وانەیەكا عشقێ
صەدیق حامد
بەری پێنجی سالا
رەوشا وێ دارا بەڕوی
ئەوا نێزیكی
قوتابخانا گوندێ مە
دبەر سەكەراتێ را
جارەكا دی روح هاتێ
عشقەكا نوی
د ژییەكی دی دا
سەرهلداڤە
هێژتا خەونا..
ب دیتنا تەڤە دبینیت
هزر دكەت..
هێژتا تو.. هەر ئەوی!
ل مال بابێ د قەبی
ژ نوی بوویە مامۆستا
هاتیە قوتابخانا گوندی!
ئەو رۆژا دارا بەڕوی
تو لێ دیتی
دەم لێ راوستا
(زەمەن) لێ..
(سفر) بوو
عەمر ژ هەر دو پیا
سەقەت بوو
ما د جهدا..
برێڤە نە چوو
لەو بەلگێن وێ دارێ
هیژتا د تەڕن
دلێ من هێژ..
ل وی سەر دەمی..
خۆ دقوتیت
ئەو دار بەڕوی هەتا نهۆ
یا ل هیڤیێ جارەك دی
قوتابیێن خۆ ببەی
بن سیبەرا وێ
وانەیەكا عشقا مری
بۆ .. ساخ كەیە ڤە
وشلۆڤەكەی
گازی و پەیاما خۆ
جەفرەكەت
كو شرینیا وێ دارێ
ژ بەلگا دەركەی
ئەو بەلگێن وێ
هەتا نوكە بەردەوامن
د تەراژیدییا خۆدا
دێمێ تە وێنە دكەن
هەر چار وەرزێن سالێ
بێهنا تە ژێ
د هلكێشن
ئەو بێهن هێڤێنە
هەمی بێهن
پێ خۆش دبن
خوناڤا سەر داڤێن
گیا و كولیلكا
ل دۆر وێ دارێ
هەڕۆ سپێدێ
ژ بۆ هاتنا تە
ل گەل چاڤێ رۆژێ
چاڤنقاندكانێ دكەن
هەمی ب هیڤینە
تە ببینن
جارەك دی بێی.. و
ببی مەلیكا..
عەرشێ خۆ
ل ڤی گوندی
شاهیانا تە ببت
مێژوویەك دی
د عشقستانان دا
ئەو داربەڕوی
پێ شاد ببیت.
