هایبوون
زەكەریا حەمید
رژیار
شڕشڕا بارانێ بیرا من ل ژڤانێ مە یێ ئێكێ ئینا؛ دەمێ ل پاڕكا سەرهەلدان چاڤێن من ب چاڤێن تە كەڤتین و ئەز بەرەف تەهاتم، من تۆقە ل گەل تە كر.. هێش دەستێن مە تێكدابوون، بارانەكا رژیار بلەز باری… ئەم بەرەف دارا تویشەمبیێ چووین و لبن وێ دارێ قەمیسێ من یێ سپی ب خوینا تویشەمبیێ سۆر بوو، من ژی تبلا خۆ ل رویێ تە دا و من تامكرە خوینا وێ تویشەمبیا ل گەل شرینیا دێمێ تە تێكهەل بووی.. تە ژی ب وی دیمەنی دكرە كەنی.. وەی پا ئەز یێ بیرییا تە و تاما وێ تویشەمبیێ دكەم.
چپكەكا بارانێ،
ل سەر پەنجەرەیا من؛
تۆز ئینا خوار.
بێهن
هەر جارەكا تو ل بەر من ڕا دبۆری، بێهنەك دگەل تە دهێت و د سیێن من دا ئاكنجی دبیت, ئەو بێهن من سەر خۆش دكەت و بیرهاتنێن پێنج سالان نوی دكەتەڤە، ئەو بهێن نەیا گولاڤێن گران بها و گولێن باخچانە، بەلكو بێهنا میخەكێن چیاینە پشتی بارانەكا نەرم لێ ددەت.
عشقاتە وەك تابلۆیەكا زەقوڕێ یە ب بارانێ نە ب كێلانێ ژ ناڤ ناچیت.
بایێ باكوری،
پێلێن دەریایێ؛
ئینانە سەر كناری.
بێدەنگی
هندەك جاران بێدەنگی پتر پەیڤێن پەیامی دگەهینیت، نەخاسم دەمێ ئەم ب تنێ رادوەستین و دەستێن ئێك د گڤێشین… هنگی دلێن مە دەست ب دیالۆكەكێ دكەن كو بەس ئەز و تو تێدگەهین.. ب راستی ژی عشق ئەوە كو مرۆڤ پێدڤی ب گۆتنا چ تشتان نەبیت تنێ لێدانێن دلی بەسن بۆ تێگەهشتنا هەمی هەستا و ئاڤاكرنا جیهانەكا ئارام و سۆریالی.
د جادەیێ دا،
تنێ دو سیبەر هەبوون؛
ئەو ژی ب بوونە ئێك.
پەیڤ
هندەك جاران تیب شەرم دكەن ل هەمبەر نازكییا تە دەربكەڤن و پەیڤان دروست بكەن، دەمێ بەرامبەر تە د راوەستم زۆرانبازییێ ل گەل زمانێ خۆ دكەم دا كو پەیڤەكا هەژی تە ب بێژم.. لێ د هەمی كاودانان دا بێدەنگی وەك نەرمە بارانەكێ من شل دكەت؛ ئەو بێدەنگی نە ژ لاوازی و بێشیانییا منە بەلكو نازكییا تە ژ هەمی ئیدیەم و بێژە و پەیڤسازییا من.. دەرباز بوویە.
بایەكێ نەرم،
پەردەیا پەنجەرا من؛
یێ د هەژینیت.
دەرگەهێ نیڤ تاق
د ناڤبەرا چوون و هاتنێ دا دەرگەهـ وەك برینەكا نیڤ ساڕێژبووی دناڤ دیوارێن خانی دا، نە ب تەڤاڤی یێ ڤەكرییە كو من وێرەكییا هاتنە ژۆرێ هەبیت و نەیێ گرتییە كو هیڤیێن خۆ ل بن ڤەشێرم؛ ئەو شەقا تاری ئەوا د ناڤبەرا دەرگەهی و چارچۆڤەیێ وی دا.. دیمەنەكێ گۆمانا وی نیشان ددەت؛ تیڕۆژكێن كزێن دكەڤنە عەری.. دەرگەهێ نیڤ تاق بێ ئاماژەیە، نزانم كۆچبەر ببم و بچم، یان ئاكنجی ببم.
بایێ پاییزی..
د لەرزینا خۆدا هات،
سیتاڤ شەق ب بوو.
بەهشتا كوردی
ئێكەم ژڤانێ من و تە باران باری؛ بێهنا تە و بارانێ و عشق دناڤ سیێن من دا ئاكنجیبوون، وەكی دارێ كەمانجێ تبلێن تە د دەستێ من دابوون، دەنگێ كەنیا تە و پرچا تە یا رەش نە ب تنێ وێنەیەك بوو بەلكو بەهشتا كوردی بوو..! ئەو پیاسەیێن بن بارانێ ریتما ئاوازەكا نەوازە بوون؛ چەند خۆشە تو یا منی و ئەز یێ تەمە ئەی فریشتەیا بەهەشتا من.
میخەكێن رێزكری،
بێهنا وان بەلاڤبوو؛
جادە تژی كر.
