ئەو ھەڤژینێن بەردەوام ل گەل ئێک دئاخڤن پتر بۆ دلخۆشیێ دچن، دیالۆک و ھەڤگەھشتنا بەردەوام ل دۆر کاروبارێن ژیانێ دی ھاریکاریا ھەردو لایان کەت کو پتر ئێک و دو بنیاسن و بەرامبەر ژیانێ براوەستن.
نھێنیا دویێ، بپێکڤە ل گەل ئێک و دو بکەنە کەنی: سەرەرای بەرسینگگرتنا کاروبارێن ژیانێ بەلێ دیتنا ئەرێنی یا پێدڤیە و ئەڤە رامانا وێ یە کو نابیت کەنی د ھەڤبەندیا ھەڤژینیێ دا بھێتە بەرزە کرن. ئەو ھەڤژینێن سەرکەفتی دوپات دکەن کو کەنی گرنگترین رەگەزە د ژیانا وان دا، ئەڤە رامانا وێ چەندێ نینە کو وێ خێزانێ چو ئاریشە و گرفتاری د ژیانێ دا نینن بەلێ ھەڤژینێن سەرکەفتی دزانن دێ کەنگی کەنیێ ئێخنە د ناڤ ژیانا خوەدا.
نھێنیا سیێ: جوداھیا د ناڤبەرا وان دا ب رێیەکا ساخلەم: کێ گۆتیە کو ھەڤژینێن کەیفخۆش ل سەر ھندەک تشتان دیتنێن جودا نابن؟ یا نۆرمالە ھندەک جوداھی د ناڤبەرا ھەڤژینان دا ھەبن چونکو ھەر ئێکی کەساتیا خوە ھەیە و دبیت ھەموو تشتان وەک ئێک نەبینن. بەلێ ھەڤژینێن سەرکەفتی دزانن کو جوداھیا دکەڤیتە ھەڤبەندیا وان دا نەشێت ھەڤژینیا وان ژناڤ ببەت، لەورا رەفتارێ وەسا ل گەل ھەموو ئاریشان دکەن کو دشیان دایە ب دیالۆکێ بھێتە چارەکرن.