وەزارەتا سامانێن سرۆشتی ئەڤ داخوازیە ژ بەغدا کرینە
ئەڤرۆ نیۆز،زنار تۆڤی:
وه‌زاره‌تا سامانێن سرۆشتی یا حوکمەتا کوردستانێ پێنج خال ژ بۆ چاره‌كرنا كێشه‌یێن دارایی و رێككه‌فتنا ل گه‌ل به‌غدا ل سه‌ر دوسه‌یا نەفتێ راگه‌هاندن و داخواز كر کو به‌غدا پێگیر بیت ب هنارتنا 17% یا داهاتێ عێراقێ بۆ هه‌رێما كوردستانێ.
ل گۆر وان خالێن وه‌زاره‌تا سامانێن سرۆشتی ل سه‌ر هژمارا خوه یا تۆرا فه‌یسبۆكی به‌لاڤكرین، وه‌زاره‌تێ داخواز ژ حوکمه‌تا عێراقێ كریه کو مووچێ هەموو مووچه‌خۆر و خزمه‌تگوزاریێن حوکمه‌تا هه‌رێمێ بده‌ت كو هەیڤانە دگه‌هنه 915 ملیار دینارێن عێراقی، زێده‌باری 17% یا به‌رهه‌مێن نەفتا هەموو عێراقێ بۆ بكارئینانا نافخوه‌یا هه‌رێمێ ژ بۆ دانه‌كارا په‌ترۆلگه‌هان و ویستگه‌هێن به‌رهه‌مئینانا كاره‌بێ.
د خالێن وه‌زاره‌تێ دا هاتیه ژی: 17% یا بوودجه‌یا ته‌شغیلی یا هه‌رێما كوردستانێ ژ بوودجه‌یا ته‌شغیلی یا عێراقێ بهێته دابین كرن ئه‌و ژی جودا ژ بوودجه‌ی و مووچه‌ی.
هه‌روه‌سا حوکمه‌تا عێراقێ گه‌ره‌نتیا پێدانا پاره‌یێ كۆمپانیێن نێڤده‌وله‌تی بده‌ت ئه‌وێن كار د به‌رهه‌مئینانا په‌ترۆلێ دا ل هه‌رێمێ دكه‌ن.
د خالا داویێ یا وه‌زاره‌تێ دا هاتیه: حوکمه‌تا هه‌رێمێ پێشنیاره‌كا ئاسانتر دكه‌ت ئه‌و ژی 17% یا به‌رهه‌مێ نەفتا هه‌موو عێراقێ ب هه‌رێمێ بهێته دان و حكومه‌تا هه‌رێمێ دێ هەموو خالێن سه‌ری ب ستوویێ خوه ڤه گریت.
