وهرگرتنا مامهلهیێن خانیێن زێدهگاڤی دێ هێته درێژكرن
ههولێر، قائید میرۆ:
ئهندامهكێ لیژنا باژێڕڤانیان ل پهرلهمانێ كوردستانێ ئاشكرا كر، دهمێ وهرگرتنا مامهلهیێن تاپۆكرنا خانیێن زێدهگاڤی دێ هێته درێژكرن، ل گورهی زانیاریێن رۆژناما ئهڤرۆ ژی؛ هێشتا نیڤا وهلاتیێن خانیێن زێدهگاڤی ههین، مامهلهیێن خوه پێشكێش نهكرینه.
زێدان برادۆستی، ئهندامێ لیژنا باژێڕڤانیان ل پهرلهمانێ كوردستانێ بۆ رۆژناما ئهڤرۆ دیار كر، پشتی بجهئینانا قانوونا تاپۆكرنا خانیێن زێدهگاڤی ههژمارهكا زۆرا وهلاتیان مامهلهیێن خوه بۆ تاپۆكرنا خانیێن زێدهگاڤی پێشكێشی حوكمهتێ كرینه و گۆت: “ژ بهر كێمیا دهمی هێشتا ههژمارهكا زۆرا وهلاتیان ماینه و نهشیاینه مامهلهیێن خوه پێشكێش بكهن، لهوڕا ژی پهرلهمان یی كار بۆ درێژكرنا دهمێ وهرگرتنا مامهلهیێن وهلاتیان دكهت، لێ كۆمبوونێن پهرلهمانی هاتینه راگرتن و ههردهمێ دهست ب كۆمبوونان هاته كرن لیژنا باژێڕڤانیان دێ بزاڤان كهت بێخیته بهرنامێ كاری و قانوون بهێته راستڤهكرن”.
زێدان برادۆستی گۆتژی: “زۆرترین رێژا پێشكێشكرنا مامهلهیێن خانیێن زێدهگاڤی ل پارێزگهها دهۆكێ بوویه و كێمترین رێژه ژی ل پارێزگهها سلێمانیێ بوویه، دێ ههموو بزاڤهكێ كهین ههموو وهلاتیێن خانیێن زێدهگاڤی ههین ژ قانوونا تاپۆكرنا خانیێن زێدهگاڤی مفادار بن، ژ بهركو دهلیڤهیهكا باشه بۆ وهلاتیان، ژ لایێ خوهڤه ژی ههرسێ جڤاتێن پارێزگههێن ههرێمێ داخوازهك پێشكێشی پهرلهمانی كریه بۆ درێژكرنا دهمێ وهرگرتنا مامهلهیان”.
