وێنەیی: ھاتنە خوارا چەند بەران رێیا ڤی گۆندی گرت
ئەڤرۆ نیوز ، نەوزاد زادە ھلۆری:
ژ ئەگەرێ باران بارینێ ل سپێدەیا ئەڤرۆ ل دەوروبەرێن جادا گوندێ شەرمن یا سەر ب قەزا ئاکرێ ڤە ھەرفی و جادە ژی ھاتە گرتن.
وەلاتیەکێ گوندێ شەرمن ب ناڤێ عیسا شەرمنی دیارکر کو ژ نیشکەکێڤە رەخ و رووێن جادەیا گوندێ وان ھەرفی یە و رێک ژی بوو دەمەکی َھاتبووگرتن و گۆت: “ئەڤ جادە گەلەکا کەڤنە و چو دیوارێن پالپشت ژی نین و بارانێ ئاخ و بەرێن وێ سستکرینە بوویە ئەگەر کو ب ھەرفیت”.
ژ لایێ خوە ڤە ئەندازیار محەمەد سەعید رێڤەبەرێ رێک و پرا ل قەزا ئاکرێ بۆ ئەڤرۆ نیوز گۆت: “ژ بەر بارانێ و سستبوونا ئەردی ئەو کەڤرە بەر و کڤاندا ل ھنداڤا جاددێ کو دبێژنێ ئاستەنگا شەرمن ھەرفی یە و بۆ دەمەکێ جاددە ھاتبووگرتن، بەلێ نھا ئەڤ جاددە ھاتیەڤەکرن و ترۆمبێلێن بچووک دکارن تێدا ببوورن”.
زێدەتر گۆت: “ئەو بەرێن کو ھاڤێتینە خوار شوفەر نکارن ل جھی َوان راکەن ژ بەرڤێ پێدڤی یە کو ئەڤ بەرە بھێنە شکاندن و رۆژانێن بھێت دێ ھێنە شکاندن”.
رێڤەبەرێ رێک و پرا گۆتژی: “بۆ ئایندە ئەوان بەرنامە ل بەرە ھەر جھەکێ جاددە یا خراپ بیت یان پێدڤی ب ھەبوونا دیوارێن پالپشت بیت دێ درۆستکەن دا کو سەرو گیانێ وەلاتیان یێ ب سلامەت بیت”.
