هەبوونا ئەكادیمییان و دروستكرنا یاریزانان
نەهلا ئەحمەد
د وەرزێ هاڤینێ دا و د بهێنڤەدانا قوتابخانەیان دا پتریا زارۆكان قەستا ئەكادیمیان دكەن، یا من دڤێت ئاماژێ پێ بدەم گرنگی و هەبوونا ئەكادیمیان د باژێرێ دا مە دا تا چ ڕادەیە ئەرێ كەسێن د ئەكادیمیان دا كار دكەن و برێڤە دبەن وەكۆ ڕاهێنەر؟ ئەرێ چەند سەربۆ و شەهرەزایی هەیە؟، ئەرێ ئەو كەسێن قەستا ئەكادیمیان دكەن ل پاشەروژێ دێ بنە یاریزانێن یانەیەكێ؟ یانەیێن مە یێن ناڤخویی دێ مفایی ژ شیانێن وان بینن؟، ئەگەر ئەم تەماشە بكەین كۆ یانەیێن ئۆرۆپایێ پترییا یاریزانێن وان ژ ئەكادیمیان ب سەر دكەڤن ژ بۆ خولێن بهێز یێن وەلاتێن خۆ ئەوژی بۆ وێ چەندێ ڤەدگەریت كو ئەو فێربوونا فوتبۆلێ یا ئەو فێر دبن ل ژێر سەرپەرشتیا كەسێن ئەكادیمی و شەهرەزایە و خودان باوەرنامەیێن باشن و وان زاروكان فێری شەهرەزایێن یارییا فوتبۆلێ و باسكێت بوڵ و تێنسێ و تایكواندویێ و هەموو یاریێن دی دكەن، ئەگەر ئەم بەراوردیێ بكەین د ڤان سالێن دووماهیێ دا ل باژَێرێ مە ڕێژەیەكا زۆر ژ ئەكادیمیان هەنە بەلێ ب مخابنی ڤە ئەگەر ئەم پێداچوونەكێ بو بكەین بەرهەڤكرنا ئەوان زاروكێن قەستا ئەكادیمیان دكەن گەلەك یا لاوازە ئانكو چوونا ئەوان ژ بۆ یانەیان هەر نینە، ل ڤێرێ دێ یا گرنگ بیت ئەگەر هەر ڕێڤەبەرەك روژانە سەرپەرشتیا ئەكادیمیا خوە بكەت و دۆڤچوونێ بكەت كا ئەرێ ئەو ڕاهێنەرێن ڕاهێنانان ب ئەوان زاروكان دكەن د زیرەكن یان ژی ئەرێ هەمی زارۆكا فێر دكەت یان ژی بتنێ دەمێ ئەوان زاروكان ب هەروە دبەت، ژ بەركو هندەك ژ ڕاهێنەرێن ئەكادیمیان هەنە بتنێ دەمێ زاروكان ب هەروە دبەن ژ بۆ ڤێ چەندێ ژی دبینم ڕێڤەبەرێ ئەكادیمیێ دێ هەق هەبیت وی ڕاهێنەری بكەتە دەر، ئەز دبینم ژی زاروكێن قەستا ئەكادیمیان دكەن پترییا ئەوان د خودان شیانن ئەڤچا یا ل سەر راهێنەرێن ئەكادیمیان پێدڤی ئەوە ب باشترین شێوە زاروك بهێتە فێركرن ژ بۆ هەر یارییەكێ ژ بۆ هندێ ژی ئەو ئەكادیمی دێ ناڤێ خۆ پارێزیت و دبیت ژ بەر سەركەفتنا وێ پترییا زاروكان قەستا وێ ئەكادیمیێ بكەن.
