هه‌لبژارتیێ كوردستانێ ئه‌ڤرۆ دێ یاریا خوه یا ئێكێ ل روسیا كه‌ت
روسیا،ملله‌ت جه‌مال:
چاڤه‌رێ دهێته‌كرن ئه‌ڤرۆ ل ده‌مژمێر 3:00 پشتى نیڤرۆ ل دیڤ ده‌مێ كوردستانێ هه‌لبژارتیێ هه‌رێما كوردستانێ یاریا خوه یا ئێكێ ژ قاره‌مانیا كونیفا یا 2016 ئه‌نجام بده‌ت ل گه‌ل هه‌لبژارتیێ هه‌رێما سزیكلاند یا رومانى.
شاندێ هه‌لبژارتیێ كوردستانێ ل رۆژا پێنج شه‌مبیا بورى گه‌هشت بوو هه‌رێما ئه‌بخازیا ل روسیا و رۆژا پاشتر هه‌ینى یه‌كا خوه یا ئێكێ یا راهێنانى كر و دوهى دووماهى راهێنانین خوه كرن بۆ یاریا ئێكێ ژ قاره‌مانیێ هاریكارێ راهێنه‌رێ هه‌لبژارتیێ هه‌رێما كوردستانێ خالد موسا بۆ رۆژناما ئه‌ڤرۆ دیاركر یاریێن ده‌ستپێكێ د هه‌ر قاره‌مانیه‌كێ یان خوله‌كێ دا بێ گومان ب زحمه‌تن تایبه‌ت د قاره‌مانیێن ب ڤى ره‌نگى دا كو مه وه‌كو ده‌سته‌یا راهێنه‌رى چو پێزانین مه‌زن ل سه‌ر ڤى هه‌لبژارتیێ هه‌رێما رومانى نین و ئه‌ڤ چه‌نده ژى دێ بیته ئه‌ركه‌كێ ب زحمه‌ت له‌ورا دڤێت ب هشیارى ڤێ یاریێ بكه‌ین و چو كێماسى د پێكهاتیێ دا نین هه‌مى یاریكه‌ر د به‌رهه‌ڤن بۆ كرنا یاریا ئه‌ڤرۆ، ئارمانجا سه‌ره‌كى ئه‌وا سێ خالێن یاریێ ب ده‌ستخوڤه بینن و پێنگاڤا ئێكێ ب سه‌ركه‌فتیانه پاڤێژین.
ژلایه‌كێ دیڤه كابتنێ هه‌لبژارتیێ كوردستانێ خالد موشیر گوت: قاره‌مانیێن كونیفا گه‌له‌ك تیم هه‌نه خودان شیان و ئاستێ وان گه‌له‌ك یێ باشه و یاریا مه یا ئێكێ ل گه‌ل هه‌لبژارتیێ سزیكلاند دێ یا ب زحمه‌ت بیت ژبه‌ركو مه چو پێزانین ل سه‌ر ڤى هه‌لبژارتى نین و هه‌لبژارتیێن ب ڤى ره‌نگى ل ئورۆپا دژین بێ گومان ئه‌و گهورینا د پێكهاتیێن خوه دا كه‌ن و به‌رى نوكه ژى من پشكدارى د قاره‌مانیێن كونیفا دا كریه و ئاستێ گه‌له‌ك هه‌لبژارتیێن پشكدار دبنه سپرایزه‌ك بوو ئاماده‌بوون و هه‌لبژارتیێن پشكدار ژبه‌ركو گه‌له‌ك هه‌رێم هه‌نه یاریكه‌ران ژ ده‌رڤه‌ى هه‌رێما خوه ئینن سه‌ر ب هه‌رێمێن خوڤه لێ ل ئورۆپا دژین .
هه‌ژى گوتنێ یه دوهى ئاهنگا ده‌ستپێكرنا قاره‌مانیا كونیفا یا دوێ هاته ڤه‌كرن كو ب پشكداریا 12 هه‌رێمان ئه‌وێن سه‌ربه‌خویا خوه نه وه‌رگرتین كو ئه‌ڤ قاره‌مانیه به‌رى نوكه د هاته ڤه‌كرن ب ناڤێ قاره‌مانیا ڤیڤا كو هه‌لبژارتیێ كوردستانێ شیابوو ل سالا 2012 ڤێ قاره‌مانیێ ب ده‌ستخوڤه بینت و ل سالا 2014 ناڤێ ڤێ قاره‌مانیێ گوهورت ب ناڤێ قاره‌مانیا كونیفا .