هێزا خوینا شەهیدان
مووسا ئەحمەد زێباری
ئەڤە ماوەكە ژ لایێ چەند بەرپرسین بالا یێن حوكمەتا فیدرالیا ئیراقێ و سەركردەیێن بلندێن لایەنێ سیاسی شیعە دبێژن كو بڕیارا حوكمەتا فیدرالی ژبۆ رادەستكرنا چەكی ژلایی هێزێن چەكدار بۆ دەستێ دەولەتێ دروستە و دڤێت پێشمەرگە ژی چەكی ڕادەست بكەت، لڤێرە دا دو تشتێن ژێك جیاواز هەنە، ئەو ژی حوكمەتا هەرێما كوردستانی ل دویڤ یاسا و شەرعەتان و حوكمەت و پەرلەمان و هێزا پێشمەرگەی و سنوور هەمی هەیە و یاساییە و هەروەسا هەر وەكو جەنابێ سەرۆك و لێڤەگەرێ گەلێ كوردستانێ سەرۆك مەسعود بارزانی ئەمركری كو هێزا پێشمەرگەی ژ دایكبوونا رەمز و خوین و رۆندكێن گەلێ كوردستانێ یە و چەكێ وی ژی ئاسن و جبەخانە و ئامرازێن جەنگی نینە، بەلكو مێژوو و كەرامەت و فیداكاری و بیروباوەرا گەلەكی یە، ئانكو ئەڤ هێزا كو بەرەڤانی ژ خاكا پیرۆزا كوردستانێ كری و ل دەمی هاتنا مەزنترین رێكخراوا تیرۆرستی ل جیهانی (داعش) بۆ سەر ئیراق و كوردستانێ هەر ئەڤ پێشمەرگە بوو كو بەرەڤانی ژ ئیراقێ و كوردستانێ كر و كەرامەت و شەرەفا وەلاتی پاراست و هێز و ئیرادە بوۆمللەتێ كوردستانێ هێلا، پێشمەرگە نەك هێلا سۆرە بەلكو هێلا مرنێ یە و هێزەكە كو ژ ئاستین دەولەتێن زلهێزێن جیهانێ و نەتەوەیێن ئێكگرتی ڤە شەرعیەت و یاساییبوونا وی هاتیە دانان و هێچ هێز و دەولەت و لایەنەك و كەسە نەشیت هەولان ژی بدەت ژبۆ ژناڤبرنا هێزا پیرۆزا پێشمەرگە، ژبەركو ل گەل دروستبوون و رابوونا مللەتێ كورد هێزا پێشمەرگە هەبوویە و هەتا نوكە ژی ب هزاران شەڕ و بەرەڤانی ژ ئاخا پیرۆزا كوردستانێ كریە و هزاران سەركردە و هێزێن تیرۆرستی ژناڤبریە، جەنابی سەرۆك بارزانی د گۆتنەكا خۆ یا دیتر دا ئەمردكەت (پێشمەرگە ب بریارا كەسەكی دروست نەبوویە داكو ب بریارا كەسەكی بهێتە هەلوەشاندن، پێشمەرگە ب رۆندك و خوینا شەهیدان پەیدابوویە و دەستێ دایكێن شەهیدان و كۆڕێن شەهیدان دهیتە پاراستن ژی)، پێشمەرگە ژی نەكو ناڤەكە یان كەسەكە كو پارچە ئاسنەك هەلبگریت یان هێزەكە ب بریارا ئیكی هاتبیتە دروستكرن و دامەزراندن، بەلكو یا گەلەكێ زولملێكریە و پێشمەرگە ژبۆ قەبوولنەكرنا ڤێ زولمی بەرەڤانی ژ گەلێ خۆ كریە كو ب درێژاهیا مێژوویێ ب فیداكاری و مەرگ ل پێشە بۆ گەل و وەلاتی خۆ.
