نەخۆشخانەیەك و قوتابخانەیەكا 18ڕێزی ل ئاكرێ هاتنە ڤەكرن
رەمەزان زەكەریا:
د رێورەسمەكی دا ب بەرهەڤبوونا دكتۆر سامان بەرزنجی، وەزیرێ ساخلەمییا حوكمەتا هەرێما كوردستانێ و دكتۆر محەمەد شوكری، سەرۆكێ دەستەیا وەبەرهێنانێ و دكتۆر عەلی تەتەر، پارێزگارێ دهۆكێ و دكتۆر دلاوەر بۆزۆ، دەڤەردارێ ئاكرێ و دكتۆر مەردان خدر، بەرپرسێ لقێ نەهێ پارتی ل ئاكرێ، دوهی 13/10/2026 ئێكەمین نەخۆشخانەیا كەرتێ تایبەت ل ئاكرێ ب ناڤێ نەخۆشخانەیا ئایندە یا تایبەت ل گەل قوتابخانەیەكا 18 رێزی هاتنە ڤەكرن.
دكتۆر سامان بەرزنجی، وەزیرێ ساخلەمیا حوكمەتا هەرێما كوردستانێ راگەهاند: نەخۆشخانەیا ئایندە یا تایبەت ل ئاكرێ، ل سەر بنەما و ڕێنومایێن دلنیایا جۆری یا وەزارەتا ساخلەمیێ هاتییە دروستكرن و هەموو پشكێن پێدڤی تێدانە، وەكو: پشكێن هەموار هاتن، تیشك، هۆلێن نەشتەرگەرییێ و چاڤدێرییا چڕ، كەرتێ تایبەت تەمامكەرێ كەرتی گشتییە بۆ كێمكرنا رۆتینێ و پێشكێشكرنا باشترین خزمەتگوزاریان بۆ وەلاتییان.
دەربارەی یاسایا بیمەیا ساخلەمیێ وەزیرێ ساخلەمیێ گۆت: «ڕەشنڤیسا بیمەیا ساخلەمیێ ل جڤاتا وەزیران و شۆرا تمام بوویە، ب تنێ پەسەندكرنا پەرلەمانی مایە، ب پەسەندكرنا وێ، دێ بیتە پێنگاڤەكا مێژوویی».
هەروەسا وەزیرێ ساخلەمیێ گۆت: «بزاڤێن مە بۆ دابینكرنا شایستە و میلاكی بۆ نێزیكی 14 هزار خۆبەخشێن شەڕێ داعشێ و كۆرۆنایێ د بەردەوامن».
دكتۆر محەمەد شۆكری، سەرۆكێ دەستەیا وەبەرهێنانێ د كۆنگرەكێ رۆژنامەڤانی دا گۆت: «بەرنامەیێ حوكمەتا هەرێمێ ب سەرۆكاتییا مسرور بارزانی، ئەوە گرنگییەكا تایبەت بدەتە دەڤەرداریێن ئاكرێ و بەردەڕەشێ«.
سەرۆكێ دەستەیا وەبەرهێنانێ گۆت ژی: «زێدەتر ژ 23 پڕۆژەیێن وەبەرهێنانێ ل ئاكرێ د وارێ بجهئینانێ دانە، ژ وان: دروستكرنا دەڤەرێن پیشەسازی، پڕۆژەیێن چاندنێ، گەشتیاری، و ئینانا براندێن جیهانی، هەروەسا ب بڕیارا سەرۆك وەزیران هەموو رسووماتێن وەبەرهێنانێ ل ڤێ دەڤەرێ بووینە سفڕ، دا كو هەر وەبەرهێنەرەك بشێت ب ساناهی ل ئاكرێ و بەردەڕەشێ كار بكەت».
