هژمارەك پێشمەرگێن شورەشا گۆلانا پێشكەفتن خواز رۆژانێن خوە ڤەدگێرن
لەزگین جوقی:
د خیڤەتگەها سیاسی و روشەنبیری دا، ئەوا هاتیە ئامادەكرن ژلایێ لقێ ئێك یێ پارتی دیموكراتی كوردستان، هژمارەك پێشمەگێن شورەشا گولانێ كو ل وی دەمی ئەركێن جودا جودا هەبووینە ئامادەبوون و رولێ خو دناڤ شورەشێ دا بەرچاڤكرن.
سادق گەلناسكی، پێشمەرگێ شورەشا گولانی بۆ ئەڤرۆ دیاركر دەمێ شورەشا گولانی دەستپێكری، خەلكێ زور ژ هەموو دەڤەران قەستا ناڤ شورەشێ كر ل وی دەمی ل سنۆرێ دناڤبەرا توركیا و هەرێما كوردستانێ مە دەستپێكر، گەلەك جاران مە كەمینە دانان دەستكەفتێن مەزن دەست مەڤە هاتن و گۆت: ل بیرا من دهێت گەلەك چەك مە ژ دوژمنی وەرگرت ئەو هاتبوونە كوشتن ژلایێ بەرواریان و ئەڤە دەستكەفتێ كەمینەكا پێشمەرگەی بوو و ب وی چەكی ئەم شیاین شەری بكەین و بەرامبەر دوژمنی راوەستین، چەكێ پێشمەرگەی ل وی دەمی كلاشینكوف و بی كەی سی و ئارپێچی و دوشەك وهاون بوون ب ڤی چەكێ كێم ئەم دشیاین شەرێن مەزن بكەین و دەستكەفتێن مەزن ب دەست مەڤە هاتن ب رۆژ و شەڤەكێ نەشێن بەحسێ شورەشا گولانێ بكەین گەلەك دەستكەفت هەبوون ڤێ شورەشی».
حەیدەر حاجی حەیدەر، پێشمەرگێ شورەشا گولانێ بۆ ئەڤرۆ دیاركر كو بەری شورەشا گولانی دەست پێ بكەت ب چەند رۆژان ئەم كۆمەكا پێشمەرگەیان پێكڤە كومبووین مە بریارا دا هندەك رێكخراوان ڤەكەین د ئەنجامدا ئەم شیاین سێ رێكخراوان ڤەكەین ئەوژی رێكخراوا گارە، لەیلا قاسم و رێكخراوا كاوە ئەڤ هەر سێ رێكخراوە مە ل دهۆكێ ب شیوەیەكێ نهێنی دروستكرن و پاشی ئەم چووینە مووسل ل پارێزگەها مووسل مە رێكخراوا چارێ ب ناڤێ رێكخراوا ( ئاسن) مە دامەزراند.
ئاماژە ب وێ چەندێ ژی كو پشتی ئەڤ هەر چار رێكخراوێن هاتینە ڤەكرن گەلەك خەلك ب نهێنی گەهشتنە مە هێدی هێدی مە دەست بكار و چالاكیان كر ب شەڤێ دروشمێن ئازادی و روخاندن ونەمانا حكۆمەتا دكتاتور یا عیراقێ مە ب دیواران ڤەكرن و گەلەك جاران دوژمنی دەنگ و باسێن دژی پێشمەرگەی بەلاڤكرن ب شەڤێ ب رێیا بەلاڤۆكا و پوستەیان مە ئەو دەنگ و باس ب نە راست ل قەلەم دانان مە پۆستەر دیواران ڤە دكرن ب تنێ ئەم نەشێین دیوارێن ئەمنی ڤە بكەن، ژبەركو ل وی دەمی هەموو كار ب نهێنی هاتنە كرن مە گەلەك خۆ پاراست ب مخابنی ڤە جارەكێ حكومەتا دكتاتور یا بەعسیان ل مووسلێ ب مە حەسیان د ئەنجامدا ئەم دەستەسەركرن برینە زیندانا ئەبۆ غریب ئەم تەعزیب مە كرن داكو دانپێدانێ بكەین هەموو جۆرێن ئەشكەنجەدانێ دگەل مە ب كارئینان هەتا ئەو پوستەرێن مە شەڤ بەلاڤ كرن ئینانە دانانە سەر مێزێ و گۆتن ئەڤە كێ چێكرینە دەست ب ڤەكۆلینەكا گەلەك دژوار كرن ئەم نەچاركرین ب ریێا ئەشكەنجەدانێ مە دانپێدان ل سەر كار وچالاكیێن خۆ كر وحكومەتا دكتاتور یا بەعسیان ئەز بۆ دەمێ 15 سالان زیندانكرم پشتی بۆرینا سێ سالان بریارەكا گشتی ژ بەغدا دەركەڤت ئەم ئازاد كرین لێ بەری مە ئازاد بكەن سوزنامەك سەر مە چێكرن دەستان ژ كارێ سیاسی بەردین وپاشی هاتینە ئازادكرن».
نزار بریفكانی، ئەندامێ چاپكرنێ ل سەر دەمێ شورەشا گولانی دیاركر، دەمێ ئەز بوویمە پێشمەرگە ئەز هاتمە وەرگرتن ل چایجانا خەبات كارێ مە چاپكرنا پرتووك و بەلاڤووك و پوستەر و كوڤارا خەبات بوو، ل وی دەمی كارێ چاپكرنێ گەلەك یێ ب زەحمەت بوو ژبەر كو ئامیرێن وی دەمی هەموو ب دەستی بوون ل سەر كاغەزێن سلنس مە چاپ دكر و پشتی هینگی مە رونی دان مە دەرئێخست هەتا بو مە ئامیرەكێ فوتوستنسیل هاتی، دناڤ رێكخراو و بارەگایێن پارتی مە كارێ چاپكرنێ دكر و گەلەك پرتووك مە چاپكرن وخزمەتەكا مەزن بۆ شورەشێ هاتە كرن هەموو بەلاڤووكێن پارتی ژلایێ مە ڤە هاتنە چاپكرن ب شەڤ و رۆژ كار ل سەر بەلاڤووك و كوڤاران دهاتە كرن و ئەڤ ئامیرە گەلەك جاران ب نهێنی ژ ئیرانێ بۆ مە دهاتن».
مەحمەد سەعید شەریف، كو ل شورەشێ بەرپرسێ لیژنا ناوچا شێخان یا قوتابیان بوو بۆ ئەڤرۆ دیاركر رێكخراوێن جەماوەر ی ل وی دەمی قوتابی و لاو وئافرەت ل خۆ كومكرن وئێكەتیا زانایێن ئاینی و نڤیسەران و ماموستایان هەموویان پێكڤە كار دكرن و ئێكەتیا قوتابیان گەلەك رۆل هەبوو گەرماتیا وان دناڤ شورەشی دا گەلەك بوو و و گەرماتیی د دانە پێشمەرگەی وسەرپەشتیا ئاهەنگان دناڤ قوتابیان دا دهاتە كرن و گەلەك چالاكی ئەنجامدان و ل هەر جهەكی ئیكەتیا قوتابیان رۆلی خۆ هەبوو دناڤ شورەشی دا، رۆلی هشیاركرنا وەلاتیان دگێران و ئەو گوتگوتكێن دوژمنی دناڤ خەلكی دا بەلاڤ دكرن، ئیكەتیا قوتابیان و رێكخراوێن جەماوەری و پێشەی راستی د گەهاندنە خەلكێ كوردستانێ ل هەموو دەڤەران و گۆت: ب رێیا لیژنێن قوتابیان سەرەدانا گوند و دەڤەران دهاتە كرن داكو خەلك زێدەتر هەڤكار بیت دگەل پێشمەرگەی و ئافرەتا كورد رۆلەكێ گەلەك مەزن هەبوویە د شورەشێ دا مل ب ملێ گەنج و لاوان كار دكرن بۆ ئازادیا كوردستانێ دناڤ زانكۆیا دا بەردەوام پەیوەندی دگەل قوتابیان هاتە كرن دناڤ باژێر و هەموو دەڤەران دا گەل لاوان كار دهاتە كرن بۆ سەركەفتنا شورەشێ و گەلەك قوتابی هاتنە دەستەسەركرن وشەهیدبووینە، دگەل ڤێ چەندێ چو جاران قوتابی نەراوەستان وچالاكیێن خۆ ئەنجام ددان هەردەم پەیوەندی دگەل جەماوەری هەبوون هەتا سەرهلدانێ ژی قوتابیان رۆل هەبوویە و هاتنە دناڤ جەماوەری دا بۆ سەرهلدانێ.
