هێرشا بارسێلۆنا و رێفراندۆما كه‌ته‌لۆنیا چ په‌یوه‌ندی هه‌بوو؟
ئه‌ڤرۆ نیوز; ڤه‌ده‌ر ره‌شاڤای:
پارتێن جوداخواز یێن هه‌رێما كه‌ته‌لۆنیا د رژدن ل سه‌ر رێفراندۆما سه‌رخوه‌بوونا وێ هه‌رێمێ ژ سپانیا ل چرییا ئێكێ یا ئه‌ڤ ساله، سپانیا ژی وێ گاڤا كه‌ته‌لۆنیا ب نه‌قانوونی ددانیت.
د ده‌مه‌كی دا گه‌رمه‌گه‌رما مژارا سه‌رخوه‌بوونێ ل هه‌ڤده‌ی ڤێ مه‌هێ ل جاده‌یا كه‌ته‌لۆنی ده‌ست پێ كربوو، هێرشێن تیرۆرستی ل بارسێلۆنا یا پایته‌ختا كه‌ته‌لۆنیا هاتنه كرن و د ئه‌نجام دا 16 كه‌س هاتنه كوشتن و بده‌هان كه‌س بریندار بوون، وێ یه‌كێ ژی سوحبه‌تا رێفراندۆمێ بۆ ده‌مه‌كی ژ بیرا خه‌لكێ وێ هه‌رێمێ بر.
هه‌رچه‌نده داعشێ به‌رپرسیارییا خوه ژ وان هێرشان راگه‌هاند، لێ سه‌ركرده‌یێ كه‌ته‌لۆنیا وه‌ك ئاماژه‌ك بۆ پیلانگێرییا سپانیا دژی رێفراندۆمێ، حكومه‌تا ناڤه‌ندی سووچبار كر كو بۆدجه‌یێ هێزێن ئێمناهیێ ل هه‌رێما وی كێمكرییه له‌ورا ئه‌و هێرش په‌یدا بوون.
كارلس پۆجدیمۆند، سه‌رۆكێ كه‌ته‌لۆنیا گۆت: مه ژ وان خواست یاریێن سیاسێ ب ئاساییشێ نه‌كه‌ن، مخابن حكومه‌تا سپانیا پێشترینیێن دی هه‌نه.
راخۆی، سه‌رۆكوه‌زیرێن سپانیا ژ ئالیێن كار بۆ جودابوونا كه‌ته‌لۆنیا ژ سپانیا دكه‌ن خواست ده‌ست ژ پلانێن خوه به‌رده‌ن، هه‌روه‌سا گه‌ف ل ئالیێن رێفراندۆمێ رێكدئێخن كر كو دێ هێنه سزادان ژبه‌ركو دادگه‌هێ ئه‌و رێفراندۆم ب نه‌قانوونی بناڤ كرییه.
هه‌روه‌سا سپانیا خه‌لكێ كه‌ته‌لۆنیا دترسینیت كو د گه‌ل جودابوونێ ئێدی كه‌ته‌لۆنیا پشكه‌ك نابیت ژ ئێكه‌تییا ئه‌ورۆپا و ئه‌و ئێكه‌تی هاریكارییا وێ ناكه‌ت.
كه‌ته‌لۆنیا سوپایێ خوه نینه لێ پلانا خوه دانایه بۆ چێكرنا هێزه‌كێ و راگه‌هاندییه: هه‌كه‌ر ده‌نگێ “به‌لێ” بسه‌ركه‌فیت د ده‌مێ 48 ده‌مژمێران دا دێ سه‌رخوه‌بوونێ راگه‌هینیت، پێدڤییه وی ده‌می سوپایێ سپانیا ژ هه‌رێما وان ده‌ركه‌ڤیت و ئێدی ده‌ستهه‌لاتا شاهانه یا سپانیا ژی ل سه‌ر خوه قه‌بوول ناكه‌ن.
هه‌روه‌سا كه‌ته‌لۆنیا ئاماژه دكه‌ت و دیار دكه‌ت: هه‌رده‌ما سپانیا بۆ سه‌رخوه‌بوونێ دانوستانان د گه‌ل وان نه‌كه‌ت ئه‌و پشكه‌ك نابن ژ دانا قه‌رێن كو چه‌ندین ساله ژبه‌ر قه‌یرانا ئابۆری ل سه‌ر سپانیا كۆم بووی.
سه‌رۆكێ كه‌ته‌لۆنیا ژی راگه‌هاندییه هه‌رده‌ما نه‌خێر سه‌ركه‌فت ئه‌و خوه دوباره به‌ربژار ناكه‌ت.
ده‌ستوورێ سپانیا رێ ب حكومه‌تا ناڤه‌ندی دده‌ت كه‌ته‌لۆنیا نه‌چار كه‌ت ده‌ست ژ رێفراندۆمێ به‌رده‌ت.
ل سالا 2014ێ ژی كه‌ته‌لۆنیا رێفراندۆمه‌كی بۆ مافێ چاره‌نڤیسی كربوو و 80% ب به‌لێ ده‌نگ دابوو، سپانیا ب به‌هانه‌یێن جودا شیا ئه‌نجامێن رێفراندۆمێ ئالۆز بكه‌ت و ره‌ت بكه‌ت، لێ پشته‌ڤانێن سه‌رخوه‌بوونێ ده‌ست ژ بزاڤێن خوه به‌رنه‌دا و د به‌رده‌وامن.