هونه‌رمه‌ندێن زاخۆ دخوازن ژ یێن دهۆكێ جودا ببن…….. مه‌هدى مونیر: دو سال و یازده هه‌یڤه سه‌ندیكا دهۆكێ ئێك دینار ژى نه‌دایه مه
ئه‌ڤرۆ نیۆز، شاكر ئه‌تروشى:
به‌رپرسێ سه‌ندیكا هونه‌رمه‌ندێن كوردستانێ/ نڤێسینگه‌ها زاخۆ، د دیداره‌كا تایبه‌تدا بۆ ئه‌ڤرۆ نیۆز گۆت: دسێ سالێن بۆرى دا كانیا هونه‌رى ل زاخۆ وه‌ك خوه نه‌مایه، لێ ئه‌ز نابێژم ئاڤا وێ یاچك دبییت، به‌لكو یا كێم دبیت و هه‌كه بێژم شێلى ژى نه‌بوویه ئاڤا وێ وه‌ك به‌رێ زه‌لال نه‌مایه، له‌ورا مه داخوازكریه وه‌ك نڤیسنگه‌ه ژ دهۆكێ جودا ببین و لقه‌كێ سه‌ندیكایێ ل زاخۆ بهێته ڤه‌كرن و دێ ل سه‌ر داخوازا خوه رژدبین.
مه‌هدى مونیر، به‌رپرسێ سه‌ندیكا هونه‌رمه‌ندێن كوردستانێ/ نڤیسینگه‌ها زاخۆ، گۆت: د سێ سالێن بۆرى دا وارێ هونه‌رى ژى ل زاخۆ وه‌كى هه‌ر واره‌كێ دا دقوناغه‌كا سه‌خت دا ده‌رباز بوویه، ئه‌و ژى ژئه‌نجامێ قه‌یرانا ئابوورى بوویه، راسته سێ سالێن ب زه‌حمه‌ت بوون و كارتێكرنا وێ ژى یا گران بوو، لێ ل دووف شیانێن هه‌ین هه‌تا پتریا جاران ب خوه‌به‌خشى ژى كاركریه و نه‌هێله كاروانێ هونه‌رى ل ده‌ڤه‌رێ راوه‌ستیێت، چونكو دكه‌ڤندا زاخۆ ب كانیا هونه‌رى هاتیه نیاسین، نوكه ژى ئه‌و كانى مایه، لێ كاودانان نه‌چاركریه كو ئاڤا وێ وه‌كو به‌رێ یا زه‌لال نه‌بیت، راسته ئه‌و بزاڤێن هاتینه كرن وه‌ك پێدڤى نه ل دووف حه‌زا مه بووینه و مه باشتر دڤێا، لێ چ بكه‌ین كارتێكرن ل هه‌موو وارێن ژیانێ كریه، به‌س ئه‌م هه‌ر دێ خوه راگرین و هیڤیا من ئه‌وه سالا نوو 2018 ساله‌كا پرى خۆشى و سه‌روه‌رى بیت و كاودان وه‌كو به‌رێ و باشتر لێ بهێن دا هونه‌رمه‌ندێن زاخۆ بشێن به‌رده‌وامیێ ب كاروانێ خوه یێ هونه‌رى بده‌ن.
هه‌روه‌سا گۆت: جهێ داخێ یه دڤان سێ سالان دا هنده‌ك هونه‌رمه‌ندێن باش ژنه‌چارى زاخۆ بجه هێلان و چوونه ئورۆپا و هۆكارێ سه‌ره‌كى ژى قه‌یرانا ئابوورى بوویه، هه‌روه‌سا هنده‌ك وان ژ كارێ هونه‌رى دوور كه‌فتینه و بۆ خوه كاره‌كێ دى دكه‌ن دا مالا خوه پێ ب خودان بكه‌ن، هه‌روه‌سا مه هونه‌رمه‌ند هه‌بووینه كاره‌ك بۆ خوه دكر و ئه‌و داهاتێ بۆ دهات پشكه‌كا وى ل كارێ خوه یێ هونه‌رى د مه‌زاخت چونكو وى نه‌ڤیایه كارێ وى راوه‌ستێت یان گیرۆ ببیت.
مه‌هدى مونیر گۆت: پتریا هونه‌رمه‌ندێن زاخۆ سترانبێژ و مۆزیكژه‌ن و شانۆڤان و شێوه‌كار و فلم ساز و په‌یكه‌رسازان وه‌ك پرۆژه به‌رهه‌مێن باش ل به‌ر ده‌ست هه‌بوون لێ ژبه‌ر نه‌بوونا پشته‌ڤانیێ نه‌شیاین ئه‌نجام بده‌ن و ره‌نگه دل ساریه‌ك ژى ل ده‌ف هنده‌كا په‌یدا بیت چونكو هنده‌ك سترانبێژ هه‌بوون حه‌ز دكرن كلیپه‌كێ چێ بكه‌ن لێ ژبه‌ر نه‌بوونا پاره‌ى نه‌شیان، و ئه‌ڤه ژى جهێ داخێ یه.
ل دۆر پشته‌ڤانیا دام و ده‌زگه‌هێن حزبى و حكومى، هه‌روه‌سا كومپانیێن بازرگانى ل زاخۆ بۆ پالپشتیا هونه‌رى ل وێ ده‌ڤه‌رێ مه‌هدى گۆت: ل زاخۆ هژماره‌كا زۆرا بازرگان و كۆمپانیێن بازرگانى هه‌نه لێ مخابن خوه ل هونه‌رى نه‌كریه خودان، له‌ورا هه‌رده‌م ئه‌م دبێژین خێرا كۆمپانیێن زاخۆ بۆ باژێرێ زاخۆ نینه، راسته هنده‌ك كۆمپانى هه‌بووینه سپۆنسه‌ریا كلیپه‌كێ كریه دا لوگۆیێ كۆمپانیێ دانیته دناڤ كلیپێ دا و ئه‌م دزانین مه‌ره‌ما وى پتر ئه‌و دا ریكلامێ بۆ خوه بكه‌ت، له‌ورا هاریكاریا كه‌رتێ بازرگانى بۆ كه‌رتێ هونه‌رى ل زاخۆ یان نه‌بوویه، یان هه‌كه هه‌بیت ژى گه‌له‌كا لاواز بوویه و نه ل دووف ئاستێ پێدڤى بوویه، ده‌رباره‌ى پشته‌ڤانیا حزبى ژى به‌رى چه‌ند هه‌یڤان مه وه‌ك ده‌سته‌یا سه‌ندیكایێ سه‌ره‌دانا لقێ پارتى ل زاخۆ كربوو، و سۆز ب مه هاتبوو دان باره‌گایێ مه یێ سه‌ندیكایێ نووژه‌ن بكه‌ن و دو جاران لژنێن وان سه‌ره‌دانا مه‌كرینه و ڤه‌دیتن چێكرینه، لێ هه‌تا نوكه د وارێ پراكتیكى دا ده‌ست ب نووژه‌نكرنێ نه‌هاتیه كرن، و هیڤیا مه ئه‌وه ئه‌و سۆز بهێته بجه ئینان.
به‌رپرسێ سه‌ندیكا هونه‌رمه‌ندێن كوردستانێ/ نڤیسینگه‌ها زاخۆ، ل دۆر وێ پشته‌ڤانیا سه‌ندیكا هونه‌رمه‌ندێن كوردستانێ/ لقێ دهۆك، د سێ سالێن بۆرى دا بۆ نڤیسینگه‌ها زاخۆ كرى، گۆت: هه‌ر ژ ده‌مێ هه‌لبژارتنێن مه ل 3/10/2015 هه‌تا نوكه، ئانكو دوسال و یازده هه‌یڤه سه‌ندیكا دهۆكێ ئیك دینار ژى نه‌دایه مه، و گۆتنه مه ده‌رگه‌هى بگرن، لێ باژێره‌كێ وه‌كى زاخۆ كو ب لاندكا هونه‌رى دهێته نیاسین مه ده‌رگه‌هێ سه‌ندیكایێ نه‌گرت، چونكو چاوا ده‌رگه‌هێ سه‌ندیكایێ بگرم و مه (120) ئه‌ندام هه‌بن، هه‌روه‌سا رۆژ نینه هه‌كه شانده‌ك نه‌هێته ده‌ف مه، و بۆ زانین مه كارمه‌نده‌كێ هه‌ى چایچى یه ئه‌ڤه (11) هه‌یڤه فلسه‌ك ژ ده‌ف مه نه‌وه‌رگرتیه، له‌ورا ژبه‌ر وان ئه‌گه‌ران مه داخوازكریه ئه‌م ژدهۆكێ ڤه‌بین چونكو د په‌یره‌وى دا هاتیه هه‌كه ل جهه‌كى (30) ئه‌ندام هه‌بن دێ نڤیسینگه‌ه لێ هێته ڤه‌كرن، هه‌كه بوونه (50) ئه‌ندام مافێ هه‌ى لقه‌كێ سه‌ندیكایێ بهێته ڤه‌كرن، ئه‌ڤه مه ل زاخۆ دو پێنجى و پتر یێن هه‌ین، له‌ورا ژ رۆیێ یاساى ژى ڤه یا دروسته و مه ئه‌ڤ داخوازه ژ سه‌ندیكایا گشتى كریه و ئه‌م ژ داخوازا خوه لێڤه نابین.