هژمارا كاندیدێن وه‌زاره‌تێن عیراقێ هاتنە ئاشكرا كرن
ئەڤرۆ نیوز ، زنار تۆڤی:
نڤێسینگه‌ها عادل عه‌بدولمه‌هدى یێ هاتیە راسپاردن بۆ پێكئینانا حوکمه‌تا نوو یا عیراقێ هژمارا وان كاندیدان ئاشكراكر یێن كو (سی ڤی) یێن خوە پێشكێش كرین بۆ هندێ کو پۆستێ وه‌زیران وه‌ربگرن كو دناڤا وان دا 600 كاندید ئێكلایی بووینه بۆ هندێ کو دانوستاندن ل دۆسیێن وا بهێتە کرن.
نڤێسینگه‌ها عادل عه‌بدولمه‌هدى ئاشكراكر كو ل پێنجشه‌مبیا بوری ده‌رگەهێ پێشكه‌شكرنا سی ڤی یان بۆ خوە کاندیدکرنێ بۆ پۆستێن وه‌زاریرێن حوکمه‌تا عیراقێ هاتیە داخستن و دناڤا سه‌رجه‌م وان كه‌سێن (سی ڤی) پێشكێش كرین 15 هزار و 184 یان مه‌رجێن پێدڤی تێدا هەبوون، کو ئەڤە ژی یا په‌یوه‌ندیداره ب پسپۆری و ته‌مه‌نی و چه‌ند مه‌رجێن دیتر ڤه.
ژ وێ رێژێ ژی 601 كه‌س ژ وان یێن سی ڤی یێن خوە پێشكێش كرین ژ‌لایێ عادل عه‌بدولمه‌هدی ڤە هاتینە ده‌ستنیشان كرن بۆ هندێ کو دناڤا وان دا كابینا وه‌زارەتێن خوە هه‌ڵبژێریت كو دێ ژ لایێ چه‌ند لیژنێن تایبه‌تڤه لدووڤ وه‌زارەتان هێنە جۆدا کرن و پاشی دێ هێنە گازیکرن بۆ هندێ کو چاڤپێكه‌فتن ل گه‌ل وان بهێتە کرن.
لدووڤ وێ به‌یانناما نڤێسینگه‌ها سه‌رۆك وه‌زیرێن هاتیە راسپاردن دناڤا وان كه‌سێن سی ڤی یێن خوە پێشكێش كرین 1778 ژ وان هه‌لگرێن باوەرناما دكتۆرایێ نە و هەروەسا هه‌لگرێن باوەرناما ماسته‌رێ ژی 2200 كه‌س بوون و دیسا 96% ژ وان بێلایه‌ن بووینە.
