وەزارەتا كارەبێ: رۆژانە 18 دەمژمێران كارەب بۆ وەلاتیان دهێتە دان
هەولێر، قائید میرۆ:
پەیڤدارێ وەزارەتا كارەبێ ل حوكمەتا هەرێما كوردستانێ ئاشكرا كر، ژ ئەگەرێ نزمبوونا پلەیێن گەرمێ د دەمێ نوكە دا رۆژانە 18 دەمژمێرێن كارەبێ بۆ وەلاتیان دهێنەدان و دبێژیت: هەموو بزاڤ دهێنە كرن بۆ زێدەكرنا بەرهەمێ كارەبێ.
ئومێد ئەحمەد، پەیڤدارێ وەزارەتا كارەبا بۆ رۆژناما ئەڤرۆ دیار كر، هەتا 15ی ئیلۆنێ خشتێ بەلاڤكرنا كارەبێ هەر خشتێ وەرزێ هاڤینێ یە و گۆت: «پشتی نیڤا مەها ئیلۆنێ دەمژمێرێن پێدانا كارەبێ زێدەبووینە، بۆ نموونە: ل مەها تەباخی ئەم شیاین رۆژانە 12 دەمژمێرێن كارەبێ بدەینە وەلاتیان، بەلێ نوكە ئەم رۆژانە هەتا 18 دەمژمێران كارەبێ ددەینە وەلاتیان».
ئومێد ئەحمەد گۆتژی: «خواست ل سەر بكارئینانا كارەبێ زێدەبوویە، هەمان ستاف و وەستگەهێن كارەبێ بەردەوام یێ كار دكەن، بەلێ بەردەوام خواست ل سەر كارەبێ زێدە دبیت، لەوڕا ژی د وەرزێ پایزێ دا خواست ل سەر كارەبێ كێم دبیت و دبیتە ئەگەرێ زێدەبوونا دەمژمێرێن كارەبێ، وەزارەت بزاڤان دكەت بۆ زێدەكرنا بەرهەمێ كارەبێ».
