هیڤییا ل سەر تەختێ داری
ئەڤراز حامد نسری
بارانەکا هوور ل پەنجەرەیێن پۆلێ ددا. دەنگێ برویسیان و بای دگەل لێدانێن دلێ ئاریانی ببوونه ئێک ئاواز. مامۆستا، ب خەندەکا خۆ یا گەرم و چاڤێن تژی دلۆڤانی، ل بەردەم تەختێ ڕەش ڕاوەستیا، پێنوسێ خۆ بلند کر و ناڤێ داڕشتنا ئەڤڕۆ دیارکر:
«قوتابیێن من یێن خۆشتڤی، هەر ئێک ژ هەوە دێ پارچە نڤیسینەکێ ل سەر مێهرەبانییا دایکێ نڤێسیت.»
د وی دەمی دا، دەنگێ تەقەیا پێنوسان د پۆلێ دا بلند بوو. هەر زارۆکەک ب کەیف و لێهاتوویی دەست ب ڕێزکرنا پەیڤان کر، بەلێ پێنوسێ ئاریانی د ناڤبەرا تبلێن وی یێن بچووک دا سست و بێ لڤین بوو. پەڕێ وی یێ سپی چاڤەڕێی پەیڤان بوو، بەلێ پەیڤێن «دایکێ» بۆ وی د غەریب و دوور بوون. وی سەری خۆ چەماند، دلەکێ بچووک ل سەرێ پەڕی کێشا و د ناڤ دا نڤیسی: (دایک). پاشان ب چاڤێن تژی رۆندك و دەستەکێ ب لەرزی ڤە، ئەڤ نامەیە بۆ مامۆستایا خۆ نڤیسی:
«مامۆستایا من، من دایک نینە دا بزانم دایک چەوایە، خۆزیکا ئەز ژی چووبامە دەڤ وێ، دا بزانم ل بەهەشتێ چ دکەت. مامۆستایا من، من ژن باب یا هەی لێ ئەز نەشێم وێ ل جهێ دایکا خۆ وەسف بکەم، هیڤی دکەم ل من ببۆری کو من چ تشت نەزانی بنڤێسم…»
کەتوارێ پۆلێ ب بێدەنگییەکا کڕ هاتە نخافتن. دەمژمێر گەهشتە دەمێ کۆمکرنا دەفتەران. ئاریانی دەفتەرا خۆ گرت، دانا سەر مێزا مامۆستایا خۆ، و ب پێنگاڤێن گران بەرەف مال ڤە چوو. ل سەرێ شەڤێ، دەمێ بارانێ کۆلانێن باژێڕی پاقژ دکرن، ئاریان ل سەر جهێ خۆ نقۆ خەونەکا کوور ببوو. خۆ د ناڤ باخچەکێ مەزن و تژی ڕۆناهی دا دیت. ئەرد هەمی ب گژوگیایێ کەسک و گولێن سپی یێن بێهنخۆش خەملی بوون. ل بن سیبەرا دارەکا مەزن، ژنەکا بالابەرز یا ڕاوەستیای بوو، وێ ژنێ دەفتەرەک د دەستی دا بوو، ئەو دایکا وی بوو! ئاریانی هاوار کر: «دایکێ!» و بەرەف هەمبێزا وێ بەزی. دایکێ دەستێن خۆ یێن نەرم ل سەر سەرێ وی دانان و گۆتێ: «کۆڕێ من یێ شرین… نامەیا تە گەهشتە من. پەیڤێن تە ل ڤێرێ ببوونه گۆل.»
«ڕوژا پاشتر، ئاریان هاتە پۆلێ. ترسا وێ چەندێ د دلی دا بوو کا مامۆستا دێ چ بێژیتێ ژبەرکو داڕشتن ب فۆڕمێ ڕەسمی نەنڤیسی بوو. مامۆستا هاتە د ناڤ پۆلێ دا، چاڤێن وێ سۆر ببوون و دیار بوو کو هەتا درەنگی شەڤ دگریا.
مامۆستا ڕاستەوڕاست بەرەف تەختێ ئاریانی چوو. ل پێشیا وی چۆک دا، دەستێن وی یێن بچووک کرنە د ناڤ دەستێن خۆ یێن گەرم دا، و ب دەنگەکێ نزم و پڕی سۆز گۆت: «ئاریان… ژ ئەڤڕۆ و پێڤە، دەمێ تو دنڤێسی دایک، چاڤێن خۆ بگرە و هزر د من دا بکە. ئەز نە بتنێ مامۆستایا تەمە، ئەز دایکا تە مە ژی.»
د وی دەمی دا، ئاریانی هەست پێ کر کو ئەو گەرمییا خەونا شەڤێ، یا هاتیە د ناڤ پرۆسا سارا پۆلێ دا، و پێنوسێ وی یێ رساسی جارەکا دی فێری نڤیسینا پەیڤا «هیڤیێ» بوو.
