وه‌زاره‌تا بازرگانى و پیشه‌سازى:برینا به‌شه خۆراكێ خەلکێ كوردستانێ د ده‌ستهەلاتا حوکمه‌تا عێراقێدا نینه
ئەڤرۆ نیۆز،زنار تۆڤی
:
به‌رپرسەکێ وه‌زاره‌تا بازرگانى و پیشه‌سازى یا حوکمه‌تا هه‌رێما كوردستانێ ئاشكراکریە،کو حوکمه‌تا عێراقێ نەشێت به‌شه خۆراكێ وەلاتیێن هه‌رێما كوردستانێ ببریت.
عه‌بدولر‌زاق ئۆسمان رێڤه‌به‌رێ گشتی یێ پلاندانانێ ل وه‌زاره‌تا بازرگانى و پیشه‌سازى یا حوکمه‌تا هه‌رێما كوردستانێ راگه‌هاندیە کو پێدانا به‌شه خۆراكی بریارەکا نه‌ته‌وێن ئێكگرتییە و ل سالا 1997 وەکی وەلاتیێن عێراقێ دێ هێتەدان بۆ وەلاتیێن هه‌رێما كوردستانێ ژی.
هه‌روه‌سا گوت ژی:ئه‌ڤ به‌شه خۆراكه ل ماوێ ده‌ستهەلاتا رژێما به‌عسا ژناڤچوویی ژی دا هاتیەدان بۆ وەلاتیان،هەروەسا د دەستهەلاتا وان دا نەبوو،لەورا رژێما به‌عس نه دشیا رێکێ ل هنارتنا وی بگریت،هه‌روه‌سا نوکە حوکمه‌تا عێراقێ ژی نەشێت بریارا برینا وی بدەت.
وی به‌رپرسی راگه‌هاند ژی:بەلێ هه‌ر گوهۆرینەک د بر و جۆرێ وی خوراکی دا بهێتە کرن،دێ هه‌رێما كوردستانێ ژی ڤەگریت.
لێدوانا وی به‌رپرسێ وه‌زاره‌تا بازرگانى و پیشه‌سازی د دەمەکێ دایە کو سەرەرای هندێ فۆرما خۆراكی بۆ هەموو باژێرێن عێراقێ هاتیە چاپكرن، به‌لێ تا نوکە بۆ پارێزگەهێن هه‌رێما كوردستانێ نەهاتیە چاپكرن و نە دایە وەلاتیان.