هه‌ر تشت ده‌رباره‌ى توكنولوژیا ڤار VAR
ئه‌ڤرۆ نيوز:
ته‌كنولوژیا ڤار رامانا وێ هاریكاریا ڤیدیوى یا دادڤانى، پشتى چه‌ندین سالان داخوازیا بكارئینانا ڤى سیسته‌مى هاتیه كرن بۆ جارا ئێكێ د قاره‌مانیا كیشوه‌ران دا ل سالا 2017 هاته ب كارئینان ژلایێ فیفایێ ڤه سه‌ره‌راى كو ئه‌ڤ شێوازه نه‌كریه د سیسته‌مێ كارێ خوه یێ فه‌رمى دا لێ بریارا بكارئینانا وێ ل موندیالا ئه‌ڤ ساله هاته دان پێخه‌مه‌ت ده‌ستڤه‌ئینانا ڤان ئارمانجێن خوارێ:
1_ ده‌مێ توماركرنا گۆلێن گومان تێدا هه‌ى: گه‌له‌ك جاران گۆل دهێته توماركرن و دادڤان پشت راست نینن كا ته‌په دروست ژ خه‌تا گۆلێ ده‌ربازبو یان نه یان ئه‌گه‌ر یاریزانه‌ك د ئوفسایدێ دابوو یان فاول بوو وه‌ك ئه‌و گۆلا هه‌لبژارتیێ ئیرانێ لسه‌ر ئسپانیا توماركرى و دادڤانى ب رێكا سیسته‌مێ ڤار ئه‌ڤ گۆله نه هژمارتى.
2_ لێدانا په‌نه‌لتیێ: هنده‌ك جاران دادڤان نه‌شێت بریارا دروست یا لێدانا په‌نه‌لتیێ بده‌ت له‌ورا بزاڤێ دكه‌ت ب رێكا سیسته‌مێ ڤار دێ شێت زانیت كا ئه‌و په‌نه‌لتى یا دروسته یان نه وه‌كى ئه‌و په‌نه‌لتیا بۆ به‌رازیل لگه‌ل كوستاریكا هاتیه لێدان و دیفدا دادڤانى ب رێكا سیسته‌مێ ڤار بریارا خوه لێڤه‌بوو
3_ ل ده‌مێ ب كارئینانا كارتێن زه‌ر وسور: د هنده‌ك رویدانێن ب دزى ڤه یان ژ ئه‌گه‌رێ یاریا زڤر ده‌مێ یاریان دا یاریزان بكار دئینن دژى یاریزانێن تیما هه‌ڤرك دویر ژ چاڤێن دادڤانان دیسان ئه‌ڤ سیسته‌مه ب رێكا كامیرێن چاڤدێریێ دێ شێت هاریكاریا دادڤانى كه‌ت كارتێن زه‌ر و سور ب كاربینت بۆ یاریزانان یان ئه‌گه‌ر ب خه‌له‌تى ڤه كارته‌ك بهێته دان بۆ یاریزانه‌كى وه‌ك بكارئینانا ڤێ ته‌كنولوژیاى ده‌مێ د یاریا هه‌لبژارتیێ كولومبیا و ژاپونێ دت یاریزانێ كولومبى كارلوس سانشێز ب كارتا سور هاته ده‌رخستن پشتى ب كارئینانا ته‌كنولوژیا ڤار.
كینه ئه‌وێن ل ژورا ڤار كار دكه‌ن: سێ دادڤانێن هاریكار د ڤێ ژوورێ دا هه‌نه و هه‌ر ئێكێ ب رێكا ته‌له‌فزیونه‌كێ و كامیرێن چاڤدێریێ كاره‌كى دكه‌ن ب ڤى شێوه‌ى.
1_ دادڤانێ هاریكار یێ ئێكێ كارێ وى ئه‌وه به‌رێخوه بده‌ته وان حاله‌تا ل ده‌مێ به‌ره‌وامیا یاریێ دا رویده‌ن.
2_ هاریكارێ دویێ كارێ وى به‌رێخوه ده‌ته وان حاله‌تێن رویداین لده‌مێ یاریێ دا ب شێوێ دوباره.
3_ هاریكارێ سیێ كارێ وى ئه‌وه ب رێكا كامیرا چاڤدێریێ حاله‌تێن ئوفسایدێ دیاربكه‌ت ئه‌وێن رویده‌ن.
بۆ زانین كامیرێن چاڤدێریا تایبه‌ت بۆ كارێ ڤان دادڤانان هاتینه دانان ئانكو نه ئه‌ون كامیره‌نه یێن وه‌ك پشته‌ڤان و خه‌لك د ته‌له‌ڤزیونێ دا دبینت.
كارێ سیسته‌مێ ڤار چیه و كه‌نگى دهێته داخواز كرن؟
ل ده‌مێ دادڤان یێ ژ بریارا خوه پشت راست نه‌بیت و حه‌ز بكه‌ت دوباره پێداچونه‌كێ د بریارا خوه دا بكه‌ت، یان ئه‌و دادڤانێن هاریكار د ژورا ڤار برێكا هێدفونێ داخواز ژ دادڤانى دكه‌ن بریاره‌كێ بده‌ت ئه‌گه‌ر دادڤانێ ڤیدیویا ڤار حاله‌ته‌ك د یاریێ دا دیت و دادڤانێ نیڤا یاریگه‌هێ ئاگه‌ه ژێ نه‌بوو، د ڤان حاله‌تان دا دادڤانێ یاریگه‌هێ دشێت سێ بریارا بده‌ت ل ده‌مێ سیسته‌مێ ڤار دهێته بكارئینان، یا ئێكێ بریارا خوه ب هه‌لوه‌شینیت لدیف ئاموژگاریێن دادڤانێن ڤیدیویا ڤار، یا دویێ به‌ر ب لایێ یاریگه‌هێ بچیت بۆ به‌رێخوه‌دانا حاله‌تى ب رێكا شاشه‌كا ته‌له‌ڤزیونى كو حاله‌ت تێدا دوباره دبیت، یا سیێ دادڤانێ ئێكێ یێ یاریگه‌هێ گوهداریا ئاموژگاریێن دادڤانێن ڤار نه‌كه‌ت و پشتبه‌ستنێ لسه‌ر بریارا خوه بكه‌ت.
