هەلكـەفتا بـوونا محەمەد پێغەمبەر (س. خ) ب چەندین چالاكیان هاتە ساخكرن
هەلكەفتا بوونا سەروەرێ مرۆڤایەتیێ و پێغەمبەرێ ئیسلامێ محەمەد (سلاڤێن خودێ ل سەر بن) ب چەندین چالاكیێن جود یێن ئایینی ل سەرانسەری پارێزگەها دهۆكێ پیرۆز هاتە راگرتن و ساخكرن.
ب هەلكەفتا بوونا محەمەد پێغەمبەر (سلاڤێن خودێ ل سەر بن)، دوهی 25/8/2026 ب بەرهەڤبوونا سەربەست لەزگین، بەرپرسێ مەكتەبا رێكخستنا پارتی ل بەهدینان و د.عەلی تەتەر پارێزگارێ دهۆكێ و هەژمارەكا بەرچاڤ یا مامۆستایێن ئایینی، مزگەفتا عەبدوللا سوفی ل تاخێ گەڤەركێ ل سەنتەرێ باژێڕێ دهۆكێ هاتە ڤەكرن.
د رێوڕەسمێن ڤەكرنا مزگەفتێ دا پەیڤ هاتنە خواندن و پارێزگارێ دهۆكێ د پەیڤا خۆ دا دوپاتی ل سەر پەیاما محەمەد پێغەمبەر (سلاڤێن خودێ ل سەر بن) كر و ئاشتی و لێبۆرین مرۆڤدۆستی یە، دیسا هنارتنا پێغەمبەری دلۆڤانی یە بۆ هەموو مرۆڤایەتیێ.
هەر ب هەلكەفتا بوونا سەروەرێ مرۆڤایەتیێ محەمەد مستەفا مەكتەبا رێكخستنا پارتی ل بەهدینان پەیامەكا پیرۆزباهیێ بەلاڤكر و تێدا هاتیە: گەرمترین پیرۆزباهیان ئاراستەی موسلمانێن كوردستانێ و جیهانێ دكەین.
د پەیاما مەكتەبا رێكخستنێ دا هاتیە: «هیڤیدارین ئەڤ هەلكەفتا پیرۆز ببیتە دەلیڤەیەك بۆ پاقژكرنا دلان، خورتكرنا گیانێ برایەتیێ، لێبوورینێ و پێكڤەژیانا ئاشتیانە ل كوردستانێ و سەرانسەری جیهانێ، دیسا د ڤێ قووناغێ دا، كو جیهان بەر ب ئاستەنگێن مەزن دچیت، ئارامی و ئاسایشا وەلاتێ مە پێدڤی ب پەیرەوكرنا بهایێن مرۆڤدۆستی و ئایینی یێن پەیاما پێغەمبەرێ ئیسلامێ هەیە، ئەم ب ناڤێ مەكتەبا رێكخستنا پارتی ل بەهدینان دوپاتیێ ل سەر پاراستنا مافێن هەموو پێكهاتەیان و ئازادیا ئایینی دكەین. هەر سال و هەموو لایەك ب ئاشتی و ئارامی بژین».
دیسا ب هەمان هەلكەفت د. عەلی تەتەر، پارێزگارێ دهۆكێ پەیامەكا پیرۆزباهیێ بەلاڤكر و تێدا هاتیە: «ب هەلكەفتا بوونا پێغەمبەرێ ئیسلامێ (محەمەد) سلاڤێن خودێ ل سەر بن، پیرۆزباهیێ ل هەمی موسلمانێن جیهانێ و كوردستانێ و پارێزگەها دهۆكێ دكەین، هیڤیدارین رۆژا بوونا فەخرێ كائیناتان دەلیڤە بیت بۆ بەرقەراركرنا ئاشتی و ئارامیێ بۆ تەڤایا مرۆڤایەتیێ و خورتكرنا گیانێ تەبایی و ئاشتیێ بۆ گەل و وەلاتێ مە».
دیسا هەلكەفتا بوونا سەروەرێ مروڤایەتیێ پێغەمبەرێ مە (محەمەد) سلاڤێن خودێ ل سەر بن، ب پشكداریا بەهرام عریف یاسین، بەرپرسێ لقێ 18 یێ پارتی ل ئامێدیێ و جەماوەرەكێ زۆر، ب چەندین چالاكیێن جودا ل دەڤەرداریا ئامێدیێ هاتە ساخكرن.
دیسا هەلكەفتا بوونا سەروەرێ مروڤایەتیێ پێغەمبەرێ مە (محەمەد) سلاڤێن خودێ ل سەر بن، لیژنا ناوچا خابوور ل زاخۆ ڕێورەسمەكێ تایبەت ئەنجامدا و تێدا دوپاتی ل سەر پەیاما ئاشتی و پێكڤەژیانێ یا پێغەمبەرێ مە (محەمەد) سلاڤێن خودێ ل سەر بن هاتە كرن.
