نەکامی یێن ئافرەتەکێ
هیڤی چەلەنگ خورشید
ل ڕۆژەکێ ژ ڕۆژان خێزانەکا بچووک هەبوو، پێکهاتبوو ژ زەلامەکی ب ناڤێ ئارام، و ئافرەتەکا ب ناڤێ جوان. زەلام ژ ڕەفتارێن هەڤژینا خۆ جوانێ گەلەک یێ رازی بوو، بەلێ بتنێ ڕەفتارەکا وێ تێنەبیت، ئەو ژی ئەو بوو؛ دەمێ وێ بەحس و نەکامییا خەلکی دکر. هەرچەندە ئەو ئافرەت ب خۆ ژی د ناڤ مالا خۆ دا گەلەک یا پاقژ و بژوێن نەبوو، بەلێ د سەر خۆ ڕا ژی، هەردەم بەحس و نەکامییا خەلکی دکر.
ڕۆژەکێ وێ ئافرەتێ د پەنجەرکا خۆ ڕا دیت کو جیرانا وان یا جلکان دڕائێخیت، ئینا جوانێ گۆتە زەلامێ خۆ: «ئارام، ئارام، بەرێ خۆ بدە جیرانا مە چەند یا پیسە و جلکێن وێ هێشتا دقڕێژینە دێ ل ئاڤێ دەت و ئینیت ڕائێخیت، خۆلەکەکێ د ژۆر ڤە نینە، یان یا ل بەردەرگەهی یان ژی یا ل سەربانی.»
ئینا ئاخفتن ل دووڤ ئاخفتنێ پێ ڤەنان و نەکامییا وێ کر، «ئارام»ی ژی هەر گوهدارییا وێ کر هەتا ئاخفتنا خۆ ب دووماهیک ئینای. ئەوێ ڕۆژێ ئارامی خۆ بێدەنگ کر و دەنگ نەکرێ.
ڕۆژا پاشتر دگەل ڕۆژهەلاتێ و دگەل ویچویچا چویچکان و سیڤاندۆکان، پشتی چاڤێ ڕۆژەکا نوی دەرکەفتی و زارۆکان دەست ب یارییان کری، جارەکا دی جوانێ گازی ئارامی کر و گۆتێ: «دەمێ ئەز چوویمە ڤێ مارکێتا سەرێ کۆلانا مە، من هندەک کەلوپەل و سپیاتی کرین، پشتی ئەز ڤەگەڕیایم دیسان ئەڤ جیرانا مە ل بەردەرگەهی بوو و چاڤێ وێ ل خەلکێ کۆلانێ بوو… نوکە ژی بەرێ خۆ بدێ ب بەهانەیا ڕائێخستنا جلکان یا هاتییە سەربانی، خۆزی بەس تو بچی مالا وێ ببینی دێ بێژی سەرێ هار و دینانە، چاڤێ وێ هند ل سەر مالا وێ و پاقژییا مالا وێ نینە هندی ل خەلکی یە.»
دیسان هەر نەکامییا وێ دکر، ئارامی ژی هەر گوهدارییا وێ دکر. ڕۆژا د دووڤ دا جارەکا دی دەست ب وێ چیڕۆکا هەمی ڕۆژا کرەڤە، ئینا بێهنا ئارامی گەلەک تەنگ بوو و بۆ خۆ گۆت؛ دڤێت ئەز بۆ جوانێ بدمە دیارکرن کو ئەڤ ئاخفتن و بەحس و نەکامیێن ئەو ل سەر جیرانێ و خەلکی دکەت کارەکێ نەباش و خەلەتە.
پشتی تێشت خوارین، ئارامی ب زمانەکێ خۆش و نەرم گۆتە جوانا هەڤژینا خۆ: «هشیار بی، نەکامییا کەسێ نەکە، ما تو دزانی گونەها تێکڤەدان و نەکامییان چەند یا مەزنە…؟!»
دیسان گۆتێ: «ئەز گەلەک حەز ژ تە دکەم و ژ هەمی ئالییەکی ڤە تو دگەل من دا یا باشی، و ئەز ژ هەمی ساخلەتێن تە یێ رازیمە تنێ نەکامی و بەحسکرنا خەلکی نەبن. هەروەسا سپێدێ زویکا ئەز یێ ڕابووی و من پەنجەرێن مالێ یێن ژ تۆزێ پاقژکرین… هند تۆزێ گرتبوون دێ بێژی ئەڤە سالەکە نەهاتینە پاقژکرن، ڤێجا د سەر هندێ ڕا تو هێشتا بەحسێ قڕێژ و پیساتییا خەلکی دکەی! وەکی مەتەلەکا کوردی یا هەی دبێژیت: (تو دەرزیکێ د چاڤێن خەلکی دا دبینی بەلێ تو گێسنی د چاڤێن خۆ دا نابینی)… ئێدی ئەز داخوازێ ژ تە دکەم تو دەست ژ ڤی کارێ خۆ یێ نەڕەوا و خراب بەردەی».
جوانێ ژی سۆز دایێ کو ئێدی نەکامییا کەسەکی نەکەت و داخوازا لێبۆرینێ ژ ئارامی کر.
