نەشوان بناڤی دێ سێ نامەیان تۆماركەت
شاكر ئەتروشی
ئەكتەر و هەلبەستڤان (نەشوان محەمەد سالح) كو ب (نەشوان بناڤی) دهێتە نیاسین، د دیدارەكێ دا بۆ رۆژنامەیا ئەڤرۆ گۆت: ئەڤە نێزیكی دو سالانە من سێ هەلبەست وەكو نامە نڤیسین، هەلبەستا ئێكێ ل دۆر عەشق و خۆڕاگرییا پێشمەرگەیە و یا دویێ ل دۆر بابێ و یا سێیێ ژی ل دۆر دایكێ یە، كاری ل سەر تۆماركرنا وان دكەم.
نەشوان بناڤی، گۆت: ئەڤ هەر سێ نامە دگشتی نە، ئانكو نەكو تایبەت من بۆ دایك و بابێ خۆ نڤسییە، ئانكو بۆ دایك و بابێن هەموویانە، مەرەم پێ ئەوە كو كوڕ بزانیت كا بابێ وی چ بۆ كریە، هەروەسا كچ ژی دەمێ شوو دكەت و زاڕۆكەك دبیت بزانیت كا دایكا وێ چ بۆ كریە و چەند زەحمەت پێڤەبریە هەتا مەزنكری، یا پێشمەرگەی ژی ل دۆر پێشمەرگەیەكێ قەهرەمانە كو دشەڕەكێ دژوار دا ل گەل تیرۆرستێن داعش شەهید دبیت، لێ بەری شەهیدبوونێ نامەیەكێ بۆ خۆشتڤیا خۆ كو خواستیا وی یە دنڤیسیت و داخازێ ژێ دكەت كو یا خۆڕاگربیت، هەروەسا وەكو فلم و دراما ژی هندەك دڕێ دا هەنە و یێن بۆری ژی ئەز شانازیێ پێ دبەم وەكو درامایا پایز و شانۆگەریا چیرۆكا باپیری و هەلبەستا خۆ نەچەمینن بوو، زێدەباری هندەك بەرهەمێن دی و دێ ل سەر ڤێ ڕێبازی دبەردەوام بین، چنكو كارێ مە خزمەتكرنا هونەرێ كوردی یە.
